Muğamımız Norveç səhnəsində

Skandinaviya ölkələrində yaşayan azərbaycanlı gənclərin forumu keçiriləcək

Son zamanlar Azərbaycanla Norveç arasında mədəni və siyasi əlaqələrin daha da genişləndirilməsi istiqamətində Norveçdə fəaliyyət göstərən Norveç Azərbaycanlıları Gənclər Təşkilatı (NAYO) tərəfindən biri-birindən maraqlı layihələr həyata keçirilir və bu silsilənin yay fəslində də davamı gözlənilir. NAYO-nun sədri, bu il ilk azərbaycanlı gənc olaraq Norveçdə hüquq fakültəsini bitirmiş Ramil Əliyevlə keçirdiyi və keçirəcəyi layihələrdən danışdıq:

“Mədəniyyətimizin gözəl nümunəsi olan muğamlarımızı Norveçdə tanıtmaq istiqamətində maraqlı bir mədəniyyət layihəsinə start verdik. Yəni bu il mart ayında Norveçdə Novruz bayramını muğam janrında tərtib etdilmiş konsert proqramı əsasında təşkil etdik. Bu konsertə Azərbaycan Gənclər və İdman Nazirliyinin dəstəyi ilə Ehtiram Hüseynov (xanəndə), Gülay Qadirova (xanəndə), Sahib Paşazadə (tar), Toğrul Əsədullayev (kamança), Əlipaşa Talıbov (nağara), Svetlana Əhmədova (piano), rəqqaslar Rəna Ibrahimova və Ruslan Hacıyev kimi musiqiçilər qatılmışdılar. Onlar əsasən norveçlilərdən ibarət auditoriya qarşısında canlı ifalarla çıxış etdilər və Azərbaycan milli musiqisinin zənginliklərini Norveç xalqına çatdırdılar. Onu da qeyd edim ki, ilk konsertimiz martın 19-da Norveçin sayca ikinci böyük kitabxanasında “Azərbaycandan Musiqi” adlı proqram əsasında təşkil edildi. Bu tədbirdə Oslo Universitetinin professor və müəllim heyəti, əcnəbi və yerli tələbələr iştirak edirdilər. Martın 20-də isə ikinci konsert layihəsi Norveçin ən məşhur konsert zallarından biri olan “Oslo Konserthus”da baş tutdu”. Azərbaycanın İsveçdəki və Norveçin Azərbaycandakı səfirliklərinin dəstəyi ilə reallaşan bu layihəni keçirməkdə məqsədin mədəniyyətimizin Norveçdə tanıdılması, Azərbaycan gənclərinin bu ölkədə fəallığının artırılması, Norveçdə yaşayan azərbaycanlılar arasında həmrəyliyin möhkəmləndirilməsi və eyni zamanda milli adət-ənənələrimizin qorunub saxlanması olduğunu deyən Ramil Əliyev xüsusi olaraq vurğuladı ki, builki mədəniyyət layihələrinin əsas özəlliyi ondan ibarət olub ki, ilk dəfə olaraq onların təşkil etdiyi tədbirdə Oslo meriyası çıxış edib:”Dəfələrlə bizim layihələrimizdə iştirak edən Norveç hökumətinin rəsmiləri və Oslodakı bir sıra ölkələrin fövqəladə və səlahiyyətli səfirləri, eyni zamanda Norveçdə yaşayan milli azlıqların nümayəndələri də konsertimizdə iştirak edirdilər”. Milli musiqimizin özülü olan muğamlarımızı norveçlilərin necə qarşılamasına və başa düşməsinə gəlincə isə R. Əliyev qeyd etdi ki, muğam Azərbaycan dilindədir, fəlsəfi və eşqə aid olan bir janrdır:” Bu səbəbdən də əcnəbilər Azərbaycan dilini bilsə belə, onların muğamı anlamaq şansı azdır. Amma konsert zalında toplaşmış norveçlilər dilimizi bilməsələr də, muğamımızın sehrli səsi onları valeh etmişdi. Tamaşaçılar musiqiçilərimizi ayaqüstə alqışladılar. Konsertdən sonra əcnəbilər yaxınlaşıb bizim ifaçılara təşəkkürlərini bildirdilər və gələcəkdə belə layihələrin olmasını bizdən istədilər. NAYO-nun iş prinsipini başqa təşkilatlardan fərqləndirən əsas amil reallaşdırdıqlarımız layihələrdə iştirakçıların əcnəbilər olmasıdır”.

Təşkilat sədri bildirdi ki, tarix boyu ermənilər tərəfindən azərbaycanlılara qarşı törədilmiş vəhşilikləri dünya ictimaiyyətinə çatdırılması istiqamətində keçirdikləri tədbirlərdə auditoriyaları əsasən əcnəbilər, yəni norveçlilər və orda yaşayan başqa millətlərin nümayəndələri olurlar.

Skandinaviya ölkələrində yaşayan azərbaycanlı gənclərin bu il keçiriləcək forumundan danışan R. Əliyev bildirdi ki, NAYO fəaliyyət göstərdiyi müddətdə müxtəlif mövzularda seminar, konfrans, sərgi və mədəni layihələr həyata keçirib:” Fikrimcə, NAYO uğurlu bir modeldir. Bu səbəbdən də istəyirik ki, bu modeli Norveçlə yanaşı, başqa Skandinaviya ölkələrində (Finlandiya, Danimarka, İsveçdə və s.) tətbiq edək. Ola bilsin ki, gələcəkdə bu model bizim tərəfimizdən Avropada daha geniş bir formada tətbiq olunsun. Skandinaviya ölkələrində yaşayan azərbaycanlı gənclərlə əlaqə saxlayandan sonra qərara gəldik ki, NAYO-nun təcrübəsini başqa Skandinaviya ölkələrində də tətbiq edək. Hazırda Skandinaviya ölkələrində yaşayan azərbaycanlı gənclərin forumuna hazırlaşırıq və əminəm ki, bu, maraqlı bir layihə olacaqdı”. Bu yay Norveçdə reallaşan “Beynəlxalq Yay Məktəbi” layihəsindən də danışan R.Əliyev xatırlatdı ki, 2005-ci ildən bu ilədək NAYO xüsusi bir layihə ilə “Beynəlxalq Yay Məktəbi”də Azərbaycanı təmsil edir:”Bu festivala dünyanın 101 ölkəsindən 650 tələbə gəlir. İnanın, tələbələrin sözügedən festivala qəbulu çox çətindir. Bu da onun göstərir ki, festivalda təmsil olunan tələbələr həqiqətən savadlı və prespektivli gənclərdir. Biz düşünürük ki, ən böyük lobbiçilik və Azərbaycanın təbliğ etmək akademik səviyyədə olmalıdır. Planlaşdırırıq ki, bu il yay məktəbində Azərbaycanda olan sənət adamlarının yer aldığı və sırf NAYO-nun təşəbbüsü ilə festival yaradaq. Bunu belə etmək də əsas hədəfimiz odur ki, Norveçdə yaşayan azərbaycanlıların Norveç ictimaiyyətinə yaxşı inteqrasiya olunmasını, eyni zamanda bizim mədəni və savadlı bir xalq olduğumuzu Avropaya göstərməkdir”.

“Norveçli gəncləri Azərbaycanla bağlı bu gün nələr maraqlandırır?”-sualını R. Əliyev belə cavablandırdı:” Bilirsiniz bu məsələyə iki cür yanaşma var. Birincisi bizim marağımızda nədir və norveçli gənclərə nələri çatdırmalıyıq, ikincisi isə onlar nə ilə maraqlanırlar. Bu iki məqam təbii ki, bir-biri ilə vəhdət təşkil etməlidir .Əks halda bizim layihələrimiz marağa səbəb olmayacaq və ən əsası biz auditoriya toplaya bilməyəcəyik. NAYO-nun əsas üstünlüyü odur ki, tədbirlərimizə norveçlilər gəlir və həmişə keçirdiyimiz layihələrdə 300 və ya daha artıq əcnəbi tamaşaçı olur. Bu hal da onun göstərir ki, artıq Norveçdə bizim təşkilatla və Azərbaycanla maraqlanan auditoriya var. Ola bilər ki, əcnəbi gənclər soyqırım və faciə haqqında öyrənməyə o qədər maraqlı olmasınlar. Amma bizim, ümumilikdə xaricdə yaşayan azərbaycanlı diasporun vətəndaşlıq borcudur ki, əcnəbi gəncləri bu mövzular ətrafında məlumatlandırsınlar və onlarda maraq yaratsınlar”. Ümumiyyətlə, norveçlilərin Azərbaycana çox böyük maraq göstərdiyini deyən sədr qeyd etdi ki, zəngin mədəni və təbii sərvətlərimiz onları həmişə maraqlandırır: ” Onu qeyd edim ki, bu gün əsasən norveçliləri Azərbaycanın Cənubi Qafqaz geosiyasətində rolu maraqlandırır. Elə burdan irəli gələrək Norveçin Beynəlxalq Əlaqələr İnstitutunda “Azərbaycanın Cənubi Qafqaz geosiyasətində rolu” mövzusunda seminar keçirdik”.

O bildirdi ki, Azərbaycan tarixinə yazılmış qanlı hadisələri dünyada tanıtmaq üçün silsilə tədbirlər keçirirlər. Belə ki, 25 fevralda Oslo Universitetinin Siyasi Elmlər Fakültəsinin “Sülh və münaqişələrin həlli” proqramının və (NAYO) birgə təşkilatçılığı ilə Xocalı soyqırımının 18-ci ildönümünə həsr edilmiş “Azərbaycan və həll olunmamış Qarabağ münaqişəsi” və “Norveçin regionun inkişafında rolu” mövzusunda dəyirmi masa keçirdiklərini söyləyən R. Əliyev xatırtaldı ki, həmin dəyirmi masada Azərbaycanın İsveçdəki səfiri cənab Rafael İbrahimov, Helsinki Komitəsinin direktor müavini Gunnar M. Ekelöv-Slydal, Norveçin Xarici İşlər Nazirliyinin qlobal təhlükəsizlik və MDB ölkələri departamentinin direktor müavini Bord İvar Svendsen və Statiol Norveç neft şirkətinin sosial cavabdehlik şöbəsinin məsləhətçisi Hokon F. Nordanq iştirak ediblər:” Tədbir iştirakçılarına və xarici KİV-nə Heydər Əliyev Fondunun təşəbbüsü ilə hazırlanmış “Xocalı uşaqların gözü ilə” adlı foto sərgi də təqdim olunub və faciə haqqında məlumatların yer aldığı bukletlər təqdim edilib. Tədbirin sonunda NAYO-nun üzvləri olan yerli icma nümayəndələri tərəfindən Xocalı soyqırımı ilə bağlı həqiqətləri beynəlxalq aləmdə yaymaq məqsədilə bir sıra nüfuzlu beynəlxalq təşkilatların e-mail ünvanlarına faciə ilə bağlı məlumat göndərilib və xarici ölkənin ictimai, siyasi xadimlərinə məktublar ünvanlannıb.

Gələcək fəaliyyətimizdə də Azərbaycan həqiqətlərinin dünya ictimaiyyətinə çatdırılmasına və Norveçlə Azərbaycan arasında ikitərəfli əlaqələrin də geniş formada inkişafına çalışacağıq”.

GÜNAY

Paritet.- 2010.- 24-26 aprel.- S. 11.