2 Fevral Gənclər günü qeyd edilib

Və bir qrup istedadlı gənc mükafatlandırılıb

Ötən həftə sonu 2 Fevral Gənclər günü münasibəti ilə Bakı Şəhər Gənclər və İdman Baş İdarəsinin təşkilatçılığı ilə Novxanıda yerləşən “Aqua Park”da tədbir keçirildi. Tədbirdə Gənclər İdman Nazirliyinin və BŞGİBİ-nin əməkdaşları, millət vəkilləri, ziyalılar, QHT-ları nümayəndələri, Bakı şəhərində yerləşən müxtəlif ali təhsil ocaqlarının tələbələri və başqa bir sıra qonaqlar iştirak edirdilər.

Tədbiri giriş sözü ilə açan millət vəkili Fəttah Heydərov ilk əvvəl tədbirə toplaşan gəncləri bayram münasibəti ilə təbrik etdi və hər gün yeniləşən, gözəlləşən əbədi və müstəqil Azərbaycanda yaşayan gənclərə uğurlar dilədi.

Bu gün gənclərin ölkəmizin fəal üzvləri olduğunu deyən F.Heydərov qeyd etdi ki, sevindirici hal odur ki, Azərbaycan gəncləri təşkilatlanıb: ”Çünki vaxtilə Azərbaycan gəncliyinin təşkilatlanmasında da problemlər yaranmışdı. Belə tədbirlərin keçirilməsini alqışlayıram.Çünki bu cür tədbirlər gənclərin təşkilatlanmasına və daim mütəşəkkil olmasına gözəl nümunədir”.

“Gənclərin kamilik və müdriklik məktəbi olan Heydər Əliyev irsi hər birimizin həyat amalına çevrilməlidir”-deyən BŞGİBİ-nin rəisi Raqif Abbasov 2 Fevral Gənclər günü münasibəti ilə gənclər və idman naziri Azad Rəhimov adından gəncləri təbrik etdi və gənclərə uğurlar və yeni zirvələr arzu etdi:” 1990-ci illərin sonu və 2000-ci il Azərbaycan gəncliyinin yadda qalan illərindən biridir. 2000-ci ilin əvvəllərində hər hansı bir fikri söyləmək üçün, Azərbaycan həqiqətlərini çatdırmaq üçün müəyyən çətinliklərlə üzləşirdiksə bu gün Azərbaycanın bir dövlət olaraq yüksəlməsi nəticəsində Azərbaycan gəncliyinin səsi daha yüksəkdən gəlir. Bunun məntiqi nəticəsidi ki, Azərbaycan gəncliyi Avropa Şurasının Gənclik və İdman Departamentində, Avropa Gənclər Birliyində və müxtəlif beynəlxalq strukturlarda müxtəlif mövqeylərdədirlər”.

Gənclərin vətənpərvər, həmrəy olduğunu deyən idarə rəisi bildirdi ki, gənclərin bu cür birliyi ölkəni daha güclü edir:” 1996-cı ildə ulu öndərin Azərbaycan gəncliyi ilə görüşməsi forumda iştirakı nəticəsində 1997-ci ildən 2 Fevral Gənclər günü qeyd edilməyə başlanıb.Və bu gün də bu proses davam edir. Bu günləri Azərbaycan gəncliyi ölkə prezidenti İlham Əliyevin ətrafında sıx birləşərək əlindən gələni edir və bundan sonrada edəcəklər ki, Azərbaycanımızı daha güclü etsinlər”.

“Azərbaycan bu gün dünyanın inkişaf etmiş ölkələri arasındadır”- deyən ziyalı Həsən Mirzəyev bildirdi ki, ölkədə olan bu inkişaf ölkə prezidenti İlham Əliyevin apardığı düzgün siyasətin nəticəsidir. Gənclərin fiziki cəhətdən sağlam olmalarının da vacib olduğunu deyən ziyalı xatırlatdı ki, bu gün Bakı və rayonlarda çoxlu sayda Olimpiya İdman Kompleksləri tikilib istifadəyə verilib.

Artıq baş idarə tərəfindən bu əlamətdar günlə bağlı silsilə tədbirlər keçirdiklərini deyən sözügedən idarənin gənclərlə iş üzrə sektor müdiri Nəcəf Novruzov bildirdi ki, “gənc” sözünün və bu günün özünün ovqatı gözəldir: ”Fikrimi istedadlı yazıçı Nazim Hikmətin dəyərli fikri ilə davam etmək istərdim.- ”Gənclik bütün yaxşı əməllərin başlanğıcıdır”.

Sonda isə il ərzində fəqlənmiş gənclərə və KİV nümayəndələrinə BŞGİBİ və Binəqədi rayon Gənclər və İdman İdarəsi tərəfindən diplom, fəxri fərmanlar verildi və tədbir konsert proqramı ilə davam etdirildi.

GÜNAY

Paritet.- 2010.- 2-3 fevral.- S. 12.