Ermənilərin mərhələli planı

Ermənilərə qarşı internetdə sağlam mübarizə aparılır

Hər il türk dünyasını həyəcan içində saxlayan 24 aprel - qondarma erməni soyqırımının il dönümü bu il də bizim üçün yaxşı qurtardı. ABŞ Konqresi Nümayəndələr Palatasının Xarici Əlaqələr Komitəsi və İsveç parlamentində “erməni soyqırımı” nın tanınması ilə bağlı sənədlər qəbul edilsə də, proses irəliləmədi.

Ümumilikdə belə bir fikir hakimdir ki, türklər erməni lobbisinin fəaliyyəti ilə ayaqlaşa bilmir. Ancaq bir qədər araşdırma apardıqda bunun belə olmadığını, əksinə istər türklərin, istərsə də azərilərin fəaliyyətində ildən-ilə güclənmə, təşkilatlanma getdiyini görərik.

Bizim fəaliyyətimiz daha güclüdürsə, bəs niyə ermənilərin fəaliyyəti daha qabarıq şəkildə dünya mediasında yer alır, dünya erməni yalanlarına inanır? Bu sualın cavabı olduqca bəsitdir: Bəzi dövlətlər ermənilərdən istifadə edərək Türkiyə və Azərbaycanı təzyiq altında saxlamaq istəyirlər.

Uzun illərdir baş bəlası olan “erməni məsələsi”nin iç üzünü, məsələnin kökündə nələrin dayandığını göstərən layihələrə böyük ehtiyac var. Bu gün virtual aləmdə-internetdə də böyük ideoloji mübarizənin getdiyini nəzərə alsaq, internet saytların nə qədər vacib olduğunu anlayarıq. Bu baxımdan 1999-cu ildə fəaliyyətə başlayan www.ermenisorunu.gen.tr saytı erməni yalanlarının ortaya çıxarılmasında çox böyük işlər görür.

Dörd - türk, alman, ingilis və fransız dillərində yerləşdirilmiş materiallar zənginliyi və əhatə genişliyi ilə diqqət çəkir. “Erməni məsələsi” mövzusunda yaradılan ilk internet olan www. ermenisorunu.gen.tr eyni zamanda bu məsələ ilə bağlı ən zəngin arxivə malikdir.

Hər gün 35 mindən çox insanın ziyarət etdiyi və materillardan sərbəst şəkildə istifadə etdiyi bu sayt peşəkar insanlar tərəfindən idarə olunur. Saytda istifadə olunmuş bütün faktların birdən çox qaynağı mövcuddur.

Sayt “erməni məsələsi”nin tarixindən tutmuş ardıcıl şəkildə bugünkü duruma qədər bir çox qaranlıq məqama işıq tutur.

Məsələdən ilk olaraq ümumi bəhs edilir, daha sonra erməni planına toxunulur və bu planın kökündə nələrin durduğu oxucuların diqqətinə çatdırılır. Saytda erməni terrorunun məqsədinin qondarma erməni soyqırımı iddialarını və ermənilərin tələbələrini dünya ictimaiyyətinin diqqətinə çatdırmaq olduğu bildirilir. Son hədəfsə “Böyük Ermənistan” xülyasıdır. “Böyük Ermənistan”a gedən yolda ən mühüm addım qondarma iddialarla bağlı ictimai fikir formalaşdırmaq və Türkiyəyə qarşı yönəlmiş kampaniyalar aparmaqdır. Bunun üçün də həyata keçirilməsi qarşıya məqsəd qoyulan planın: tanıtma, təzminat və torpaq alma mərhələlərini özündə ehtiva edir. Yəni qondarma erməni soyqırımı bütün dünyaya terror yolu ilə “tanıdılacaq”, qondarma iddiaları dünya ictimaiyyəti qəbul editdikdən sonra məcburi şəkildə Türkiyə tərəfindən “tanınacaq”, qondarma soyqırıma görə Türkiyədən “təzminat” alınacaq və “Böyük Ermənistan” röyasını gerçəkləşdirmək üçün lazım olan “torpaq” Türkiyədən qoparılacaq.

Saytda soyqırım anlayışının açıqlaması verilir və beynəlxalq hüququn bu məsələni necə tənzimləməsi haqqında hüquqi sənədlərə toxunulur.Eyni zamanda erməni tarixi haqqında məlumatlara yer verilir və “erməni məsələsi”nin ortaya çıxma səbəbləri göstərilir. Osmanlı dövlətinin zəifləməyə başlayıb, misioner məktəbləri açılıb, demək olar ki bütün məsələdə Avropanın müdaxilələrinə məruz qalanda türk-erməni münasibətlərində də soyuqluq yaranmağa başlamışdı. Bəzi dövlətlər Osmanlı imperiyasını bölərək məntəqədəki hədəflərinə çatmaq üçün erməniləri osmanlı cəmiyytindən qoparmağa çalışırdılar.

Xüsusilə Avropanın bəzi böyük dövlətləri islahat adı altında bir yandan Osmanlı dövlətinin daxili işlərinə qarışır, digər yandan da erməniləri Osmanlı dövlətinə qarşı təşkilatlandırırdılar.

İslahat fərmanı ilə müsəlmanlar və qeyri-müsəlmanlar hüquq qarşısında bərabər statusa gətiriləndə fərqliliklərini itirən ermənilər 1877-1878-ci illər Osmanlı-rus müharibəsi nəticəsində Rusiyadan “işğal etdiyi Şərqi Anadolu torpaqlarında çəkilməməsinini, bölgəyə muxtariyyət verilməsini və ya ermənilərin lehinə islahatlar aparılmasını” istəmişdilər. Ermənilərin bu tələbi ruslar tərəfindən qismən qəbul edilir, Osmanlı-rus müharibəsindən sonra imzalanan Yaşılköy və ya Ayastefanos müqaviləsi və daha sonrakı Berlin müqaviləsiylə “erməni problemi” beynəlxalq səviyyəyə qaldırılır. Beləliklə, İngiltərə və Rusiya tərəfindən tarix səhnəsinə çıxarılan “erməni məsələsi” əslində xristian imperializminin Osmanlı dövlətini yıxmaq və bölüşdürmək siyasətinin bir hissəsidir. Qondarma erməni soyqırımı iddiaları və yalanları da bu siyasətin təbliğat maşınıdır.

Türk-erməni münasibətlərinin Səlcuq, Osmanlı, I Dünya Müharibəsi, istiqlal hərbi dövrü haqqında, Sevr və Lozanna müqavilələrində ermənilərin rolu və Lozannadan bu günə qədər olan proseslər haqqında tarixi faktlar- fotoşəkillər, fərmanlar, tarixçilərin qeydlərinə saytda geniş şəkildə yer verilib.Olduqca zəngin fotoarxivi olan saytda, Türkiyə, İngiltərə, Fransa, Rusiya və başqa dövlətlərin arxivlərindəki faktlara istinad olunub.

Sayta Türkiyənin, eləcə də dünyanın bir sıra alimərinin “erməni məsələsi” ilə bağlı kitablardan da bəhs olunur. Həmçinin, saytda Azərbaycanın Ankaradakı səfiri Məmməd Əliyevdən, Türk Tarix Qurumunun keçmiş sədri Yusif Hallaçoğlundan, Maltəpə Universiteti Atatürk Qaydaları və İnqilab Tarixi kafedrasının müəllimi Orxan Çəkicdən, amerikalı yazıçı Samuel Vemsdən, Türk Amerikan İş adamları Assosiasiyasının sədri Zeynalabdin Ərdəmdən, ABŞ-da Türkiyə əleyhinə keçirilən məhkəməni qazanan hüquqşünas Günay Övünçdən alınan müsahibələri oxumaq olar. Saytada ermənilərin Azərbaycanda törətdikləri qətliamlara da yer verilib. 1918-ci ildə erməni quldur dəstələrinin Naxçıvan və Naxçıvan ətrafı məntəqələrdə törətdikləri cinayət hadisələrinə də toxunulub. İki qardaş xalqın erməni terrorundan əziyyət çəkdiyi, türk olduqlarına görə insanların vəhşicəsinə öldürüldüyü vurğulanıb. Ermənilərin İrəvanın Qaradağlı, Uluxanlı, Cəbəçalı, Hacıbayram, Xəbərbeqli və başqa kəndlərində törətdikləri vəhşiliklərə tarixi faklarla toxunulub.

Saytda Azərbaycanın, Türkiyənin və dünyanın bir sıra görkəmli tarixçilərinin əsərlərinə istinad edilib.

Səbuhi ŞƏLDIYEV

Paritet.- 2010.- 13-14 may.- S.11.