“Bakı İslam mədəniyyəti və sivilizasiyası üçün mühüm və tarixi şəhərdir”

Mədəniyyət və Turizm naziri Əbülfəs Qarayev dünən "Bakı İslam mədəniyyətinin paytaxtı -2009" mədəniyyət ilinin açılışı münasibətilə Azərbaycana gəlmiş İSESKO-nun baş direktoru Əbdüləziz bin Osman əl-Tüveycri ilə görüşüb.

Görüşdə İslam Konfransı Təşkilatının (İKT) üzvü olan dövlətlərin mədəniyyət nazirlərinin bu ilin oktyabrında Bakıda keçiriləcək VI konfransı ilə bağlı məsələlər müzakirə edilib. Əbülfəs Qarayev qonağa "Bakı İslam mədəniyyətinin paytaxtı - 2009" mədəniyyət ili çərçivəsində keçiriləcək çoxsaylı tədbirlər barədə ətraflı məlumat verib.

Nazir vurğulayıb ki, İKT üzvü olan dövlətlərin mədəniyyət nazirlərinin VI konfransının gündəliyi artıq hazırdır və bu istiqamətdə ciddi işlər görülür. Növbəti iki il müddətində Azərbaycan bu konfransa sədrlik edəcək və bununla bağlı xüsusi plan hazırlanacaq. Ə.Qarayev bildirib ki, Azərbaycan İSESKO ilə əlaqələrə xüsusi önəm verir. "Bakı İslam mədəniyyətinin paytaxtı - 2009" mədəniyyət ili çərçivəsində keçiriləcək tədbirlər bu əlaqələri daha da genişləndirəcək.

"Bakı İslam mədəniyyətinin paytaxtı -2009" mədəniyyət ilinin təntənəli açılışı münasibətilə təbriklərini çatdıran İSESKO-nun baş direktoru Əbdüləziz bin Osman əl-Tüveycri vurğulayıb ki, Azərbaycan bu tədbirə yüksək səviyyədə hazırlaşıb. Bakı islam mədəniyyəti və islam sivilizasiyası üçün çox mühüm və tarixi bir şəhərdir.

Əbdüləziz bin Osman əl-Tüveycri deyib ki, Azərbaycan ərazisinin müəyyən hissəsi erməni işğalı altındadır. Bir çox tarixi abidələr, dini məbədlər, muzeylər, mədəniyyət və sivilizasiya məkanları dağıdılıb: "Biz İSESKO olaraq bunu qəti şəkildə pisləyirik. İnanırıq ki, yaxın vaxtlarda işğal olunmuş Azərbaycan torpaqları azad ediləcək".

Görüşdən sonra keçirilən mətbuat konfransında nazir Əbülfəs Qarayev və İSESKO-nun baş direktoru Əbdüləziz bin Osman əl-Tüveycri jurnalistlərin suallarını cavablandırıblar.

Palitra.- 2009.- 20 fevral.- S. 5.