Rayonlara turist axını artıb

Atçılıq, dağ və sağlamlıq turizminin inkişafı üçün yeni proqramlar həyata keçirilir

Turizm sektorunun rayonlarda inkişafı ölkəmizə axın edən turistlərin sayının artmasına da təsirini göstərir. Bu gün turizm sahəsinin inkişaf etdiyi rayonlardan biri də Oğuzdur. Oğuz rayonunun gözəl təbiəti, iqlimi turizm üçün əlverişli şərait yaradır. Ölkə başçısının Oğuza səfəri zamanı bölgədə turizmin inkişafı ilə bağlı verdiyi tövsiyələr yerli iş adamlarının, sahibkarların bu sahəyə marağını daha da artırıb. Rayon İcra Hakimiyyətindən mətbuata verilən xəbərə görə, Oğuz şəhərinin girişində smeta dəyəri 8 milyon manat təşkil edəcək 90 çarpayılıq yeni sağlamlıq mərkəzinin tikintisi nəzərdə tutulur. Tikintinin aparılması üçün artıq ilkin hazırlıq işləri başa çatdırılıb. Mərkəzin tikintisinə bu ilin sentyabrında başlanacaq.

Bundan əlavə, hazırda Oğuz şəhərində, habelə rayonun Calud və Xalxal kəndləri ərazisində yeni turizm obyektlərinin tikintisi davam etdirilir. Bu obyektlərin tikintisinə ümumilikdə 15 milyon manata yaxın sərmayə qoyulması nəzərdə tutulur. Eyni zamanda, “Qoşabulaq” adlanan ərazidə 2007-ci ildə tikintisinə başlanılan və smeta dəyəri 2 milyon manat olan yeni turizm obyektinin, habelə “Azərbaycan-60” adlanan ərazidə smeta dəyəri 6 milyon manat olan ala balıqların bəslənmə mərkəzinin tikintisi də davam etdirilir. Mərkəzdə həm də turizm obyektləri fəaliyyət göstərəcək.

Dağlar qoynunda yerləşən, zəngin təbiətə, fauna və floraya malik olan Yardımlı rayonunda da turizmin inkişafı üçün əlverişli şərait var. Sözügedən rayonun turizm idarəsindən verilən məlumata görə orada dövlət qeydiyyatından keçmiş 92 ölkə və yerli əhəmiyyətli tarix və mədəniyyət abidəsi yerləşir:” Gələn qonaqları bu abidələrlə tanış etmək üçün 4 turizm marşrutu fəaliyyət göstərir. Masallı-Yardımlı magistral yolunun 25-ci kilometrində 50 metr hündürlükdən tökülən “Təkdam” şəlaləsi turistləri daha çox cəlb edir. Hər gün buraya gələn yüzlərlə turist ətrafdakı əsrarəngiz gözəlliyin seyrinə dalır, kotteclərdə istirahət edirlər. “Deman” ailəvi istirahət mərkəzi də turizm obyektlərindəndir. Yardımlıda dağ turizminə üstünlük verənlər də az deyil”.

Qeyd edək ki, 2009-cu ildə rayonun turizm obyektlərində 2000-ə yaxın qonaq istirahət edib: “ Bu il turistlərin sayının daha da artacağı gözlənilir. Rayonun Ostayır, Arus, Şəfəq kəndlərinin yaxınlığında və Masallı-Yardımlı magistral yolu boyunca yeni turizm və istirahət mərkəzlərinin tikintisi nəzərdə tutulub”.

Masallı Rayon Mədəniyyət və Turizm Şöbəsindən aldığımız məlumata görə, rayonda hazırda 26 turist obyekti mövcuddur:” Bu obyektlərdə 1400 yerləşdirmə yeri var. Bunlardan 21-i Mədəniyyət və Turizm Nazirliyinin lisenziyası əsasında işləyir. 2009-cu ildə rayona 9874 turist gəlib ki, bunlardan da 367 nəfəri xaricilərdir. Bu ilin ilk altı ayında isə Masallıya 6300 turist gəlib ki, bunlardan da 145 nəfəri xarici ölkə vətəndaşlarıdır”.

Məlumat üçün bildirək ki, rayondakı İstisu sanatoriyasının yaxınlığında yerləşən “Dəstvənd” ən çox turist qəbul edən hotellərdəndir:”Buranın bütün otaqları Avropa üslubunda təmir edilib. Hoteldə konfrans-zal, restoran və bar, sauna, süni göldə qayıqsürmə və hovuz, mini zoopark, 5 yeni müasir kottec, müasir standartlara cavab verən sadə idman qurğuları var. “Dəstvənd” istirahət mərkəzində ölkəmizdə fəaliyyət göstərən səfirliklərin əməkdaşları, habelə İrandan, Türkiyədən istirahət etmək üçün gəlirlər. “Viləşçay” su dəryaçasına qayıqla səyahət, atçılıq, üzgüçülük və digər idman növləri ilə məşğul olmaq üçün şərait var”.

Ölkəmizin əlverişli təbii şəraiti, geniş turizm potensialı olan bölgələrindən birin də Qazax rayonu olduğunu deyən Qazax Rayon Mədəniyyət və Turizm Şöbəsində Baş abidə mühafizi Nofəl Qurbanov bildirdi ki, Azərbaycan Respublikasında 2010-2014-cü illərdə turizmin inkişafına dair Dövlət Proqramına müvafiq olaraq rayonumuzda turizmin bir neçə növünün inkişafı üçün imkanlar var.

Onun sözlərinə görə, rayon mərkəzində ən müasir standartlara cavab verən Olimpiya İdman Kompleksi və İdman Sağlamlıq Mərkəzi fəaliyyət göstərir:” Bu obyektlərdə zəruri yerləşdirmə infrastrukturunun da mövcudluğu idman turizminin inkişafına mühüm zəmin yaradır.

Rayonun ərazisində olan çoxlu sayda bulaqların, üç dəryaçanın, bir neçə mövsümi və üç daimi axan çayların, 4 min hektara yaxın meşə fondunun mənfi təsirlərə məruz qalmaması və su hövzələrinin çirklənməməsi üçün ekoturizmin inkişaf etdirilməsi çox vacibdir”.

“ Rayonumuzda inkişaf etdirilməsi nəzərdə tutulan turizm növlərindən biri də atüstü turizmdir. İnsan sağlamlığı üçün çox xeyirli olan atla gəzinti rayonumuz üçün olduqca xarakterikdir” deyən N. Qurbanov qeyd etdi ki, rayonda 1948-1958-ci illərdə Atçılıq Texnikumu, 1987-1993-cü illərdə isə “At İdman Məktəbi” fəaliyyət göstərib:” Bu sahənin inkişaf etdirilməsi üçün lazımi resurslara malik olan bölgədə atçılıq turizm mərkəzinin yaradılması da nəzərdə tutulub. Mərkəzin yerləşəcəyi məkanı və atlı səyyahın hərəkət edəcəyi marşrutun xəritəsini də hazırlamışıq. Təklif etdiyimiz marşrut ekzotik görüntülü Ağstafaçay dəryaçasının ətrafında yerləşən Cəfərli kəndindən başlamaqla 11 memarlıq, 8 arxeoloji, 4 bulaq, 3 təbiət abidəsi və təbiətin bir sıra mənzərəli guşələrini əhatə edir”.

G.ƏSƏDOVA

Paritet.-2010.-28-30 avqust.- S.10.