Avropa Şurasının 60 ili

Azay Quliyev: “Şura ölkəmizin ən geniş əməkdaşlıq qurduğu beynəlxalq qurumdur”

“Park-İnn” otelində Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının təşkilatçılığı ilə Bakıda Avropa Şurasının 60 illiyinə həsr olunmuş konfrans keçirildi.

Tədbiri giriş sözü ilə açan şura sədri, millət vəkili Azay Quliyev bildirdi ki, Avropa Şurası ölkəmizin ən geniş əməkdaşlıq qurduğu beynəlxalq qurumdur: “Avropa Şurasına üzvlük Azərbaycanın özünü beynəlxalq arenada tanıtmasına, öz haqq səsini çatdırmasına kömək edib. Avropa Şurasına üzv qəbul olunandan sonra Azərbaycan dövlətçiliyinin formalaşmasında yeni bir mərhələnin əsası qoyuldu. Biz bu gün Avropa Şurası qarşısındakı öhdəliklərimizin böyük bir hissəsinin yerinə yetirildiyini deyə bilərik”. A.Quliyev ona təəssüfləndiyini də qeyd etdi ki, Avropa Şurası hələ də işğalçı Ermənistanla işğala məruz qalan Azərbaycan arasında fərq qoymur.

Daha sonra tədbirdə iştirak edən Milli Məclisin sədr müavini Bahar Muradova fikirlərini bildirdi: “Azərbaycanın indiyədək qazandığı uğurlardan biri də Avropa ailəsinə üzvlüklə bağlıdır. Avropa Şurasına üzv olmaqla Azərbaycan çox şey əldə edib. İndiyədək qanunlarımızın Avropa ölçülərinə uyğunlaşdırılması sahəsində böyük addımlar atılıb, Avropa dəyərləri Azərbaycana gətirilib, məhkəmə-hüquq islahatları aparılıb, KİV-in sərbəst və azad fəaliyyəti təmin edilib, insan hüquqları ilə bağlı tədbirlər görülüb. Ölkədə demokratik seçki mühiti də ildən-ilə artır. Milli azlıqların hüquqlarını tənzimləyən bütün qanunlar Avropa standartlarına uyğunlaşdırılıb. Bir sözlə, Azərbaycan Avropa Şurası qarşısındakı öhdəliklərinə sadiq bir ölkə olduğunu sübut edə bilib. Deyə bilərlər ki, öhdəliklərdən bəziləri qalıb. Bəli, Dağlıq Qarabağ problemi həll olunmadan bəzi öhdəlikləri yerinə yetirmək mümkünsüzdür. Kimsə bizi qınaya bilməz. Birgə səylər olarsa, etnik separatizmdən qurtula bilərik. Avropa Şurası Dağlıq Qarabağ probleminin həlli ilə bağlı daha ciddi addımlar ata bilər”. Azərbaycanın Avropa İnsan Haqları Məhkəməsindəki nümayəndəsi Çingiz Əsgərov da Avropa Şurası ilə əlaqələrin uğurla davam etdiyini ifadə etdi: “Azərbaycanın hələ quruma üzv olmazdan əvvəl ölüm hökmünü ləğv etməsi mühüm addım idi. Hazırda Azərbaycanın dini sahədəki tolerantlığı bütün Avropaya nümunə ola bilər”.

Tədbirdə iştirak edən Avropa Şurasının Azərbaycandakı təmsilçisi Veronika Kotek isə fikirlərini belə bildirdi: “60 il əvvəl qurum yaranarkən 10 üzvü var idi, indi isə 47 üzvümüz var. Bütün üzv ölkələrlə yaxından əməkdaşlıq edilir. Qanunların qəbul olunması yaxşıdır, amma onların həyata keçirilməsi də lazımdır. Biz üzv ölkələrə daha çox yardımlar etməli, qanunun aliliyini qorumalıyıq”.

Daha sonra tədbirdə 60 illik yubileyə həsr olunan “Azərbaycan və Avropa Şurası” kitabının təqdimatı keçirildi. Qeyd edək ki, kitabın müəlliflərindən biri Adil Vəliyev müəllifi olduğu nəşr barədə iştirakçıları məlumatlandırdı. Onun sözlərinə görə, bu kitabın ingilis dilinə də tərcümə olunması planlaşdırılır.

Məlumat üçün onu da qeyd edək ki, tədbirdə çoxlu sayda QHT nümayəndələri də iştirak edirdilər.

Ağayev İlkin

Palitra. - 2009. -22 dekabr. - S. 4 .