Ölkənin inkişafında sahibkarların rolu artır

İlham Əliyev: "Azərbaycanda sahibkarlıqla bağlı vəziyyət çox yaxşıdır"

Son illər ölkə iqtisadiyyatının inkişafı iqtisadiyyatın bir çox sahələrinin, o cümlədən sahibkarlığın inkişafı üçün geniş imkanlar açıb. Dövlət təərfindən həyata keçirilən uğurlu iqtisadi siyasətin nəticəsində bu sahədə mühüm nailiyyətlər əldə edilib, sahibkarlığın inkişafı sürətlənib, regionlarda yeni müəssisələr yaradılıb, minlərlə yeni iş yerləri açılıb, əhalinin məşğulluq səviyyəsi yüksəlib. Sahibkarların investisiya layihələrinin güzəştli qaydada kreditləşdirilməsi, eləcə də onların maarifləndirilməsi istiqamətində həyata keçirilən tədbirlər də bu məqsədə xidmət edir.

Qeyd edək ki, 1991-ci ildə Azərbaycan öz dövlət müstəqilliyini elan etdikdən sonra ölkənin müstəqillik əldə etməsinin davamı olaraq yeni iqtisadi münasibətlərə keçid, özəl sektorun yaradılması və inkişaf etdirilməsi, bu səbəbdən də ona əlverişli maliyyə dəstəyi verə biləcək milli maliyyə qurumlarının yaradılması zərurətinin əsas vəzifələrdən biri kimi qarşıya çıxdığı bir zamanda 1992-ci il 12 oktyabrda "Azərbaycan Respublikası Sahibkarlığa Kömək Milli Fondunun Əsasnamə"sinin təsdiq edilməsi ilə sahibkarlığa, o cümlədən kiçik və orta biznesə dövlət büdcəsinin vəsaiti hesabına güzəştli kreditlər verəcək ilk maliyyə qurumunun əsası qoyulub və bu qurumun fəaliyyəti ilə bağlı lazımi tədbirlər görülməsi Nazirlər Kabinetinə tapşırılıb.

Prezident İlham Əliyevin "Azərbaycan Respublikasında sahibkarlığın inkişafı ilə bağlı bəzi tədbirlər haqqında" 2007-ci il 30 aprel tarixli fərmanı isə sahibkarlığın inkişafına yeni imkanlar açıb. Sahibkarlıq fəaliyyətinin inkişafına yönəlmiş mühüm tədbirlərdən biri kimi prezidentin "Sahibkarlıq fəaliyyəti subyektlərinin fəaliyyətinin "bir pəncərə" prinsipi üzrə təşkilinin təmin edilməsi tədbirləri haqqında" 2007-ci il 25 oktyabr tarixli sərəncamı ilə 2008-ci il yanvarın 1-dən etibarən vahid dövlət qeydiyyatının tətbiq olunmasını göstərmək olar. Eyni zamanda sahibkarlığın davamlı inkişafının təmin edilməsi məqsədilə "Azərbaycan Respublikasında sahibkarlığın inkişafı dövlət proqramının (2008-2013-cü ilər)" layihəsinin hazırlanması da xüsusi qeyd olunmalıdır. Layihədə sahibkarlığın dövlət tənzimlənmə mexanizmlərinin təkmilləşdirilməsi, sahibkarlığın infrastruktur, informasiya, məsləhət təminatı səviyyəsinin yüksəldilməsi və kadr hazırlığının təkmilləşdirilməsi, sahibkarlığın maliyyə təminatının gücləndirilməsi və digər məsələlər öz əksini tapıb.

Bundan əlavə regionların sosial-iqtisadi inkişafı ilə bağlı həyata keçirilən dövlət proqramlarında sahibkarlıq subyektləri ilə bağlı çox geniş və əhatəli tədbirlər öz əksini tapıb. Həmin proqramlarda nəzərdə tutulmuş tədbirlərin icrası isə sahibkarlıq sektorunda intensivliyin daha da yüksəlməsinə səbəb olub. Bunun nəticəsidir ki, 2004-2009-cu illərdə sahibkarlığa başlayanların sayı 3 dəfə yüksəlib. 2008-ci ilin yanvar ayının 1-dən "bir pəncərə" sisteminin tətbiq olunması isə sahibkarların sayının daha da artmasına əlverişli zəmin yaradıb. Ümumiyyətlə, son 2 ildə 88 mindən çox sahibkarlıq subyekti qeydiyyata alınıb.

Azərbaycan hökumətinin son illərdə sahibkarlara maliyyə dəstəyini gücləndirməsi və sahibkarlığa başlamaq istəyənlərə əlverişli imkanların yaradılması 2009 və 2010-cu ilin ötən dövrü ərzində təqdim olunan investisiya layihələrinin sayının əhəmiyyətli dərəcədə artmasında da özünü göstərir.

Sahibkarlığın inkişafına öz diqqət və qayğısını əsirgəməyən prezident İlham Əliyev bu sahənin inkişafı üçün zəruri olan addımların atılmasının vacibliyini dəfələrlə öz çıxışlarında qeyd edib. Dövlət başçısı aprelin 29-da Salyan rayonuna səfəri zamanı rayon ictimaiyyətinin nümayəndələri ilə görüşündə ölkədə sahibkarlığa dövlət tərəfindən dəstək göstərildiyini xüsusi vurğulayıb: "Regionların sosial-iqtisadi inkişafı Dövlət Proqramının icrası nəticəsində sahibkarların imkanları da artıb. Sahibkarlar da öz tərəflərindən ölkəyə qoyulan investisiyaların həcmini artırırlar. Bu da çox müsbət haldır. Çox şadam ki, bu gün Azərbaycana qoyulan sərmayənin əksəriyyəti yerli mənbələr hesabına təmin edilir. Əvvəlki illərdə biz daha çox xarici investisiyalardan asılı idik. Bu gün bu asılılıq minimum səviyyəyə enibdir. Yəni Azərbaycanda artıq böyük maliyyə imkanlarına malik olan sahibkarlar sinfi yaranıb. Ölkədə yaranan şərait onları da iqtisadiyyata sərmayə qoymağa daha da sövq edir. Bu, çox müsbət haldır ki, Azərbaycanda qazanılan pullar Azərbaycan iqtisadiyyatına, yerli istehsala qoyulur. Əvvəlki illərdə daha çox idxaldan asılı idik. Bu gün isə biz ixrac edirik. İndi xaricə nəinki meyvə-tərəvəzi, digər məhsullar da göndəririk. Ona görə ki, Azərbaycanda sahibkarlıqla bağlı vəziyyət çox yaxşıdır. İldən-ilə həm sahibkarların imkanları artacaq, həm də onların ölkə iqtisadiyyatına qoyduqları vəsaitin həcmi artacaq. Nəzərə alsaq ki, dövlət öz tərəfindən kreditlər, subsidiyalar şəklində maliyyə dəstəyini göstərir, bu sahədə inkişaf uğurlu olacaq".

Qeyd edək ki, Sahibkarlığa Kömək Milli Fondu tərəfindən artıq neçə ildir ki, sahibkarlara güzəştli şərtlərlə kreditlər verilir. Verilən kreditlər isə yeni-yeni istehsal müəssisələrinin yaradılmasına, yeni-yeni iş yerlərinin açılmasına şərait yaradır. Bunun nəticəsində də həm ölkə iqtisadiyyatı inkişaf edir, həm də əhali işlə təmin olunur. Nəzərinizə çatdıraq ki, təkcə keçən il adıçəkilən Fondun vəsaitləri hesabına respublikamızın 55 şəhər və rayonu üzrə 2101 sahibkarlıq subyektinin investisiya layihəsi maliyyələşdirilib və onlara 130 milyon manat məbləğində güzəştli kreditlər verilib. Cari ildə isə fondun vəsaitləri hesabına 2000-dən çox sahibkara kredit verilməsi nəzərdə tutulur. Bundan başqa, dövlətin digər maliyyə mənbələri, eləcə də maliyyə-kredit təşkilatlarının, bankların, Kənd Təsərrüfatı üzrə Kredit Agentliyinin və digər qurumların güzəştli şərtlərlə verilən kreditləri hesabına yüzlərlə sahibkarın maliyyə təminatı yaxşılaşdırılacaq. Beləliklə, bu il ölkəmizdə sahibkarların fəaliyyətinin daha da stimullaşdırılması üçün davamlı tədbirlər həyata keçiriləcək.

B.CAHANDAROV

Paritet.- 2010.- 4-5 may.- S. 3.