İqtisadçı alimin yubileyi

Naxçıvan Dövlət Universitetində İqtisad fakültəsinin dekanı, iqtisad elmləri doktoru, professor, 38 monoqrafiyanın, 170-dən çox elmi məqalənin müəllifi, 7 övlad, 9 nəvə sahibi Asif Şirəliyevin 70 illik yubileyi muxtar respublikanın ictimaiyyət nümayəndələrinin, eləcə də yubilyarın yaxınları və ailə üzvlərinin iştirakı ilə təntənəli şəkildə qeyd olunub.

Yubiley mərasimində səmimi təbriklərini çatdıran rektor, millət vəkili, akademik İsa Həbibbəyli belə tədbirlərin, Naxçıvan MR Ali Məclisi Sədrinin muxtar respublika ziyalılarına göstərdiyi qayğının parlaq bir təzahürü olduğunu vurğulayıb. Natiq yubilyarın universitetdə müxtəlif məsul vəzifələrdə çalışdığı 35 il ərzində onunla bağlı olan maraqlı xatirələrini bölüşüb. Rektor, yubilyarı hərtərəfli insan kimi qiymətləndirərək onun istər dəqiq, istərsə də humanitar elmlər sahəsində dərin elmi biliyə, tükənməz məlumat bazasına malik olduğunu diqqətə çatdırıb. Natiq bu insanın iqtisadiyyat elminin ən böyük və mürəkkəb bölməsi- iqtisadi nəzəriyyənin bir sıra problemlərinin tədqiqi, iqtisadi nəzəriyyə anlayışlarının dünyəvi dəyərlərə və Azərbaycan reallıqlarına uyğun şəkildə şərhinin verildiyi çoxsaylı lüğətlərin hazıranması sahəsindəki yorulmaz fəaliyyətini yüksək qiymətləndirib. Qeyd olunub ki, Asif müəllim bir tədqiqatçı, elm adamı olmaqla yanaşı sadə, humanist insan, ədalətli və məsuliyyətli işçi, nümunəvi ailə başçısıdır. Sonra yubilyara universitet rəhbərliyi tərəfindən Fəxri fərman təqdim olunub, həmçinin o, Azərbaycan Respublikası Təhsil Nazirliyinin “Qabaqcıl tTəhsil işçisi” döş nişanı ilə təltif olunub.

İqtisad elmləri namizədi, dosent Müslüm Cabbarzadə professorun həyat yolu və elmi-pedaqoji fəaliyyəti haqqında ətraflı məruzə edib. Vurğulanıb ki, 1939-cu ilin dekabr ayının 19-da Naxçıvan MR Şərur rayonunun Düdəngə kəndində anadan olan Asif İsmayıl oğlu Şirəliyev orta təhsilini başa vurduqdan sonra Azərbaycan Dövlət Universitetində ali təhsil alıb və universiteti fərqlənmə diplomu ilə bitirib. Asif Şirəliyev hələ gənc yaşlarından fəallığı ilə seçilib, onun müxtəlif mövzularda məqalələri mətbuatda dərc olunub. Qeyd olunub ki, o, 1971-ci ildən etibarən Naxçıvan Dövlət Universitetində müəllimliyə başlayıb, 1971-1975-ci illərdə Azərbaycan Dövlət İqtisad Universitetinin aspiranturasında təhsil alıb və 1976-cı ildə namizədlik dissertasiyası müdafiə edərək elmlər namizədi alimlik dərəcəsinə layiq görülüb. Ali məktəbdəki səmərəli fəaliyyəti, təşkilatçılıq qabiliyyəti nəzərə alınaraq Asif Şirəliyev müxtəlif rəhbər vəzifələrdə çalışıb, yorulmadan tədqiqat işləri ilə məşğul olub, bir çox elmlər namizədlərinin və doktorların hazırlanmasında əməyi olub. Respublikamızın mütərəqqi ziyalılarından olan Asif Şirəliyevin əməyi dövlətimiz tərəfindən də yüksək qiymətləndirilib, müxtəlif vaxtlarda o, Naxçıvan MSSR Təhsil Nazirliyinin fəxri fərmanları, 2007-ci ildə isə Azərbaycan Respublikası Prezidentinin sərəncamı ilə “Tərəqqi” medalı ilə təltif olunub.

Yubiley mərasimində həmçinin AMEA Naxçıvan bölməsinin sədri, millət vəkili, akademik İsmayıl Hacıyevin, universitetin elmi işlər üzrə prorektoru, AMEA-nın müxbir üzvü, fizika-riyaziyyat elmləri doktoru Vəli Hüseynovun, İqtisadiyyat kafedrasının müdiri, iqtisad elmləri doktoru Ağarza Rüstəmovun, Sosial idarəetmə və hüquq fakültəsinin dekanı, fəlsəfə elmləri namizədi, dosent Qərib Allahverdiyevin, universitetin “Dünya ədəbiyyatı” ixtisası üzrə doktorantı Süsənbər Ağamalıyevanın, yubilyarın ailə üzvləri adından qardaşı Mamoş Şirəliyevin, yaxınları adından Düdəngə kənd ərazi-inzibati dairəsi üzrə nümayəndə Roza Mustafayevanın, İqtisad fakültəsinin Gömrük işinin təşkili ixtisası üzrə III kurs tələbəsi Adilə Ramazanovanın təbrik çıxışları dinlənilib.

Tədbirdə həmçinin universitetin doktorantı Süsənbər Ağamalıyevanın bu ilin mart ayında Azərbaycan Respublikasının Təhsil Nazirliyi tərəfindən hər il müxtəlif ali məktəblərin iştirakı ilə keçirilən və gənc tədqiqatçıların üzə çıxarılması məqsədini daşıyan “Doktorantların və gənc tədqiqatçıların XIII Respublika Elmi Konfransı”nda uğurlu iştirakından da söz açılıb. Qeyd olunub ki, doktorantımızın elmi məruzəsi konfransda təqdim olunan 25 elmi məruzə içərisindən ən yaxşısı kimi dəyərləndirilərək birincilik qazanıb, Respublika Təhsil Nazirliyinin sertifikatı, eləcə də “Nexus” markalı noutbukla mükafatlandırılıb.

Sonda söz yubilyara verilib. O, ziyalılara göstərilən bu böyük diqqətə görə minnətdarlığını ifadə edib.

Cəfərova Nərmin

Palitra. -22 dekabr. – 2009. –S.10.