Gənclər ölkəmizin nurlu sabahı və gələcəyidir

“Tariximizi unutmayaq” adlı layihəmiz regionlarımızıda əhatə edir”

Son illər Azərbaycan gənclərinin ölkənin ictimai-siyasi həyatında fəal olduğunu və rəhbəri olduqları gənclər təşkilatları tərəfindən intensiv olaraq biri-birindən maraqlı layihələr həyata keçirdiklərini görürük. Bu cür fəal gəncliyin çalışdığı Tələbə Gənclər Təşkilatları da biri-birindən maraqlı layihələr həyata keçirirlər. Belə ki, bu günlərdə “Tariximizi unutmayaq” adlı layihəyə start verən və bundan başqa bir neçə maraqlı layihələr həyata keçirən Azərbaycan Beynəlxalq Universitetinin Tələbə Gənclər Təşkilatının sədri Rahil Şükürovla həmsöhbət olduq və bizi maraqlandıran sualları bir fəal gənc kimi ona ünvanladıq.

-Artıq neçə ildir ki, ictimai fəaliyyətlə məşğulsunuz?

-Mütəmadi olaraq, son iki ildə ictimai fəaliyyətlə məşğulam. Eyni zamanda iştirak etdiyim və aparıcısı olduğum çoxsaylı tədbirlərdə Tələbə Gənclər Təşkilatı adından çıxış edirəm.

-TGT olaraq hansı layihələri həyata keçirmisiniz?

- Biz Bakı Şəhər Gənclər və İdman Baş İdarəsi və Binəqədi rayon Gənclər və İdman İdarəsi və “Təkan”, “İrəli” birlikləri ilə bir çox layihələr həyata keçirmişik. Hətta regionlarla da bağlı layihələrə start vermişik. Artıq regionlarla bağlı olan layihələrin bir hissəsini həyata keçirmişik və bir hissəsini də keçirəcəyik.

-Gənclərlə mütəmadi əməkdaşlıq edirsiniz maraqlı olardı bilmək ki, bu gün gənclər daha çox nə ilə maraqlanır və problemləri nədir?

-Gənc olduğumdan və gənclərlə daim işlədiyimdən deyə bilərəm ki, bu gün gəncləri daha çox sağlam həyat tərzi və mükəmməl təhsil düşündürür.

O ki qaldı gənclərin probleminə, etiraf etmək lazımdır ki, bugünkü gəncliklə bağlı nailiyyətlərimizlə yanaşı, problemlərimizdə vardır. Hazırda bəzi gənclərimiz öz vaxtlarını insan həyatı üçün zərərli olan vərdişlərə sövq edirlər. Məncə bu, hal bu gün gənclərin başlıca problemidir. Regionlarda isə gənclərin əsas problemi asudə vaxtlarının təşkil olunmamasıdır. Bu istiqamətdə regionlardakı gənclərin probleminin həllinə keçirdiyimiz tədbirlərlə kömək etməyə çalışırıq.

-Xarici ölkələrdə yaşayan azərbaycanlı gənclərlə əlaqələriniz varmı?

- Məlumat üçün bildirim ki, təhsil aldığım ali təhsil müəssisəsinin Birləşmiş Ərəb Əmirliklərində və Moskvada filialları mövcuddur. Bunun üçün də xarici tələbələrlə əlaqə saxlamaq bizim üçün çox asandır və bu qarşılıqlı surətdə davam edir.

- Bildiyimə görə, təşkilatınız tərəfindən “Tariximizi unutmayaq “ adlı layihəyə start verilib. Bu layihə çərçivəsində nələr etmisiniz?

- Bəli, artıq biz “ Tariximiz unutmayaq” adlı layihəyə start vermişik. Bu layihəni ilkin olaraq Qəbələ rayonunda F.Həmidov adına Bunud kənd orta məktəbində başlamışıq. Lakin bu layihənin davamı olaraq Qəbələ rayonunun bütün kənd orta məktəbində həyata keçirməyi nəzərdə tutmuşuq.

-TGT gənclərdə vətənpərvərlik ruhunun artırılması üçün hansı işləri görür?

- Mən hərbi xidmətdə olduğum üçün, bu sahəyə marağım daha çoxdur. Bu günün tələbəsi, sabahın əlində silah Vətən keşiyində dayanan əsgəridir. Gənclərin vətənpərvərlik ruhunun yüksəldilməsi ilə bağlı Universitetimizdə bir neçə klublar fəaliyyət göstərir. Ancaq yaxın gələcəkdə bu istiqamətdə də layihələr həyata keçirməyi planlaşdırırıq.

-BŞGİBİ ilə birgə daim bir sıra layihələrdə iştirak etmisiniz?

- Digər dövlət qurumları ilə yanaşı, biz Tələbə Gənclər Təşkilatı olarq BŞGİBİ ilə birgə sıx əməkdaşlıq edirik. Bildiyiniz kimi, 2009-cu il ölkə prezidenti tərəfindən “Uşaq ili” elan olunmuşdu. BŞGİBİ bu fərmanı əsas tutaraq Bakı şəhərinin 11 rayonunda silsilə tədbirlər həyata keçirib. Bu tədbirlərin həyata keçirilməsində mən və həmkarım Aytən xanım yaxından iştirak etmişik. Bundan başqa bir sıra layihələrimizində gerçəkləşməsində Baş idarə bizə dəstək olur.

- Gənclər arasında hansı intellektual oyunlar və yazı müsabiqələri keçirmisiniz?

- Ümummilli lider Heydər Əliyev irsinin gənclər arasında təbliği məqsədi ilə Universitetin fakültələri arasında “ Mən fəxr edirəm ki, Mən Azərbaycanlıyam” adlı inşa müsabiqəsi keçirilib. Bununla yanaşı, qan yaddaşımız olan Xocalı faciəsinə həsr olunmuş “Xocalı harayı”adlı yazı müsabiqəsi keçirilib. Müsabiqələrin nəticələri Binəqədi rayon Gənclər və İdman İdarəsi tərəfindən mükafatlandırılıb.

-Gənclər arasında narkomanlıq və digər neqativ halların aradan qaldırılması ilə bağlı hansı işlər görmüsünüz?

-Gənclər arasında sağlam həyat tərzinin təbliğ edilməsi, hüquq pozuntuları, narkomanlıq və digər neqativ halların aradan qaldırılması məqsədi ilə “Gənclər narkotikə yox deyir” mövzusunda maarifləndirici konfrans keçirilib və bu davamlı şəkildə aparılır.

-Yaradıcı və istedadlı gənclərin aşkar olunması ilə bağlı hansı işləri həyata keçirmi-siniz?

-Bu sahədə uğurlarımız böyükdür. Bizim bugünkü gənclərimiz istər rayon, istər respublikada keçirilən festivalların və yarışların qalibləridirlər. Bu sahə ilə bağlı bizdə xüsusi dərnəklər və klublar fəaliyyət göstərir.

-Bir azərbaycanlı kimi Azərbaycan gənclərini necə görmək istərdiniz?

-Azərbaycan gənclərini, savadlı, öz tarixinə və keçmişinə, adət-ənənələrinə sadiq olan, sağlam və həmişə öz sözünü deyə bilən bir gənc kimi görmək istəyirəm.

Məlumat üçün bildirək ki, Rahil Şükürov Qəbələ rayonunun Bunud kəndində anadan olub. İlk təhsilini Qəbələ rayon F.Həmidov adına Bunud kənd orta məktəbində alıb. Hərbi xidməti bitirdikdən sonra müxtəlif peşə strukturlarında çalışıb. Hazırda Azərbaycan Beynəlxalq Universitetinin tələbəsidir. Respublikamızın ictimai həyatında çox fəallıq göstərir və bu səbəbdən də mükafatlandırılıb. Belə ki, o, 2009-cu Gənclər və İdman Nazirliyi(GİN) tərəfindən təşkil olunmuş “Liderlik Nüfuz və Təşkilat Quruculuğuna giriş” mövzusunda təlimlərdə bütün testlərdən 80 faiz və daha yüksək bal topladığına görə sertifikatla tərtib olunub. Eyni zamanda həmin il GİN və Təxris Olunmuş Hərbiçilər Gənclərin Maarifləndirmə ictimai birliyi ilə birgə təşkil etdiyi gənclərin hərbi Vətənpərvərlik düşərgəsində iştirak etdiyinə görə xüsusi sertifikatla təltif olunub. Ötən il “Dövlət Gənclər siyasətinin həyata keçirilməsində yaxından iştirak etdiyinə və təhsildə fərqləndiyinə görə”, Bakı Şəhər Gənclər və İdman Baş İdarəsi tərəfindən fəxri fərmanla təltif olunub. Eyni zamanda sözügedən idarə tərəfindən keçirilən ilin yekunları ilə bağlı tədbirdə “ Yaxşıların yaxşısı”, “ 2 fevral gənclər günü” münasibəti ilə Bakı şəhərində yerləşən ali təhsil müəssisələrinin Tələbə Gənclər Təşkilatları arasında keçirilən Bolinq turnirində II yer tutduğuna görə diploma layiq görülüb.

Bu il isə R. Şükürov “2 fevral Azərbaycan Gənclər günü” münasibətilə ilə təhsildə əldə etdiyi nailiyyətlərə görə Binəqədi rayon İcra Hakimiyyətinin başçısı tərəfindən fəxri fərmanla təltif olunub. Eyni zamanda o, Gənclər və İdman Nazirliyi və “İrəli” ictimai birliyi tərəfindən Oğuz və Bakı şəhərində təşkil olunmuş “Gənc liderlər üçün qış Universiteti” layihəsində iştirak etdiyinə görə, diplomla təltif olunub. Hazırda “İrəli” və “Təkan” ictimai birliklərinin üzvüdür.

G.ASIFQIZI

Paritet.- 2010.- 6-7 may.- S.9.