“Savalan” qrupu Almaniyada çıxış edəcək

“Qrupumuzun yaranmasına 20 Yanvar, Qarabağ müharibəsi və digər tarixi faciələrimiz səbəb olub”

Bu gün sənət aləmində fəqli ad və fərqli ampluada çoxlu musiqi qrupları fəaliyyət göstərir. Bu gün bizim haqqında danışacağımız qrup isə musiqi aləmində öz dəst-xətti, repertuar seçimi və ifa tərzi ilə fərqlənən “Savalan” Mistik Musiqi Qrupudur. Musiqinin insanın ruhuna təsir edən ən güclü vasitələrdən biri olduğunu deyən “Savalan” qrupunun rəhbəri, xanəndə Novruz Novruzlu bizimlə söhbətində rəhbəri olduğu qrup və ümumilikdə musiqi ilə bağlı məsələlərdən danışdı.

- Qeyd edim ki, “Savalan” qrupu siyasətə qarışmır. Ancaq bizdə bu millətin övladıyıq, bu torpaqda doğulmuşuq və bu torpağa da borcluyuq. Savalan dağı o tay, bu tayı rəmz edən simvoldur. Savalan dağında mistik bir fikirlərdə gizlənir. Biz əsas bu dağın ucalıq, saflıq, birlik və təmizliyini götürərək qrupumuza “Savalan” adı vermişik. “Savalan” qrupu 2000-ci ildən yaranıb, ancaq biz 2002-ci ildən fəaliyyətə başlamışıq.

-Hansı zərurətdən irəli gələrək bu qrupu yaratdınız?

-Bu qrupun yaranma təşəbbüskarı İsaq Ozanoğludur. O zaman “Savalan” qrupunda biz yox idik və qrupun üzvləri 10 nəfər idi. Qrupun dağılmasına az qalmış Fəxrəddin Salim, Həlimət Sultan gəldi. Və biz hazırda ABŞ -da yaşayan həmyerlimiz istedadlı musiqiçi Cavad İsmayılla birgə qrupu dağılmağa qoymadıq. Bu qrupu yaratmaqla hərdən özümüz özümüzə dönməklə, öz ruhumuzla, daxilimizdə bir rahatlıq tapmaq üçün zikr edirik. Bu qrupu yaradanda bundan başqa heç bir şey düşünməmişdik. Həmişə insanlar tərəfindən mənə belə bir sual verilirdi ki, siz bu proqramla şou aləmində nə edə bilərsiniz? Mən onlara hər zaman bu cavabı verirdim ki, bu qrupu yaratmaqla biz öz daxili aləmimizi musiqi dili ilə ifadə edirik. Başqa nələrsə etmək məqsədimiz olmayıb. Muğam Teatrında məşq edən zaman mətbuat bizimlə maraqlandı və müxtəlif mətbu orqanlarda haqqımızda yazılar dərc edildi və telekanallara dəvət aldıq. Nadir Axundov ifamızı bir saat dinlədikdən sonra, bizi “Speys” televiziyasında yayımlanan verilişlərdən birinə dəvət etdi. Onu da xüsusi olaraq qeyd edim ki, qrupumuzun telekanala ilk dəfə qədəm basması Nadir müəllimin dəstəyi ilə başlayıb. Bundan sonra isə başqa telekanallarda yayımlanan verilişlərə dəvət aldıq. “Savalan” qrupunun yaranmasına 20 Yanvar, Qarabağ müharibəsi və digər tarixi faciələrimiz səbəb olub. Bu faciələrdə bizim çoxsaylı həmyerlilərimiz və dostlarımız dünyasını dəyişdi.

-Bu gün hansısa telekanallardan dəvət alırsınızmı?

-Əvvəla onu qeyd edim ki, qrupumuzun dəfələrlə Türkiyənin TRT, TGRT, STV və İraqda yayımlanan Kərkük TV-də və həmçinin - AzTV, “Speys”, ANS, Lider, İTV kanallarında yayımlanan verilişlərdə tamaşaçılarda böyük rəğbət doğuran maraqlı çıxışları olub. AzTV tərəfindən çəkilmiş “Seyid Nigari”, “Yunus Əmrə”, “Nəimi”, “Təbriz” televiziya filmlərində də musiqi parçalarını biz ifa etmişik.

Eyni zamanda qrupumuz 2009-cu ildə “Gün Az” TV-nin təklifi ilə ABŞ-ın Çikaqo şəhərinə dəvət olunub. Orda “Gün Az” TV-nın 4 illiyi ilə əlaqədər olaraq bir neçə konsert proqramı ilə çıxış etdik.Bu gün müəyyən telekanallarda və radiolarda lent yazılarımız səslənir və qonaq qismində dəvət olunuruq.

-Qrupunuzun üzvləri barədə nə deyə bilərsiniz?

-Hazırda “Savalan” qrupunun üzvləri mən, Həlimət Sultan (səs və bədii qiraət), Fəxrəddin Salim (Baxşəliyev) (saz və ud), Cavad İsmayıl (ney) və İffət Əsgərovdur (kamança).

-Sizi digər qruplardan fərqləndirən əsas xüsusiyyət nədir?

-Deyilənlərə görə, “Savalan “ qrupu mövzusu və repertuarı ilə digər qruplardan fərqlənir. 2007-ci ildə keçirilən Mövlanə günlərində Azərbaycandan yeganə qrup olaraq biz iştirak etdik. Bu gün tamaşaçı kütləsi musiqiyə qarşı ayıq deyil, bu səbəbdən şou aləmində fəaliyyət göstərən musiqiçilər çoxluğun istəyini nəzərə alır, buna uyğun da repertuarını seçir və biznes edir. Ancaq sənət başqa bir aləmdir. Yəni sənətdə xəyanət və təmənna yoxdur.Şou aləmində isə biznes üstünlük təşkil edir. Bizim qrup ruh üstündə yaranıb.

-Fikrimcə sizin öz tamaşaçı auditoriyanız var, razısınızmı tamaşaçılarınızdan?

- Bu gün Azərbaycanda səs-küy, ritm, şou aləmi insanları çox yorub. Hər hansı bir auditoriyada sakit bir proqramla çıxış edən də görürsən ki, Bu da onu göstərir ki, bu gün insanların daxilində ciddi musiqiyə və sənətə ehtiyac var. Sadəcə olaraq ciddi musiqi təqdim edərək tamaşaçıların zövqünü düzgün istiqamətə yönəltmək lazımdır və bizdə bunun üçün çalışırıq.

-Solo konsertiniz olubmu?

- Yox, hələ ki, solo konsertimiz olmayıb. Amma bir neçə gün əvvəl həm qrupun on illiyi və həm də mənim 50 illik yubileyim münasibəti ilə “İncəsənət bağı” restoranında təntənəli mərasim keçirildi və bu solo konsert kimi oldu. Belə deyərdim ki, qısa bir zamanda hazırladığımız bu konsertimiz ekspromt idi. Bu məclisdə çox dəyərli sənətçilərimiz Flora Kərimova, Şeyx Əbdül, Rüstəm Behrudi, Sərdar Fərəcov, Tahir Əmiraslanov və başqa bir sıra dəyərli qonaqlar iştirak edirdilər. Konsertimizdə ənənəvi repertuarımızla yanaşı, institut illərində ifa etdiyim italyan repertuarından da nümunələr tamaşaçılar üçün ifa etdim. Tədbirə gələn auditoriya tərəfindən mərasim bəyənildi. Sözügedən konsertdən sonra bizdə belə bir fikir formalaşıb ki, bir- iki aya solo konsert proqramı ilə çıxış edək.

-Nə səbəbə bu günə qədər sizin diskiniz işıq üzü görməyib?

- Bu gün bizim diskimizin çıxmasına böyük ehtiyac var.Lakin diskin işıq üzü görməməsi maddi çətinliklə bağlıdır. Maddi imkanlarımız geniş olsaydı biz çoxdan CD hazırlayardıq. Amma “Savalan” hələ də disk çıxartmaq niyyətində deyil. Çalışırıq ki, ancaq sənət göstərək. Buna görə də disk çıxartmaq üçün vəsait yoxdur. Xaricilər bizdən tez-tez CD disk istəyirlər. Amma hələki bu məsələ qalıb.

-Repertuarınızda əsas üstünlük hansı musiqilərə verilir?

-Qrupun repertuarında əsasən ilahilər, türkülər və bədii-musiqili kompozisiyalar üstünlük təşkil edir.

-İnternet saytınız nə vaxtdan yaranıb?

- Türk Hərəkatı İctimai Birliyinin “Türk mədəniyyətinin təbliği” layihəsi çərçivəsində ötən ilin mart ayından “Savalan”-ın yeni internet saytı(www. savalan.us) istifadəyə verildi. www. savalan.us saytı 4 dildə - Azərbaycan, ortaq türkçə, rus və ingilis dilində hazırlanıb. Bu saytda bizim qrup haqqında maraqlı məlumatlar, qrupun aldığı mükafatlar, fotolar, qrupun ifasında mahnılar və videolar yerləşdirilib. Eyni zamanda saytda qrupumuz haqqında mətbuatda yer alan yazılar, eləcə də yeniliklər toplanıb. Saytımız bizimlə tamaşaçılar arasında daha sıx əlaqənin yaranmasına səbəb olur. Hər gün biz dünyanın hər yerindən və ölkə daxilindən tamaşaçılardan beş və daha çox məktub alırıq.

Saytın hazırkı fəaliyyəti mənim üçün qaneedicidir o səbəbdən ki, qrupumuz haqqında bütün informasiyalar saytda yer alıb.Bundan sonra da qrup haqqında ən son yeniliklər saytda yerləşdiriləcək, genişləndiriləcək və daima nəzarət altında saxlanılacaq.

-Bildiyimizə görə, sizin “Yuğ” teatrı ilə ımıkdaşlığınız da olub.

-”Savalan” qrupunun ən maraqlı işlərindən biri Dövlət “Yuğ” Teatrının kollektivi və baş rejissoru Vaqif İbrahimoğlu ilə birlikdə hazırladığı teatr tamaşalarıdır. Bunlardan biri Qalib Məmmədov və Fəxrəddin Salimin yaradıcılığından ibarət hazırlanmış “Üz tuturam Tanrıya” və ikincisi, böyük Yunis Əmrə dünyasını əhatə edən “Olsun” meditasion-ruhani tamaşası olub. Hazırladığımız bu komozisiyalar sahəsində çox gözəl bir məclis alındı. Tamaşamız uzun müddət “Yuğ” Teatrının səhnəsində göstərildi. Teatrların bir çoxunda ixtisar getdi, o cümlədən “Yuğ” teatrında da. Bu səbəbdən də sözügedən teatrda fəaliyyətimizi dayandırdıq. Ancaq bu gün Vaqif İbrahimoğlu ilə münasibətlərimiz var və bir neçə layihəmizi onunla birgə həyata keçirəcəyik. Bir dəfə mərhum, görkəmli sənətkarımız Hüseynağa Atakişiyev Dövlət Gənclər Teatrının rəhbəri İmam Hüseynin həyatı ilə bağlı səhnələşdirdiyi “Kərbəladan doğan Günəş” tamaşasını səhnələşdirəndə bizi də dəvət etdi. Həmin tamaşanın musiqilərini ifa etdik.

-Xarici ölkələrdə konsertləriniz olubmu?

- Bəli, qrupumuz dəfələrlə xarici səfərlərdə, o cümlədən Hollandiyanın Haaqa şəhərində DAK-ın 6-cı qurultayında, həmçinin bir neçə dəfə Türkiyənin Konya şəhərində Mövlana Cəlaləddin Rumini anma törənlərində uğurla iştirak edib. Eyni zamanda Pakistanda (2007-ci ilin mayında) keçirilən “Dünya Mistik-Sufi Musiqi festivalı”nda iştirak edərək mükafata layiq görülmüşük, Pakistan Mədəniyyət Nazirliyinin və festivalın xüsusi diplomu ilə təltif olunmuşuq.

Bizi Amerikaya “Günaz” TV-nin rəhbəri Əhməd bəy Obalı dəvət edib. Bir neçə dəfə televiziyada canlı konsertlərimiz olub. Belə çıxışların məqsədi türk dünyasını bir araya gətirməyə hesablanıb. Amerika səfərində “Savalan”-ı Fəxrəddin bəy, Üffan bəy, Aydın bəy, Ağakərim bəy, Həlimət xanımla yanaşı, vaxtiylə bu qrupda çalışmış ney ifaçısı, hazırda ABŞ-da yaşayan Cavad bəy təmsil ediblər.

Ölkə daxilində də qrupumuz zəngin fəaliyyəti var. Biz müxtəlif konsert və tədbirlərdə, maraqlı televiziya çıxışlarıyla cürbəcür proqramlarda, eyni zamanda xüsusi tərifnamə ilə təltif olunduğumuz “Xəzər Dəmir Donanması”nın şəxsi heyəti üçün verdiyimiz solo konsertdə, həmçinin Xəzər Universitetinin çoxsaylı tədbirlərində çıxışlar etmişik.

30 sentyabr 2009-cu ildə Slavyan Universitetində və 2009-cu il 2 oktyabr tarixində Kapellhausda “Dədə-Qorqud”a həsr olunmuş tədbirlərdə Almaniyadan gəlmiş musiqi qrupu ilə birlikdə konsert çıxışları olub.

Bir maraqlı faktı sizə xatırlatmaq istərdim, Bakıda konsertlərimizin birində tamaşaçı qismində iştirak edən İgiltərənin ölkəmizdəki səfirinin xanımı ifamızdan sonra kövrəldi və bildirdi ki, bu ifada söz anlamağa ehtiyac yoxdur. O dedi ki, musiqini dinlədikdə daxilim o qədər saflaşdı ki, uşaqlığım yadıma düşdü.

Amerikaya və bundan başqa bu ilin oktyabr ayı üçün Almaniya dəvət almışıq qismət olsa orda çıxış edəcəyik.

-Bəs toylara necə, gedirsinizmi?

- Toylara getmirik, ancaq dostlarımdan biri mənə dedi ki, toyda çox geniş tamaşaçı auditoriyası toplanır. Bunun üçün də toyda bizim qrupun iştirakının vacib olduğunu bildirdi. O səbəbdən ki, bu gün şou və yüngül musiqiyə daha çox meyl göstərən insanların zövqünü yeniləmək olar. Hərdən toylara dəvət alırıq. O toy məclislərinə gedirik ki, orda bizi duyurlar və qiymət verirlər.

-Yeni layihələriniz barədə nə deyə bilərsiniz?

-Bir sıra yeni layihələr üzərində işləyirik. Eyni zamanda bir neçə filmin musiqisi üzərində çalışırıq.

Günay

Paritet.- 2010.- 19-20 avqust.- S. 12.