“Turizm haqqında” qanuna dəyişikliklər ediləcək

Faiq Qürbətov: “Turizmin inkişafı ilə bağlı dövlət proqramının təsdiq olunması ölkəmizdə bu sahənin yüksəlişinə böyük təsir göstərəcək”

Bu günlərdə ölkə Prezidenti tərəfindən Azərbaycanda 2010-2014-cü illəri əhatə edən “Turizmin inkişafına dair dövlət proqramı” təsdiq olunub. Bu proqramın əhəmiyyəti və orda yer almış məsələlər bir neçə gündür ki, turizm mütəxəssislərinin diqqət mərkəzindədir. Onlar hesab edirlər ki, sözügedən proqramda yer almış məsələlər icra edildikdə sonra, ölkəmizdə turizm sahəsində müsbət istiqamətdə dəyişiklik və inkişaf olacaq. BMT-nin İnkişaf Proqramının Turizmin İnkişafı layihəsinin milli koordinatoru Faiq Qürbətov da hesab edir ki, yeni qəbul olunmuş dövlət proqramı vaxtında və yerində qəbul olunmuş sənəddir(yap.org.az)

Azərbaycanda turizmin inkişafı ilə bağlı ilk dövlət proqramının 2003-2005-ci illəri əhatə etdiyini xatırladan F.Qürbətov qeyd edib ki, həmin proqramının icrası tam başa çatdıqdan sonra biz onun nəticələrini ölkəmizə gələn turistlərin sayının artmasında və turizm potensialının inkişaf etdirilməsində gördük: ”Mövcud potensialı daha da artırmaq üçün yeni proqrama ehtiyac duyulurdu. Ən əsas məqamlardan biri də odur ki, dövlət başçısı vurğulayıb ki, Azərbaycanda qeyri-neft sektorunun əsas istiqamətlərindən biri də məhz turizm sənayesidir. Bundan irəli gələrək, ölkə Prezidenti nəinki Azərbaycanda turizm sahəsinin inkişafına cavabdeh olan Mədəniyyət və Turizm Nazirliyinə, həmçinin, digər aidiyyatı qurumlara da müvafiq tapşırıq və göstərişlərini verib. İnanıram ki, proqramın icra olunduğu dövrdə qarşıya qoyulan bütün məsələlər yerinə yetiriləcək. Aidiyyatı nazirliklərlə yanaşı, turizm sahəsində çalışan sahibkarlar da bu proqramın icrasına yardımçı olacaqlar və nəticədə bundan Azərbaycan dövləti qazanacaq”. 2003-2005-ci illəri əhatə edən proqramın icrası nəticəsində əldə olunmuş nailiyyətlərdən danışan F.Qürbətov xatırladıb ki, 2003-2005-ci illəri əhatə edən dövlət proqramının əsas məqsədlərindən biri Azərbaycanda turizm zonalarının müəyyən edilməsi idi: ” Hesab edirəm ki, buna nail olduq və bu gün də bu iş davam etdirilir. Artıq Azərbaycanda hansı bölgədə hansı turizm formasının inkişaf perspektivlərinin mövcud olduğu aydındır və onların sənədləşdirilməsi prosesi gedir. Proqramda əksini tapan ikinci mühüm məsələ kadr hazırlığı ilə bağlı idi. Bu məqsədlə Turizm İnstitutu yaradıldı və sevindirici haldır ki, bu il artıq institut ilk məzunlarını buraxacaq. 300 nəfər məzun müxtəlif turizm obyektlərində çalışacaqlar, onların da əldə etdikləri biliklər, təcrübələr də gələcəkdə turizmin daha da inkişafına yardım edəcək. Bakıda müvafiq infrastruktur qurulub və Azərbaycanın 8 turizm potensiallı rayonlarında regional turizm informasiya treninq mərkəzləri yaradılıb”. Ölkəmizdə turizmin inkişaf potensialından danışan mütəxəssis bildirib ki, Azərbaycanın ərazisi digər böyük turizm ölkələri ilə müqayisədə o qədər də böyük olmasa da, müxtəlif istiqamətli turizm sahələrinin inkişafı üçün böyük potensialı var:” Bu baxımdan ölkəmizin mədəni turizm potensialını qeyd etmək istəyirəm. Bilirsiniz ki, Azərbaycanda 6600-dən çox qeydiyyatdan keçmiş tarixi abidələr var və bunlar turizm marşrutlarının üzərində yerləşirlər. Bilirsiniz ki, hazırda Qusarda Şahdağ milli parkının ərazisində böyük bir qış turizm bazası tikilir”.

“Maddi mədəniyyətdən danışarkən, mətbəxi və milli yeməkləri də vurğulamaq lazımdır”-deyən F.Qürbətov bildirib ki, Azərbaycan mətbəxi turistlərdə böyük maraq oyadır:”Azərbaycanın hər bir bölgəsinin özünəməxsus mətbəxi var. Eyni zamanda, sənətkarların əl işləri, aşıq mədəniyyəti və digər tarixi mədəniyyət və sənət nümunələri də turistləri özünə cəlb edir”. Son illər turizmin inkişafının statistik göstəricisindən və ölkəmizə gələn turistlərin sayıdan danışan F. Qürbətov xatırladıb ki, 2009-cu ilin statistikasına əsasən demək olar ki, 1.4 milyona yaxın turist ölkəmizə səfər etdib:” Biz illər arasında müqayisə aparsaq, bu prosesdə hər il 10-15 faiz artımın olduğunu görərik. Əgər bunu bölgələrə bölsək, ən çox turist Bakı şəhərinə gəlib. Burada da Quba, Qusar rayonlarının adını çəkmək olar. Əgər turistlər regional marşrut üzrə ölkəmizə gəliblərsə, onlar Şamaxı, Şəki – Zaqatala zonalarına üz tuturlar. Yay aylarında Bakı, Abşeron, Nabran ərazisində yerləşən obyektlərə daha çox turistin gəlməsini müşahidə edirik.”. Azərbaycanın turizm potensialının xaricdə təbliğ olunması istiqamətində aparılan işlərə toxunan Qürbətov bildirib ki, 2001-ci ildə ümummilli liderimiz Heydər Əliyevin sərəncamı ilə turizm sahəsinə cavabdeh olan dövlət qurumu yaradıldı. Həmin nazirliyin ilkin vəzifələrindən biri Azərbaycanın turizm ölkəsi kimi dünya ictimaiyyətinə təqdim olunması, bu yöndə təbliğati işlərin həyata keçirilməsi idi. İlkin olaraq, nazirlik tərəfindən aparılan işlər nəticəsində, Azərbaycan Ümumdünya Turizm Təşkilatının tam hüquqlu üzvü seçildi.Həmçinin, ölkəmizin təbliğatı məqsədilə dünyanın böyük turizm sərgilərində Azərbaycanın da iştirakı təmin edilir. İlkin illərdə 5-6 sərgidə iştirak edirdiksə, bu gün artıq 16 böyük sərgiyə qatılmışıq və orada ölkəmizin turizm potensialını nümayiş etdirməyə çalışmışıq. Bundan başqa, bilirsiniz ki, Azərbaycan dövlətinin dəstəyi ilə ölkəmizin turizm imkanlarından bəhs edən bir neçə video-roliklər çəkilib və onlar dünyada böyük tamaşaçı auditoriyası olan BBS, CNN, “Euronews”, “National Geographic”, “Travel Channel” kanallarında mütəmadi olaraq nümayiş etdirilir. Görülən işlərin nəticəsi olaraq, Azərbaycana turizm axını artır”.

Mütəxəssis turizm sahəsində qanunvercilik probleminə də toxunub:” Ötən dövr ərzində turizm sahəsinə aid qanunvericilik sənədlərinin də təkmilləşdirilməsi üçün lazımi işlər görülüb və görülür. Bunlar turizm sahəsində fəaliyyət göstərən şirkətlərin sertifikatlaşdırılması, qeydiyyatı və digər məsələləri əhatə edir. Əgər nazirlik yaradılarkən ölkəmizdə cəmi 30-a yaxın turizm şirkəti fəaliyyət göstərirdisə, bu gün onların sayı artıq 200-dən çoxdur. Mehmanxanaların sayına gəldikdə isə, bir neçə il öncə 20-yə yaxın mehmanxana var idisə, bu gün artıq 100-ə qədərdir”. F.Qürbətov qeyd edib ki, hazırda «Turizm haqqında» qanuna əlavə və dəyişikliklər üzərində iş gedir. Bu məqsədlə xüsusi bir komissiya yaradılıb və bu komissiya bütün təklifləri topladıqdan sonra Milli Məclisə təqdim edəcək. Onun sözlərinə görə, ötən dövr ərzində turizm sahəsinə aid qanunvericilik sənədlərinin də təkmilləşdirilməsi üçün lazımi işlər görülüb və görülür. Bunlar turizm sahəsində fəaliyyət göstərən şirkətlərin sertifikatlaşdırılması, qeydiyyatı və digər məsələləri əhatə edir:” «Bu qanunda müasir dövrün tələblərinə cavab verən məsələlər, dəyişikliklər öz əksini tapacaq və mən inanıram ki, bundan sonra daha yeni turizm obyektləri fəaliyyətə başlayacaq və onların daha yeni formada, müasir standartlara cavab verən iş üslubunda fəaliyyət göstərəcəyinin şahidi olacağıq».

Azərbaycanda turizmin inkişafı layihəsinin milli koordinatorı olan F.Qürbətov o layihə haqqında da məlumat verib. O bildirib ki, Azərbaycanda turizmin inkişafı layihəsi Mədəniyyət və Turizm Nazirliyi, Birləşmiş Millətlər Təşkilatının İnkişaf Proqramı tərəfindən birgə həyata keçirilən layihədir: ”Əsas vəzifəmiz turizmin inkişafı nəticəsində, regionlarda və xüsusən, Bakı şəhərində turistlər üçün informasiya mərkəzlərinin yaradılması, həmçinin, bu informasiya mərkəzləri vasitəsilə regionlarda turizm sahəsində yeniliklərin təbliği, bu sahənin inkişafına yardımçı olmaq məqsədilə təlimlərin keçirilməsidir”.

G.ƏSƏDOVA

Paritet.- 2010.- 17-19 aprel.- S. 4.