Erməni terrorizminin ifşası istiqamətində diaspor təşkilatları tərəfindən müxtəlif layihələr həyata keçirilir

“Ötən dövr ərzində əcnəbi media nümayəndələri Azərbaycanda qaçqın düşərgələrində olublar və onlara Qarabağ münaqişəsi ilə bağlı məlumat verilib”

Son illər ölkəmizdə dövlət və qeyri-hökumət təşkilatları tərəfindən Azərbaycana və ümumilikdə türk xalqlarına qarşı ermənilər tərəfindən törədilmiş soyqırım və terrorizm siyasətinin geniş ictimaiyyətə çatdırılması istiqamətində ölkə daxilində və ölkədən kənarda bir sıra təbliğat və təşviqat işləri aparır və layihələr həyata keçirirlər. Bu istiqamətdə daha aktiv iş aparan dövlət təşkilatlarından biri də Diasporla İş üzrə Dövlət Komitəsidir(DİDK). Sözügedən qurumun erməni terrorizminin ifşası istiqamətində gördüyü işlərlə bağlı Təbliğat, informasiya və analitik təhlil şöbəin müdiri Elşad Miraləm məlumat verdi.

-Bu gün Diasporla İş üzrə Dövlət Komitəsinin və Azərbaycan diaspor təşkilatlarının əsas fəaliyyət istiqamətlərindən biri ermənilərin Azərbaycan xalqına qarşı həyata keçirdiyi işğalçılıq, soyqırım və terror siyasəti barədə məlumatları dünya ictimaiyyətinə çatdırmaqdan ibarətdir. Bu istiqamətdə də bizim diaspor təşkilatları ötən müddətdə öz potensial imkanları daxilində bir sıra tədbirlər həyata keçiriblər. Ötən illər ərzində dünyanın müxtəlif ölkələrində Ermənistanın səfirliklərinin və beynəlxalq təşkilatların qarşısında bu məsələ ilə bağlı azəri və türk diasporlarının birgə etiraz aksiyaları olub. Eyni zamanda türk diplomatlarına qarşı törədilmiş terror aktları ilə bağlı, Azərbaycanda erməni terror birləşmələri tərəfindən törədilmiş terror aktları ilə bağlı dünya ictimaiyyətini məlumatlandırmaq istiqamətində işlər görülüb. Bununla bağlı ayrı-ayrı beynəlxalq və bir sıra xarici ölkələrdə fəaliyyət göstərən insan hüquqlarının müdafiəsi ilə məşğul olan qeyri-hökumət təşkilatlarına məlumatlar verilib, hesabatlar və videoçarxlar təqdim olunub. Onu da qeyd edim ki, bu istiqamətdə aparılan iş bu gün də davam edir və təbii ki, gələcəkdə də davam etdiriləcək.

- Bildiyimizə görə, bu günlərdə İsraildə keçirilən konfransda da ermənilərin xalqımıza qarşı törətdiyi soyqırım məsələsi haqqında danışılıb...

-Xəbər verildiyi kimi, mayın 5-6-da İsrailin Təl-Əviv şəhərində “Ön Asiya: kütləvi informasiya vasitələri və regional münaqişələr” mövzusunda beynəlxalq konfrans keçirilib. Azərbaycan Diasporla İş üzrə Dövlət Komitəsinin və Azərbaycan-İsrail Beynəlxalq Assosiasiyasının birgə təşkil etdiyi konfrans dövlət rəsmlərinin, regiondakı prosesləri dərindən bilən politoloqların və mütəxəssislərin, habelə Azərbaycan, İsrail, ABŞ, Ukrayna və Rusiyada fəaliyyət göstərən rusdilli KİV rəhbərlərinin iştirakı ilə medianın münaqişələrin həllində roluna dair müzakirələr aparmaq məqsədi daşıyıb. Konfransda çıxış edən Dövlət Komitəsinin sədri Nazim İbrahimov Azərbaycanda həyata keçirilən islahatlar, İsrail-Azərbaycan münasibətlərinin inkişaf perspektivləri, əlaqələrin inkişafında dövlətlərimizin başçılarının rolu, Dağlıq Qarabağ münaqişəsi, İsrail-Azərbaycan arasında əlaqələrin genişlənməsində və möhkəmlənməsində diasporun rolu və digər məsələlər barədə ətraflı məlumat verib. O, konfrans iştirakçılarına Dağlıq Qarabağ münaqişəsi haqqında ətraflı məlumat verib, bu münaqişənin bütün bölgənin təhlükəsizliyi, sülh və əminamanlığı üçün yaratdığı problemlərdən danışıb.

Azərbaycandan gedən nümayəndələrin bir neçəsi bu mövzular ətrafında məruzələrlə çıxışlar ediblər. Həmin məruzələrdən biri də məhz Dağlıq Qarabağ münaqişəsi, onun nəticələri və bu məsələyə beynəlxalq ictimaiyyətin münasibəti mövzusuna həsr olunmuşdu. Sözügedən məruzədə Dağlıq Qarabağ münaqişəsinin başlanmasının səbəbləri və Ermənistanın işğalçılıq siyasəti ilə bağlı faktlar, məlumatlar diqqətə çatdırıb və bu prosesdə Azərbaycanın beynəlxalq ictimaiyyətin gözləntiləri ilə bağlı məlumat verildi. Qeyd olundu ki, Azərbaycanın hər hansı bir ölkənin onu müdafiə etməsinə ehtiyacı yoxdur, ancaq Azərbaycan istəyir ki, dünya ictimaiyyəti həqiqəti və haqqı müdafiə etsin . Konfransda dünyanın müxtəlif ölkələrində media nümayəndələri iştirak edirdilər. Eyni zamanda azərbaycanlı və israilli jurnalistlər arasında görüşlər keçirildi. Biz ümumiyyətlə, istəyirik ki, dünyanın ayrı -ayrı ölkələrində fəaliyyət göstərən KİV nümayəndələri Azərbaycan haqqında əsl həqiqətləri bilsinlər. Çünki KİV ictimai rəyin formalaşmasında həlledici rol oynayır. İndiyədək bir sıra ölkələrin media nümayəndələrindən ibarət heyət Azərbaycanda qaçqın düşərgələrində olublar. Eyni zamanda Qarabağ münaqişəsi ilə bağlı onlara məlumatlar verilib və materiallar təqdim olunub. Bununla yanaşı, xarici ölkə mediasının nümayəndələri ötən əsrin əvvəllərində azərbaycanlılara qarşı törədilmiş soyqırımı əks etdirən Qubadakı soyqırım məzarlığı ilə tanış olublar. Mən hesab edirəm ki, bu istiqamətdə işimizi bundan sonra da davam etdirəcəyik.

- Komitənin saytında ermənilərin azərbaycanlılara qarşı törətdiyi soyqırımla bağlı materialların yer aldığı bölüm varmı?

-Komitənin saytında həm 20 Yanvar faciəsi, həm Xocalı soyqırımı və həm də Ermənistanın Azərbaycana təcavüzü ilə bağlı faktları əks etdirən bir bölmə var. Həmin bölmə də bu, məsələlərlə bağlı ətraflı məlumat verilib. Eyni zamanda Xocalı soyqırımına həsr edilmiş və DİDK-nin sifarişi ilə çəkilmiş filmdə saytda yerləşdirilib. Amma biz hesab edirik ki, bunlar kifayət deyil. Məlum olduğu kimi, Xocalı soyqırımının tanıdılması ilə bağlı Leyla xanım Əliyevanın rəhbərliyi ilə “Xocalıya Ədalət” adlı böyük kompaniya aparılır. Bu kampaniyada bizim diaspor təşkilatları da fəal iştirak edirlər. Bu kampaniya ilə bağlı bizim saytımızda ətraflı məlumat verilib. Yəni biz düşünürük ki, Xocalı soyqırımı ilə bağlı həqiqətləri elə bir şəkildə təbliğ etməliyik ki, artıq bunu azərbaycanlıların deməyə ehtiyacı olmasın. Yəni ayrı-ayrı xarici ölkələrin ictimaiyyəti, alimləri və ümumilikdə ictimai rəyi formalaşdırmağa qadir olan adamlar bu həqiqətləri dərk və qəbul etsinlər. Bu barədə onlar danışsınlar. Çünki onların bu məsələlər haqqında danışması daha effektli olar və biz bu zaman əsl həqiqətlərin üzə çıxmasına daha rahat nail ola bilərik.

Saytımızın materialları hələ ki yalnız Azərbaycan dilindədir. Çünki xaricdə yaşayan azərbaycanlılar üçün nəzərdə tutulub, amma istəyirik ki, gələcəkdə müxtəlif dillərdə saytımızda materiallar olsun. Və bununla bağlı bizim planlarımız var. Onu da qeyd edim ki, bir sıra xarici ölkələrdə yaşayıb fəaliyyət göstərən diaspor təşkilatlarının saytları var. Sözügedən saytlar həmin ölkələrin dövlət dillərində hazırlanıb. O saytlarda da hər bir ölkənin öz dilində diaspor nümayəndələrimiz tərəfindən Azərbaycan həqiqətləri haqqında məlumat yerləşdirilib.

- Müxtəlif xarici ölkələrdə fəaliyyət göstərən diaspor təşkilatlarımız ermənilərin xalqımıza qarşı törətdiyi terror aktını yaşadığı ölkədə çatdıra bilirmi?

- Azəri diasporunun formalaşma tarixi yenidir. Diaspor təşkilatlarımız öz potensiallarından mümkün qədər istifadə edirlər. Amma daha böyük uğurlar qazanmaq və ciddi addımlar atmaq üçün, bu istiqamətdə işin təkmilləşdirilməsinə ehtiyac var. Çünki yaşadığımız qloballaşan dünyada hər gün dünyanın şərtləri dəyişir, eyni zamanda təbliğat prosesinin öz şərtləri yeniləşir və yeni texnologiyaların tətbiqinə ehtiyac duyulur və bu baxımdan Azərbaycan diaspor təşkilatları da öz fəaliyyətlərini bu şərtlərə uyğunlaşdırmalıdır. Bu şərtlərə uyğunlaşdırma istiqamətində də addımlar atırlar. Əlbəttə, ümumilikdə götürdükdə bizi əldə etdiyimiz nəticələr qane etməyə bilər. Amma başqa kontekstdən baxdıqda biz onu qeyd etməliyik ki, Azərbaycan diasporu böyük bir yol keçməyə nail olub. Yəni Azərbaycan yeni müstəqillik qazananda, dünya azərbaycanlılarının ilk qurultayı keçirilənə qədər xaricdə yaşayan azərbaycanlıların təşkilatlanması sahəsində və bir araya gəlməsində müəyyən problemlər vardırsa, bu gün bu problemlər artıq yoxdur. Azərbaycanlıların təşkilatlanma prosesi demək olar ki, başa çatıb. Azərbaycanlılar yaşadıqları ölkələrdə cəmiyyətin bir hissəsinə çevrilə biliblər. Onlar cəmiyyətə inteqrasiya edir, tanınmağa başlayır və artıq onların sözləri ictimaiyyət tərəfindən qəbul olunur və anlaşıla bilirlər. Bu baxımdan daha ciddi nəticələr əldə etmək üçün potensialımız var, amma biz əldə etdiyimiz nəticələrlə kifayətlənməməliyik və daha ciddi uğurlar əldə etməliyik.

Ümumiyyətlə, Diaspor Komitəsi və diaspor təşkilatlarımızın əsas prinsipi odur ki, dünya ictimaiyyətinə özümüzü Xocalı soyqırımı və Qarabağ problemi kontekstində təqdim edək. Ötən illərin təcrübəsi göstərir ki, bəzən bu arzu olunan effekti vermir. Azərbaycanın özünü tanıtmaq üçün, daha böyük imkanları var. Belə götürsək, bu gün ermənilər dünyanın siyasi səhnəsinə soyqırım amili ilə çıxırlar.Və özlərini soyqırıma məruz qalmış xalq kimi təqdim edirlər. Belə deyək ki bu gün “soyqırım” təqdimatı onların bir brendinə çevrilib. Amma Azərbaycanın zəngin təbii sərvətləri, tarixi, mədəniyyəti , sürətlə inkişaf edən iqtisaddiyyatı və çox böyük dövlətçilik təcrübəsi var. Azərbaycanda həyatın bir sıra sahələri inkişaf edir. Və bu inkişaf kontekstində biz əgər, Qarabağ həqiqətlərini və Ermənistanın Azərbaycana təcavüzü məsələsini çatdırsaq bu daha yaxşı effekt verə bilər. Bu baxımdan ki, təəssüf ki, Azərbaycan xalqı bir çox faciələri yaşamalı olub. Ayrı-ayrı ölkələrdə 20 Yanvar faciəsi, Xocalı soyqırımı, Şuşanın, Laçının işğalı ilə bağlı tədbirlər keçirilib. Və bu tədbirlərdə diaspor nümayəndələrimiz tərəfindən dəvət olunmuş həmin ölkələrin ictimai -siyasi xadimləri iştirak ediblər.

- Komitə tərəfindən ermənilərin xalqımıza qarşı törətdiyi faciələri əks etdirən hər hansı materiallar hazırlanıbmı?

-Xocalı soyqırımı və ümumilikdə xalqımıza qarşı törədilmiş erməni vəhşiliklərini dünyaya çatdırmaq üçün Azərbaycan Milli Elmlər Akademiyası, İnsan Haqları İnstitutu, başqa bir sıra qeyri-hökumət təşkilatları, dövlət təşkilatları və eyni zamanda Heydər Əliyev Fondu tərəfindən bu istiqamətdə böyük layihələr həyata keçirilib və təbliğat materialları hazırlanıb. Biz o təbliğat materiallarından maksimum dərəcədə istifadə edirik, eyni zamanda komitə də öz imkanları daxilində bu istiqamətdə təbliğat materialları hazırlayır. Adətən, Azərbaycanla bağlı və xalqımıza qarşı törədilmiş soyqırım siyasəti ilə bağlı azərbaycanlı müəlliflər tərəfindən yazılan materiallar başqa ölkələrin ictimaiyyətində bir az qeyri obyektiv təəssürat yaradır. Biz bu baxımdan hesab edirik ki, xarici ölkələrin elm adamlarının, jurnalistlərinin, ictimaiyyət nümayəndələrinin bu həqiqətləri anlamaları vacibdir ki, onlar bu həqiqətlər haqqında yazsınlar, bunun effekti daha böyük olar. Bu istiqamətdə biz ötən il bir neçə layihələr həyata keçirmişik. Azərbaycanla bağlı bir sıra əcnəbi müəlliflərin əsərləri tərcümə olunub. Bu sahədə işimizi davam etdirəcəyik.

- Bir sıra xarici ölkə mətbu orqanlarında Qarabağla və Azərbaycanla bağlı həqiqətə uyğun olmayan məlumatlar verilir. Siz bu cür hallara necə cavab verirsiniz?

-Bizim bu məsələlərlə bağlı məlumatımız olduqda öz səlahiyyətlərimiz daxilində operativ işlər görürük. Eyni zamanda bu işdə bizim diaspor təşkilatlarımız fəallıq göstərirlər. Bu yaxın illərdə Qarabağla bağlı erməni lobbisi və diaspor təşkilatının təşəbbüsü ilə filmər çəkilib, nümayiş etdirilib və internet saytlarında yayımlanıb. Bu neqativ halın qarşısı xaricdə yaşayan diaspor təşkilatlarımızın müdaxiləsindən sonra alınıb. Indi bir çox ölkələrdə ki, diaspor təşkilatlarımız, o cümlədən Amerika, Hollandiya, Belçika və Rusiyada olan diaspor təşkilatlarımız virtual məkanla çox fəal iş aparırlar. Onların bir neçə dəfə Qarabağ həqiqətlərini dünyaya çatdırmaq üçün, layihələri olub və həmin layihələr uğurla icra edilib. Bu istiqamətdə bu gün də iş aparılır. Ümumiyyətlə, bu gün virtual məkanda aparılan işin və təbliğatın daha böyük effekti var.

- Komitə tərəfindən sözügedən mövzu ətrafında təbliğat işləri aparılır?

-Ermənilərin terrorizm və soyqırım siyasəti ilə bağlı komitə tərəfindən müntəzəm iş aparılır. Diaspor təşkilatlarımız ermənilərin təkcə azərbaycanlılara qarşı deyil, eyni zamanda Azərbaycanda olan digər xalqların nümayəndələrinə qarşı da törətdiyi soyqırım siyasətini dünya ictimaiyyətinə çatdırmağa çalışırlar. Yəni bu, diasporumuzun və ümumilikdə xaricdə yaşayan hər bir vətənpərvər azərbaycanlının əsas fəaliyyət prinsiplərindən biridir.

Günay ƏSƏDOVA

Paritet.- 2010.- 5-7 iyun.-S. 6.