Rənglərin qovuşduğu sirli bir aləm...

Son illərdə ölkəmizdə dövlət tərəfindən gələcəyimizin təminatçısı olan uşaqlara xüsusi diqqət və qayğı göstərilir. Eyni zamanda onların yaradıcı qabiliyyətlərinin üzə çıxarılması istiqamətində müxtəlif tədbirlər keçirilir. Belə ki, bu yaxınlarda Vergilər Nazirliyinin təşəbbüsü və Tofiq İsmayılov adına Uşaq-Gənclər Yaradıcılıq sarayının dəstəyi ilə “Uşaq dünyası” qalereyasında “Vergilər uşaqların gözü ilə” adlı rəsm müsabiqəsi keçirilib. Məlumat üçün bildirək ki, sözügedən sərgi artıq bu mövzuda keçirilən 8-ci müsabiqə sərgidir.

Qeyd etdiyimiz sərgi-müsabiqədə rəssamlıq üzrə birincilik əldə etmiş 7 yaşlı Seymur Novruzovla həmsöhbət olub, onun “rənglər dünyası” ilə yaxından tanış olduq. Bu balaca rəssamın rəsmlərində olan rəngarənglik və millilik onun zəngin daxili aləminin, geniş dünyagörüşünün, intellektinin olmasını göstərir. Çox kiçik yaşlarından rəssamlığa maraq göstərən Seymurun dediyinə görə, altı aydır ki, intensiv olaraq rəssamlıq dərnəyinə gedir: “Mənim artıq bir neçə aydır ki, gəldiyim və rəssamlıq sənətinin sirlərini öyrəndiyim Tofiq İsmayılov adına Uşaq-Gənclər Yaradıcılıq sarayının nəzdindəki “Uşaq dünyası” qalereyasındakı rəsm dərnəyində müəlliməmiz olan Kəmalə Rüstəmova bizə rəssamlıq sənətinin incəliklərini və rənglərlə işləmə üsulunu öyrədir. Və bizim qrupda olan 18 nəfər uşaqlar bir-birinə köməklik edir. Eyni zamanda bir-birimizin işləri ilə bağlı fikir söyləyirik”.

Seymur bu günədək çəkdiyi rəsmlərdən danışaraq bildirdi ki, daha çox heyvanların rəsmlərini çəkməyi xoşlayır: “Artıq 30-dək rəsmlərim var. Bu rəsmlər müxtəlif mövzulara həsr edilib. Mən daha çox rəngli boyalarla işləməyi sevirəm”.

“Çəkdiyim rəsmlərdə bayrağımızın rənglərindən (yaşıl, göy, qırmızı) tez-tez istifadə edirəm. Bu rənglər mənə daha yaxındır. Onun üçün ki, mən Azərbaycanı çox sevirəm” -deyən Seymur bildirdi ki, rəssamlığı çox sevsə də, amma böyüyəndə ən böyük arzusu Vətənini qoruyan yaxşı əsgər- polis olmaqdır: “İstəyirəm ki, torpaqlarımız azad olsun həmin yerlərin gözəl mənzərələrinin rəsmlərini çəkim. Bu mənim ən böyük arzumdur”.

O, “Vergilər uşaqların gözü ilə” adlı rəsm müsabiqəsinə təqdim etdiyi rəsmindən danışaraq qeyd etdi ki, bu müsabiqə üçün bina şəkilini çəkib:” Hər kəs vaxtında vergini ödəməlidir ki, şəhərimiz gözəlləşsin və yeni tiklilərin sayı artsın. Bu şəkili çəkməkdə də əsas məqsədim bu olub. Gələcəkdə də bu mövzuda silsilə rəsmlər çəkəcəyəm”.

Seymurun rəssamlıq dərnəyinə gəldiyi ilk gündən yoldaşlarından aktivliyi ilə fərqləndiyini deyən müəlliməsi Kəmalə Rüstəmova bildirdi ki, onun dərnəyə gəlməsinin əsas məqsədi gələcəkdə xəttinin gözəl olması ilə bağlıdır:”Amma çəkdiyi rəsmlər göstərir ki, Seymur daha böyük yaradıcı gücə malikdir və onun gələcəkdə hansı sənəti seçməsindən asılı olmayaraq, bu sahədə də gələcəyi parlaqdır. Deyərdim ki, bu balaca rəssam daxilində olan bütün yaradıcı qüvvəsini və istedadını çəkdiyi rəsmlərinə köçürüb. Belə ki, o, rəsmlərində yağlı boya, sulu boyadan ustalıqla və professionallıqla istifadə edərək, gözəl rəsmlər çəkəcək. Ən əsası isə onun bütün əsərlərində Vətəninə, xalqına bağlılığını görmək olur”. Kəmalə xanım onu da qeyd etdi ki, Seymurun bu gün ölkənin inkişafına və çiçəklənməsinə xidmət edən vergilər mövzusunda rəsm çəkməsi onu çox sevindirir:” Kiçik yaşlı uşağın bu mövzuda rəsm çəkməsi onun intellektindən xəbər verir. Onun işlərində, eyni zamanda uşaq dünyasının saflığı da duyulur, bu çox təqdirəlayiq bir haldır. Mən bir müəllim kimi onun gələcəkdə yaradıcılığından daha çox şeylər gözləyirəm”.

Seymurun valideynləri övladlarının bu rəsm sərgisindən birincilik əldə etməsinə çox sevindiklərini dedilər və bildirdilər ki, hər bir valideyn üçün, övladının uğurunu görmək sevindiricidir:” Seymurun ilk uğuru bizləri çox sevindirir.

Onun məhz bu müsabiqədə birincilik əldə etməsinə və müvəffəqiyyət qazanmasına çox şadıq. Övladımızın işlərinə həyəcansız baxa bilmirik: ”Bu, əlbəttə, sevinc həyəcanıdır. Çox istərdik ki, övladımız bu sənətə həmişə indiki kimi, ciddi yanaşsın və bu mövzuda gözəl əsərlər yaratsın. Əgər, özü istərsə bizdə çalışarıq ona kömək edək ki, gələcəkdə bu işlə peşəkarcasına məşğul olsun”.

Qeyd edək ki, builki müsabiqənin sonunda müsabiqədə qalib gələn rəsm əsərləri və balaca rəssamlar mükafatlandırıldı. Münsiflər heyəti həmçinin asfalt üzərində çəkilən rəsmlərin qaliblərini və hekayə müəlliflərini də elan edib, onları mükafatlandırdılar. Eyni zamanda sərgidə nümayiş olunan rəsmlərin katoloqu da hazırlanacaq. Sənətsevərlərin nəzərinə çatdıraq ki, uşaqların saf qəlbindən süzülüb gələrək rənglər vasitəsiylə ağ kağız üzərində təsviri verilən rəsmlər bir neçə gün Tofiq İsmayılov adına Uşaq-Gənclər Yaradıcılıq sarayının qalereyasının divarlarını bəzəyəcək.

GÜNAY

Paritet.- 2010.- 17-18 iyun.- S. 13.