Balaca rəssamın rənglər dünyasından bir epizod

Yaz fəslində təbiət gözəl bir rəsm əsərinə bənzəyir. Bu cür təbiət gözəllikləri yaşından asılı olmayaraq bütün yaradıcı insanların yaradıcı dünyasına yeni bir ab-hava gətirir və onları daha gözəl əsərlər yazıb yaratmağa və çəkməyə həvəsləndirir. Təbiətdən yaradıcı stimul alaraq çəkdiyi rəsmlərində daim gözəlliklər yaradan gənc və istedadlı rəssam Leyla Babayevanın həftə sonu T.İsmayılov adına Uşaq Gənclər Yaradıcılıq Sarayının geniş salonunda rənglərin düzgün harmoniyası əsasında müxtəlif janrlarda çəkilmiş 70 rəsmin (“Rəşid Behbudov”, “Mənim dayım”, “Mstislav Rastropoviç”, “Xocalı”, “Madonna”, “Dəniz əfsanəsi” , “Cırtdan”, “Qız və dostlar”, “Vergilər” və s.) yer aldığı ilk fərdi sərgisi geniş ictimaiyyətə təqdim edildi.

Sərgidə ictimaiyyət nümayəndələri ilə yanaşı, görkəmli rəssamlar və sənət adamlarından, Bakı Təhsil İdarəsinin nümayəndəsi Rövşən Əliyev, və sarayın nəzdindəki “Uşaq Dünyası” rəsm qalereyasının rəhbəri Aynurə Haşımova və başqa qonaqlar iştirak edirdilər.

Yaşı az olmasına baxmayaraq, Leylanın çəkdiyi rəsmlər onun daxilən zəngin, daha böyük, geniş dünyagörüşlü, intellektli olmasını göstərirdi. Ən maraqlısı o idi ki, Leylanın bütün janrlarda çəkdiyi rəsmlərində milli kolorit, xalqımıza məxsus olan adət-ənənələrimiz özünü göstərirdi. Eyni zamanda onun rəsmləri arasında görkəmli sənət adamlarımızın çox ustalıqla çəkilmiş çoxsaylı portretləri yer almışdı. Leylanı mələklə müqayisə edən və onun mələyə bənzədən xalq rəssamı Ağəli İbrahimov bildirdi ki, rəsmləri onun daha böyük yaradıcı gücə malik olduğunu göstərir:” Leylanın rəsmlərinə baxdıqda həqiqətən onun gələcəyinin parlaq olmasını çəkinmədən demək olar. Bu balaca qız daxilində olan bütün yaradıcı qüvvəsini və istedadını çəkdiyi rəsmlərinə köçürüb. Belə ki, o, rəsmlərində yağlı boya, sulu boyadan və qrafikadan çox ustalıqla və professionallıqla istifadə edərək gözəl rəsmlər çəkib. Ən əsası isə Leylanın bütün əsərlərində Vətəninə, xalqına bağlılığını görmək olur. Gələcək sənətində, təhsilində ona uğurlar arzulayıram və çox istərdim ki, o, rəssamlığı özünə əsas bir peşə seçsin və bu işlə peşəkarcasına məşğul olsun”. Son illər dövlət tərəfindən və Rəssamlar İttifaqı tərəfindən yaradıcı gənclərə hər zaman böyük diqqət və qayğı göstərildiyini deyən əməkdar rəssam Ənvər Qarayev, isə bildirdi ki, Leyla kimi xüsusi istedada malik olan uşaqların bu gün rəssamlığa meyl etməsi və gözəl rəsmlər çəkməsi, Azərbaycanı bir sıra xarici ölkələrdə təmsil etməsi çox sevindirici bir haldır:” Bu azyaşlı qızın rəsmlərində müxtəlif mövzulara müraciəti onun intellektindən xəbər verir. Onun işlərində, eyni zamanda uşaq dünyasının saflığı da duyulur, bu çox təqdirəlayiq bir haldır. Biz gələcəkdə Leyladan yaradıcılığında daha çox şeylər gözləyirik”. Leylanın artıq uzun bir müddətdir ki, T.İsmayılov adına Uşaq Gənclər Yaradıcılıq Sarayında fəaliyyət göstərən rəsm dərnəyinə gəlməsini qeyd edən “Uşaq dünyası” qalereyasının rəhbəri Aynurə Haşımova bildirdi ki, elə dərnəyə gəldiyi ilk günlərdən Leyla öz istedadı, rəssamlığa dair verdiyi maraqlı sualları ilə hər zaman yaşıdlarından fərqlənib:” Düzdür, hər bir uşaqda istedad var, kim də bu daha tez özünü büruzə verir, kimi də isə bir az gec. Amma Leylanın daxilində olan yaradıcı istedadını onun çalışqanlığı nəticəsində bizlər daha tez üzə çıxaraq bildik. Hər bir müəllim üçün, öz tələbəsinin uğurunu görmək sevindiricidir. Mən də bu gün Leylanın çoxsaylı rəsmlərinin yer aldığı birinci fərdi sərgisinin keçirilməsinə sevinirəm və bu rəsmlərə mən onun müəlliməsi kimi yox, adi bir seyrçi kimi baxıram. İnanıram ki, o istedadı ilə rəssamlıq sahəsində daha peşəkarlıq əldə edəcək və gələcəyin Maral Rəhmanzadəsi və Vəciə Səmədovası olacaq”.

Leylanın bugünkü uğuruna, son illər onun bir sıra yerli və beynəlxalq rəsm müsabiqələrində yer tutması və müvəffəqiyyət qazanmasına sevindiklərini deyən valideynləri bildirdilər ki, qızlarının sərgidə nümayiş olunan işlərinə həyəcansız baxa bilmirlər:” Bu, əlbəttə, sevinc həyəcanıdır. Çox istərdik ki, övladımız bu sənətə həmişə indiki kimi, ciddi yanaşsın, xalqına və vətəninə, eyni zamanda mədəniyyətimizə çəkdiyi rəsmlərlə layiqli töhfə versin. Biz də ona bu işdə kömək edərik”.

Məlumat üçün bildirək ki, 3 yaşından rəssamlığa meyl göstərən Leyla Babayeva Bakı şəhərində anadan olub. Çox kiçik yaşlarından rəssamlığa maraq göstərib və ilk vaxtlar kağız üzərində rəngli karandaşla müxtəlif heyvanların və cizgi filmi qəhrəmanlarının rəsmlərini çəkib. Valideynləri onun rəssamlığa olan sonsuz həvəsini görüb Leylanı T.İsmayılov adına Uşaq Gənclər Yaradıcılıq Sarayının “Uşaq dünyası” rəsm qalereyasına gətiriblər. Onun daha geniş yaradıcılıq imkanları burda üzə çıxıb və çəkdiyi müxtəlif mövzulu silsilə rəsmləri ilə bir çox yerli və beynəlxalq müsabiqələrin iştirakçısı və qalibi olub. Özünün dediyinə görə ilk vaxtlar çəkdiyi rəsmləri valideynlərinə göstərib:” Valideynlərimin mənim çəkdiyim şəkillərə sevgi ilə yanaşması məni sevindirdi və daha çox rəsmlər çəkməyə həvəsləndirdi. Üzərində ən çox işlədiyim rəsmlərim arasında portretlər olur. O cümlədən dayımın portretini uzun müddətə çəmikmişəm. Amma nəticə uğurlu alınıb. Ən böyük arzum valideynlərimin portretini çəkməkdi” .Bir çox yerli və beynəlxalq sərgilərdə və xarici ölkələrdə rəsm işləri nümayiş olunub və müxtəlif diplom və sertifikatlara layiq görülüb: “Uşaq ili”, “And yerimiz”, 1 iyun 2009-cu il “1 iyul Uşaqların Beynəlxalq müdafiə günü”, (3-cü Beynəlxalq Rastropoviç Festivalı) “Rastropoviç uşaqların gözü ilə” “Azərbaycanlılara qarşı ermənilər tərəfindən törədilən soyqırım”, “İçərişəhər uşaqların gözü ilə”, “İçərişəhər uşaqların gözü ilə”, “Vergi uşaqların gözü ilə”,”Uşaq ili”, Türkiyənin Azərbaycandakı səfirliyi tərəfindən, “Mənim nağıl dünyam”, “Təmiz şəhərim” və s. Qeyq edək ki, Leyla bu il Təhsil Nazirliyi tərəfindən keçirilən 31 mart Soyqırım Gününə həsr edilmiş sərgi- müsabiqədə qalib olaraq, birincilik əldə edib. Bizdə ümid edirik ki, Leyla öz istedadı və çalışqanlığı sahəsində daha gözəl və bir-birindən fərqli mövzularda çəkdiyi rəsmlərlə hər kəsin qəlbini riqqətə gətirəcək , çoxsaylı uğur və nailiyyətlər əldə edəcəkdi. Sənətsevərlərin nəzərinə çatdıraq ki, balaca rəssamın yaradıcılıq dünyası ilə yaxından tanış olmaq üçü, onların bir neçə gün qalereyada nümayiş olunacaq sərgiyə baxmaq imkanları var.

GÜNAY

Paritet.- 2010.- 20-21 aprel.- S. 16.