Azərbaycanda qurulan müasir sığorta-pensiya sistemi beynəlxalq mükafata layiq görülüb

Dövlət Sosial Müdafiə Fondu İctimaiyyətlə əlaqələr sektorunun məlumatına görə, Azərbaycan Respublikasında qurulan müasir sığorta-pensiya sistemi növbəti beynəlxalq uğura imza atıb.

Belə ki, Dövlət Sosial Müdafiə Fondu Beynəlxalq Sosial Təminat Assosiasiyasının (BSTA) Avropa müsabiqəsində “İnformasiya kommunikasiya texnologiyalarının tətbiq olunması vasitəsilə effektiv idarəetmə” nominasiyasında müsabiqənin qalibi elan olunaraq, Fəxri Fərmanla təltif edilib. Mükafat Varşava şəhərində keçirilən Avropa Forumunda Dövlət Sosial Müdafiə Fonduna təqdim olunub. Fəxri Fərmanı təqdim edən BSTA-nın prezidenti xanım Korazon de La Paz və qurumun baş katibi Hans Host Konkalevski DSMF-nin İKT-nin tətbiqi ilə səmərəli idarəetmə sahəsindəki fəaliyyətini qeyd ediblər: “Biz ümid edirik ki, bu nəaliyyət Avropanın sosial təminat təşkilatlarının rəhbərlərini daha da ruhlandıracaq”.

Xüsusi vurğulamaq yerinə düşər ki, sosial təminat sahəsində mühüm tədbir olan Avropa Forumunda Azərbaycanın ali mükafata layiq görülməsi ölkəmizdə pensiya islahatlarının uğurla gercəkləşdiriməsinin əyani göstəricisidir.

Əsası ümummilli liderimiz Heydər Əliyev tərəfindən qoyulan və möhtərəm prezidentimiz İlham Əliyevin rəhbərliyi ilə davam etdirilən islahatlar nəticəsində aztəminatlı əhalinin sosial müdafiəsi sahəsində qurulan yeni sistem pensiyaçılar və sığortaolunanlar haqqında avtomatlaşdırılmış müfəssəl məlumatların toplanmasına və idarə olunmasına istiqamətlənib. Hazırda Fondun mərkəzi məlumat bazasında ölkə əhalisinin üçdə biri, yəni 1 308 432 nəfər pensiyaçı və 1 milyon 640 min nəfər sığortaolunan barədə müvafiq məlumatlar toplanıb. Fondun yerli şöbələrində müasir kompüter sistemləri qurulub, “1 işçiyə-1 kompüter” prinsipi gerçəkləşib.

Pensiya və müavinətlərin əhaliyə çatdırılması sahəsində bank infrastrukturundan və elektron hökumət prinsiplərindən səmərəli istifadə olunub. Azərbaycanda pensiyaların 97,4 faizinın ödənişi plastik kartlarla həyata keçirilir ki, bu da dünyada ən şəffaf praktika hesab olunur.

Hazırda pensiyaların təyinatının avtomatlaşdırılması sahəsində işlər yekunlaşmaqdadır. Bu prosesin başa çatdırılması ilə tam şəffaf sığorta-pensiya sisteminin fəaliyyəti təmin olunacaq.

Babək

Paritet.- 2010.- 13-15 mart.- S. 8.