“Niyyət” filmi tamaşaçılara təqdim edilib

Nizami kinoteatrında təmir bitəndən sonra “Azərbaycanfilm” kinostudiyasında əsaslı təmir başlayacaq

Heydər Əliyev Sarayında “Azərbaycan kino həftəsi”nin təntənəli açılış mərasimi keçirilib. Sözügedən tədbirdə milli kino salnaməmizi özündə kompakt halda birləşdirən video-çarx nümayiş olunub.

Ölkəmizdə ilk dəfə olaraq gerçəkləşən “Azərbaycan kino həftəsi”nin başlaması münasibəti ilə hər kəsi təbrik edən mədəniyyət və turizm naziri Əbülfəs Qarayev bir həftə davam edəcək kino həftəsinin kino işçiləri üçün əsil bayrama çevriləcəyini qeyd edib. O, bildirib ki, bu bir həftə ərzində bütün Azərbaycan tamaşaçıları nümayiş olunan filmləri izləyib zövq alacaqlar: ”Bundan sonra Bakının görkəmli yerlərində çəkilən filmlərin sayı daha da çoxalacaq. Dövlət tərəfindən milli kinomuzun inkişafına xüsusi diqqət göstərilir. Çox sevindirici haldır ki, artıq neçə illərdir hər il Azərbaycan kinosuna 6 milyon manata qədər vəsait ayrılır. Uzun illər bu bizim arzumuz olsa da, bu gün artıq, bu gerçəklikdir”.

Nazir bu gün inkişafla yanaşı, milli kino sahəsində müəyyən çatışmazlıqların olduğunu deyib və bildirib ki, hazırda kino yayımı və kino nümayiş sistemi istənilən səviyyədə deyil:” Milli kino sahəsindəki çatışmamazlıqları aradan qaldırmaq üçün nazirlik olaraq müəyyən layihələr həyata keçiririk. Azərbaycanda kino həftəsinin keçirilməsi də bu istiqamətdə təşkil olunan layihələrdən biridir”.

Tədbirin davamında “Vətən and yerimizdir” devizi altında vətənpərvərlik mövzusunda ən yaxşı bədii filmin ssenari müsabiqəsinin qalibləri mükafatlandırılıb. Müsabiqədə I yerə “Mən evimə qayıdıram” ssenarisinə görə müəllif İsmayıl Səfərəliyev, II yerə “Böyüyən övladlar” ssenarisinə görə müəllif Səidə Vəliyeva (1500 manat) və III yerə isə “Qarabağ. Dörd gün” ssenarisinə görə müəllif Leyla Tarıverdiyeva (1000) layiq görülüblər.

Onu da qeyd edək ki, tədbirdə film nümayişinə keçməmişdən əvvəl “Mozalan” satirik - jurnalının növbəti buraxılışı da tamaşaçılara təqdim olunub. Və nəhayət, “Azərbaycan kino həftəsi”nə Samir Kərimoğlunun rejissoru olduğu və “Azərbaycanfilm” Kinostudiyasında istehsal olunan “Niyyət” filminin nümayişi ilə start verilib. Özünəməxsus süjet xətti və bu gün üçün aktual olan mövzusu ilə diqqətçəkən film tamaşaçıların alqışlarıyla müşayiət olunub.

Nazir jurnalistlərə açıqlamasında deyib ki, “Cəfər Cabbarlı adına “Azərbaycanfilm” Kinostudiyasının əsaslı təmiri olduqca böyük maliyyə tələb edən bir layihədir. Ancaq biz bu işi gələcək üçün planlaşdırırıq”. Kinostudiyanın əsaslı təmirinə “Nizami” kinoteatrının əsaslı təmiri başa çatdıqdan sonra başlanılması nəzərdə tutulur: “Hazırda Azərbaycanın ən böyük kino mərkəzi olan “Nizami” kinoteatrı bərpa olunur. İlin sonu üçün sözügedən kinoteatrı beynəlxalq səviyyədə kinofestival kompleksinə çevrilməsinə nail olacağıq. Bu da Azərbaycan kinosu üçün böyük töhfə olacaq. Hesab edirəm ki, “Nizami” kinoteatrı təhfil verildikdən sonra dövlətin maliyyəsi artıq Cəfər Cabbarlı adına “Azərbaycanfilm” kinostudiyasının əsaslı təmirinə yönələcək. Artıq kinostudiyada bir sıra xırda işlər görülüb. Ancaq istəyimiz odur ki, kinostudiya ən müasir formada təmir olunsun və ən mükəmməl texnologiya ilə təmin olunsun. Elə edəcəyik ki, burada çəkilən filmlər heç də dünya ölkələrində çəkilən ən qabaqcıl filmlərdən geri qalmasın”.

GÜNAY

Paritet.-2010.- 8-9 aprel.- S. 12.