Azərbaycan Prezidenti Rusiyada “İlin Adamı” seçilib

Rusiyanın “RBK” İnformasiya Agentliyi Azərbaycan Prezidenti İlham Əliyevi 2009-cu ilin personası seçib. Belə ki, fevralın 25-də Kremldə “İlin Personası” beynəlxalq mükafatının laureatları təltif edilib. Mükafatın təsisçiləri bildirirlər ki, “İlin adamı” öz ölkəsinin inkişafının mühüm meyillərini təcəssüm etdirən, onun gələcəyini formalaşdıran insanlardır. Mükafatın laureatlarını müəyyənləşdirən nüfuzlu ekspertlər şurasına tanınmış siyasətçilər, ictimai və siyasi xadimlər, ən iri şirkətlərin rəhbərləri, elm və mədəniyyət xadimləri, KİV nümayəndələri daxildir. Ekspertlər şurasının üzvlərinin çoxu öz ölkəsinin inkişafına sanballı töhfə vermiş insanlar kimi “İlin adamı” seçilmiş şəxslərdir. Onların arasında Sergey Lavrov, Arkadi Dvorkoviç, German Qref, Vladimir Yakunin, Aleksey Miller, Aleksandr Şoxin, Yuri Lyubimov, Mark Zaxarov, Qalina Vişnevskaya, İosif Kobzon, Konstantin Ernst, Vladislav Tretyak və başqaları var.

İctimai-siyasi və biznes sahələrində, habelə xüsusi nominasiyalarda təqdim edilən “İlin adamı” mükafatının ali dərəcəsi Qran-pridir. Qran-priyə layiq görülənlər “Slava oteçestva” ordeni ilə təltif edilirlər.

Builki laureatların seçimi iqtisadi böhran fonunda keçib və qaliblərin tərkibi də çox cəhətdən bu amilə əsasən müəyyən edilib. Laureatların çoxunun qələbəsi məhz onların böhrana qarşı uğurlu mübarizəsi sayəsində təmin edilib(AzərTAc).

“RBK” agentliyinin verdiyi açıqlamaya görə, “İlin adamı” mükafatı il ərzində ölkənin dövlət, ictimai, siyasi maraqları baxımından özünü daha parlaq göstərən şəxslərə verilir. Azərbaycan prezidentinin daxili və xarici siyasəti Azərbaycan millətinin ali mənafelərinə xidmət etikasından irəli gələn qarşılıqlı əlaqəli məsələlər kompleksindən ibarətdir. Prezidentin siyasi xətti millətin mənafelərindən irəli gəldiyi üçün dünyada siyasi vəziyyətin obyektiv şəraitini, xarici siyasi amillərin suveren dövlətlərin həyat fəaliyyətinə misilsiz təsirini nəzərə alır. Ölkə başçısının xarici siyasətində sabitliyin möhkəmlənməsinə, bölgədə əməkdaşlığın dərinləşməsinə, sülhün bərqərar olunmasına yönəlib: “Azərbaycan həm əhali baxımından, həm də ərazi baxımından böyük ölkə deyil. Dünyanın aparıcı ölkələri ilə bizim çox səmərəli münasibətlərimiz, bir tərəfdən, əlbəttə ki, Azərbaycanın önəmindən xəbər verir, digər tərəfdən, şübhəsiz ki, Azərbaycanın düşünülmüş xarici siyasət prinsiplərindən irəli gəlir. Bir daha demək istəyirəm ki, bütün ölkələrlə münasibətlərimiz qarşılıqlı surətdə faydalı şəkildə aparılır və biz bu prinsiplərə sadiqik”-deyə dövlətimizin başçısı bəyan edir.

Prezidet İlham Əliyevin bu mükafata layiq görülməsi onun Rusiyanın ictimai, siyasi və dövlət maraqlarına xidmət edən şəxs kimi tanınması deməkdir. Rusiya ilə Azərbaycanın tarixən müttəfiq dövlətlər olub. Yanvar ayında Bakıda Humanitar Əməkdaşlıq üzrə I Azərbaycan-Rusiya birgə forumunun keçirilməsi də iki ölkə arasındakı münasibətlərin yüksək səviyyədə inkişaf etdiyini bir daha sübut edir. Bu, dostluq və mehribanlıq şəraitində keçmiş çox ciddi forum idi. Forumda çıxış edən Prezident Adminstrasiyasının rəhbəri, akademik Ramiz Mehdiyev Azərbaycan-Rusiya münasibətlərinin kifayət qədər dərin olduğunu və tarixi xarakter daşıdığını qeyd etdi.Rusiya ilə münasibətlərin inkişafı və bunun hərtərəfli olması Azərbaycanın bugünkü və gələcək maraqlarına tamamilə cavab verir. Rusiya Azərbaycan üçün həm də iqtisadi cəhətdən sərfəli və çox böyük bir bazardır.

İlham Əliyev rusiyalı həmkarı Dmitri Medvedevlə görüşlərində daim Azərbaycan və Rusiya arasında dostluq və mehriban qonşuluq münasibətlərinin olduğu qeyd olunur. Bu gün iki ölkə arasında ikitərəfli münasibətlər strateji əməkdaşlığın yeni mərhələsinə qədəm qoyub. İki ölkə arasında münasibətlər dinamik inkişafa, qarşılıqlı əməkdaşlığın genişləndirilməsi və möhkəmləndirilməsi istiqamətinə yönəldilib.Prezidentlər arasında görüşlər kifayət qədər müntəzəm, intensiv xarakter daşıyır və bu, ölkələrimiz arasında münasibətlərin inkişaf səviyyəsini əks etdirir. Əlaqələr bir çox istiqamətlərdə - həm siyasi qarşılıqlı fəaliyyət, həm də iqtisadi planda inkişaf edir. Azərbaycan prezidentinin Rusiyada “İlin Adamı” seçilməsi elə Rusiyanın Azərbaycanı sevməsi və ölkəmizə yaxşı münasibət bəsləməsinin sübutudur. Bu eyni zamnda iki ölkə və iki xalq arasında çox mehriban münasibətlər təzahürünü göstərir.

SİA agentliyi isə öz təhlilində qeyd edir ki, İlham Əliyevin tez-tez dünyanın ən nüfuzlu liderlərindən biri elan olunması onun qlobal fəaliyyətinin məntiqi nəticəsidir. Nüfuzlu beynəlxalq təşkilatların hesabat və sorğularında daim Azərbaycan Prezidenti liderlər sırasına düşür. 2008-ci ildə “WorldPublicOpinion.org”-un dünya liderlərinin reytinqi ilə bağlı tədqiqatına görə, 20 ölkədə 20 minə yaxın respondent arasında keçirilmiş reytinq sorğusu nəticəsində Azərbaycan prezidenti İlham Əliyev Yaxın Şərq üzrə regional lider seçilib.

Son illər Azərbaycanda müşahidə olunan siyasi, iqtisadi və digər proseslər ölkəmizdə bütün sahələr üzrə sürətli inkişafın, milli maraqların, bəşəri ideyaların və demokratik prinsiplərin əksər dövlətlər üçün bir nümunə ola biləcəyini deməyə əsas verir. İqtisadi, siyasi, demokratik islahatlar sahəsində qazanılmış uğurlar, ölkəmizin liderlik zirvəsini qoruması bunu təsdiqləyən başlıca amildir. “Ölkəmizin gələcəyi təkcə iqtisadi amillərlə ölcülmür. Əgər Azərbaycanda müasir siyasi sistem yaranmasa, əgər demokratik prinsiplər tam şəkildə bərqərar olunmasa, bizim uğurlarımız müvəqqəti xarakter daşıyacaq”-deyən Prezident iqtisadi və siyasi islahatların paralel şəkildə aparılmasının bugünkü uğurlarda mühüm rol oynadığını bir daha diqqətə çatdırır.

Demokratik cəmiyyətin mövcudluğunu şərtləndirən amillərin ölkədə bərqərar olmasına çalışan dövlətimizin bu istiqamətdə atdığı addımlar göz önündədir. Söz və mətbuat azadlığının ölkəmizin demokratik inkişafı üçün böyük əhəmiyyət kəsb etdiyini qeyd edən ölkə Prezidenti eyni zamanda jurnalistlərin peşə etikasından kənara çıxmayacaqlarına, peşəkarlıq səviyyələrini artıracaqlarına, milli-mənəvi dəyərlərə, insanların şərəf və ləyaqətinə hörmətlə yanaşacaqlarına ümid etdiyini bildirir.

Demokratiyanın vacib elementlərindən biri də sivil mübarizədir. “Əlbəttə ki, müasir ölkə olmaq üçün biz istər iqtisadi, istər siyasi və demokratik inkişaf sahəsində dünyada mövcud olan ən müsbət təcrübəni Azərbaycanda təbiq etməliyik”-deyə İlham Əliyev qeyd edir. Seçki praktikasının ildən-ilə təkmilləşməsi, Seçki Məcəlləsinə əlavə və dəyişikliklərin edilməsi də ölkə Prezidenti İlham Əliyevin bu fikrinin reallığa söykəndiyini təsdiqləyir.

Seçki Məcəlləsinə və Sərbəst toplaşma azadlığı haqda qanuna dəyişikliklərlə bağlı mühüm işlər aparılıb. Bu həmin qanunların daha da təkmilləşdirilməsinə, ölkədə hər cür azadlıqların təmin olunacağına dövlət qarantiyası verilməsinə əyani sübutdur. Azərbaycanın demokratik inkişaf baxımından bölgə dövlətlərinə nümunə olduğunu şərh etməyə ehtiyac yoxdur. Gürcüstanda və Ermənistanda mövcud duruma diqqət yetirmək kifayətdir. Bu gün Ermənistandakı böhranlı durum beynəlxalq aləmin diqqət mərkəzindədir. Bu ölkədə də demokratik inkişafla bağlı beynəlxalq təşkilatlar mütəmadi iradlarını bildirirlər. Azərbaycanda isə durum tamamilə fərqlidir.

Prezident İlham Əliyevin qeyd etdiyi kimi, ölkəmiz müxtəlif beynəlxalq təşkilatlara könüllü şəkildə üzv qəbul olunub. Məqsəd meyarlarımızı Avropa dəyərlərinə uyğunlaşdırmaqdır. Beynəlxalq təşkilatlar qarşısında götürdüyü öhdəlikləri yüksək səviyyədə yerinə yetirən dövlətimiz eyni zamanda atdığı hər bir addımında, siyasətində müstəqil olduğunu da nümayiş etdirir. Azərbaycan dövlət olaraq bölgədə getdikcə daha möhkəm mövqeyə malik olur. Onun beynəlxalq nüfuzu möhkəmlənir. Dünya başa düşür ki, Azərbaycan dövlət olaraq daha sivil və demokratik yol tutub. Ölkənin iqtisadi qüdrətinin artması ilə yanaşı olaraq geosiyasi əhəmiyyəti də yüksəlir. Xüsusilə Yaxın Şərqdə baş verənlər Azərbaycanın vacibliyini önə çəkir. Orta Asiyaya gedən yol da Azərbaycandan keçir. Bunlar təbii ki, ölkəmizin geosiyasi çəkisini artırır. İlham Əliyevin xarici siyasətdə nümayiş etdirdiyi qətiyyətin təməlində daxili sosial-iqtisadi sabitliyin mövcudluğu əsas rol oynayır. Ölkənin bütün sahələrinin inkişafı cəmiyyəti motivasiya edir və ölkə rəhbərliyinin aktiv surətdə xarici siyasət yeritməsinə şərait yaradır. Azərbaycan Prezidentinin çox fəal xarici siyasəti buna əsaslanır.

F.HÜSEYNZADƏ

Paritet.- 2010.- 27 fevral.- 1 mart.- S. 2.