Səməndər Rzayev anılıb

Sənətkar haqda yazılmış “Nağıl dünyamızın nağıl şahzadəsi” adlı kitabın təqdimatı olub

Son zamanlar müxtəlif təşkilatların təşəbbüsü ilə Azərbaycanın sənət tarixində ifası, kino və teatrda yaratdığı obrazlar qalereyası ilə iz qoymuş sənətkarların silsiləvi olaraq yaradıcılıq gecələri keçirilir. Belə ki, qısa ömür yaşamasına baxmayaraq, milli kino və teatr tariximizdə silinməz iz qoymuş, yaraşıqlı, ciddi, eyni zamanda gülərüzlü bir görkəmə malik olan, ən əsası oynadığı obrazları ilə hər kəsin qəlbinə əbədi həkk olunan görkəmli sənətkarımız Səməndər Rzayevin anadan olmasının 65 illiyi münasibətilə xatirə gecəsi keçirilib. “Məlhəm” Humanist Qadınlar İctimai Birliyinin təşəbbüsü ilə Rəşid Behbudov adına Dövlət Mahnı Teatrında gerçəkləşən xatirə gecəsinə S.Rzayevi sevənlər, sənət dostları toplaşmışdılar.

Gecəni giriş sözü ilə açan “Məlhəm” Humanist Qadınlar İctimai Birliyinin sədri Xədicə Murad bildirdi ki, Azərbaycanın sənət tarixində oynadığı obrazlarla işıq və nur saçan Səməndər Rzayev haqda belə bir gecənin təşkil etməkdən və onun haqqında yazılan kitabın müəllifi olmaqdan qürur duyur:” Bugünkü gecə sənətsevərlərə bir hədiyyə olacaq. Çünki uşaqdan böyüyə qədər hər kəsin sevimlisi olan S.Rzayevin keçdiyi enişli- yoxuşlu, eyni zamanda maraqlı sənət yoluna bir daha nəzər salınacaq. Eyni zamanda S.Rzayevin sənət dostları onunla bağlı maraqlı xatirələrini bizlərlə bölüşəcəklər, dəyərli poeziya və musiqi nömrələri səsləndiriləcək”.

Tədbirdə aparıcılıq edən əməkdar artist Ağalar Bayramov qəlbləri riqqətə gətirən və titrədən səsinin gücü ilə poeziya nümunələrini səslədirdi və S.Rzayevin nəinki oynadığı obrazları ilə, səsinin məlahəti və gücü ilə də hadisələrin rəsmini təsvir etdiyini dedi.

Tədbirdə çıxış edən xalq şairi Musa Yaqub mərhum aktyorun həyat və yaradıcılığına nəzər salaraq, maraqlı məqamları xatırladaraq bildirdi ki, S.Rzayev çox böyük sənətkar idi:” Amma təəssüf ki, bulaq kimi səsi coşub -çağlayan və oynadığı obrazlarla sənətdə hər kəsə nümunə olan sənətkar aramızdan tez getdi və biz Səməndərsiz qaldıq...”.

“Mən bu gecənin təşkilinə həm sevinirəm və həm də kədərlənirəm. Sevinirəm ona görə ki, biz S.Rzayevin maraqlı sənət dünyasına yenidən nəzər salacağıq və onu xatırlayacağıq. Kədərlənirəm ona görə ki, bu gün o, bizlər arasında yoxdur”-deyən xalq artisti Rasim Balayev Səməndər Rzayevin az ömür yaşamasına baxmayaraq, Azərbaycan mədəniyyəti üçün çox işlər gördüyünü söylədi:”Mən S.Rzayevlə dost idim. Onun bu gün həyatda və sənətdə olmamasını kədərlə xatırlayıram. O, mənim sənətdə əlimdən tutub. Həm kino, həm teatr və həm də televiziya tamaşalarının aktyoru kimi əvəzolunmaz bir sənətkar idi. Çox gözəl səsli aktyorlar olub, ancaq Səməndərin səsi doğrudan da möcüzə idi. Səməndər ecazkar səsi və peşəkar ifası ilə hamını valeh edirdi”.

Tədbirdə aktyorun rol aldığı film və tamaşalardan fraqmentlər nümayiş olunmaqla yanaşı, onun sənət və həyat yaşantılarını özündə əks etdirən kitabın da təqdimatı oldu. Dövlət mükafatı laureatı, görkəmli aktyor Səməndər Rzayevin anadan olmasının 65 illiyi münasibəti ilə yazılmış “Nağıl dünyamızın nağıl şahzadəsi” adlı kitabın müəllifi filologiya elmləri üzrə fəlsəfə doktoru, AMEA-nın Nizami adına Ədəbiyyat İnstitutunda böyük elmi işçi vəzifəsində çalışan, Yazıçılar Birliyinin üzvü, “Məlhəm” Humanist Qadınlar İctimai Birliyinin təsisçisi və sədri Xədicə Muraddır. Redaktoru AMEA-nın müxbir üzvü Teymur Kərimli, rəyçilər filologiya elmləri doktoru, professor Məhərrəm Qasımlı və doktor, dosent Asif Rüstəmli olan kitabda Səməndər Rzayevin keçdiyi şərəfli, parlaq sənət və həyat yolundan söhbət açılır, sənət dostlarının xatirələri, illərin söz yaddaşından üzü bu günə kimi sənətkar haqqında söylənilən və dərc olunan fikirlərin toplumu öz əksini tapıb.

Tədbir ecazkar muğam musiqisinin sədaları altında davam etdiridi.

GÜNAY

Paritet.- 2010.- 8-9 aprel.- S. 12.