“Dövlət və din” ictimai fikir toplusunun yeni sayı çapdan çıxıb

Dini Qurumlarla İş üzrə Dövlət Komitəsinin nəşri olan “Dövlət və din” ictimai fikir toplusunun 2010-cu ildə 2-ci sayı işıq üzü görüb.

Toplunun “Rəsmi guşə”si Prezident İlham Əliyevin 8 Mart Beynəlxalq Qadınlar günü münasibətilə Azərbaycan qadınlarına təbriki ilə açılır. Bölmədə Prezidentmizin Novruz bayramı münasibətilə Azərbaycan xalqına, habelə Pasxa bayramı münasibətilə pravoslav xristian icmasına təbrikləri də yer alıb.Əsrlər boyu Azərbaycan xalqına qarşı törədilmiş soyqırımı siyasətinin ən qanlı səhifəsi olan Xocalı faciəsinin 18-ci ildönümü ölkəmizdə geniş şəkildə yad edilib. “Rəsmi guşə”də Respublika Prezidenti İlham Əliyevin faciə qurbanlarının xatirəsini anma mərasimində iştirakı geniş işıqlandırılib. Xocalı soyqırımı qurbanlarının xatirəsi Azərbaycan Respublikasının Dini Qurumlarla İş üzrə Dövlət Komitəsində də anılib. Bununla əlaqədar Dövlət Komitəsində tədbir keçirilmiş və bölmədə həmin tədbir barədə ətraflı məlumat verilib. “Rəsmi guşə”də, həmçinin “Dini ibadət yerinin tikintisinin və mövcud dini ibadət yerinin yenidən qurulmasının (bərpasının, əsaslı təmirinin) məqsədəuyğunluğu barədə rəy verilməsi haqqında Təlimat”ın mətni də oxucuların diqqətinə çatdırılıb.

“Azərbaycan gerçəkliyi” rubrikasında “Naxçıvanda elmin inkişafı: tarixi ənənələr və müasirlik”, “Azərbaycanın qədim sakinlərinin dini dünyagörüşündə astral inamlarla bağlı dəfn adətləri”, “Orta əsrlərdə Azərbaycanda Xilafətin tətbiq etdiyi inzibati siyasət” və “Sovetlər dövründə Azərbaycanda müqəddəs məkanlar” yazıları verilib.

Oxucular “Cəmiyyət və din” adlı ikinci bölmədə “Nəsirəddin Tusinin təkamül görüşlərinin dini-fəlsəfi əsasları”, “Hatifi İsfahani Ordubadi yaradıcılığında İslam fəlsəfəsi”, “Dövlət idarəçilik sistemində mənəvi mədəniyyətin rolu”, “İslamda “ortodoksiya” və “bidət” probleminə dair”, “Novruz - türkün “yeni gün” bayramı”, “Dini cinayətlər” və s. yazılarla tanış ola bilərlər.

Ənənəvi “Tarixə pəncərə” bölməsində dünya və Azərbaycan tarixi ilə bağlı maraqlı məsələlərə toxunulub. Bu mənada Aydın Əlizadənin “İsa Məsih kim olub? Tarixi sənədlər və dini mətnlərdən çıxarılan nəticələr”, Ruhəngiz Kərimlinin “Urartu, Manna və Assuriya münasibətləri” və Tural Əliyevin “I Pyotrun “Vəsiyyətnamə”sində dini məsələlərə münasibət” yazıları oxucular tərəfindən maraqla qarşılanacaq.

Toplunun “İslam həqiqətləri” rubrikası ilə Mübariz Camalovun “İslamda halal qazanc”, Vasif Sadıqlının “Quranda zaman anlayışı” və s. məqalələr dərc edilib.

“Əsrlər, şəxsiyyətlər” bölməsində müəllif Nailə Süleymanova bu dəfə “Nuxəvinin təcvidə dair əlyazmaları” mövzusunda araşdırma aparmış, Səbuhi İbrahimov isə Məhəmməd ibn Hinduşah Naxçıvaninin yaradıcılığı barədə məlumat verib. Toplunun bu guşəsində oxunaqlı yazılardan biri də Nahid Məmmədovun hazırladığı “Əhməd ibn Hənbəli”dir.

Toplunun daha bir maraqlı ənənəvi “Dinlər, təriqətlər, cərəyanlar və təlimlər” rubrikasında Abutalıb Məmmədovun “Vəhhabiliyin problemlərinin dində ifratçılıqla bağlılığı”, Ceyhun Məmmədovun “İslamda məzhəblərin yaranması”, Elnarə Kərimovanın “Səmavi dinlərdə axirət inancı” və s. yazılar yer alib.

“Abidələr” bölməsində Yalçın Abdullayev Azərbaycanda İslam memarlığı, Cahandar Əlifzadə isə Atəşgah məbədi barədə populyar məlumatlı yazıları verilib. Bu rubrikada, həmçinin Bədircahan Əmrullah qızının “Balakən və Zaqatala abidələri”, Şəhriyar İsmiyevin “İordaniya - Petra şəhəri” və Fəxrəddin Səfərlinin “Müsəlman kitabələrində mənzum parçalar” adlı məqalələr dərc edilib.

2010-cu il mart ayının 22-də Ər-Riyadda “Heydər Əliyev və Azərbaycanda milli siyasət” kitabının ərəb dilində ikinci nəşrinin təqdimat mərasimi keçirilib. Oxucular bu barədə geniş məlumatı toplunun “Tədbirlər, məlumatlar” bölməsindən ala bilərlər.

“Dövlət və din”in bu sayında da ənənəvi olaraq dini terminlərin izahlı lüğətinin davamı dərc olunub. Toplunun sonunda Azərbaycan Respublikası Dini Qurumlarla İş üzrə Dövlət Komitəsində qeydiyyatdan keçmiş dini icmaların siyahısı verilib.

RUHULLA

Paritet.- 2010.- 27-28 aprel.- S. 8.