Azərbaycan Bizim Evimizdir

Gülsel Səfərova: “Azərbaycanda ilk dəfə etnik icmaların gənclər təşkilatlarını bir araya gətirərək onlar arasında geniş ictimai əlaqəni təmin edən Koordinasiya Şurası yaratmışıq”

Tarixən Şərqlə Qərbin dialoq və təmas nöqtəsi olan Azərbaycan çoxmillətliliyi, sosio-mədəni tolerantlığı ilə fərqlənib. Azərbaycanda məskunlaşan müxtəlif dinə, etnik qruplara məxsus olan millətlər burada sərbəst, azad və mehriban qonşuluq şəraitində yaşayıblar. Bu gün Azərbaycanda mövcud olan gürcü, yəhudi, rus, ukraynalı, tatar, yunan və s. etnik icmalar məhz bu tarixi tolerantlığın, xoş münasibətin təzahürü olaraq öz varlığını, milli adət-ənənələrini, dinini və dilini nəinki qoruyub saxlayıb, hətta inkişaf etdiriblər. Son illərsə, Azərbaycana yeni etnik icmaların nümayəndələri (çinli, ingilis, amerikan, nigeriyalı, norveçli, yapon, alman və s.) köç edirlər. Bunun müəyyən siyasi, iqtisadi səbəbləri ilə bərabər ən başlıca amil Azərbaycanda hökm sürən dini, milli, sosio-mədəni tolerantlıq, insan hüquq və azadlıqlarının meyarı olan demokratik dövlət quruluşudur. Qeyd olunmalıdır ki, istənilən etnik icmanın ən fəal, inteqrasiyaya daha meyilli təbəqəsi olan gənclərin mədəni təşkilatları bir-biri ilə əlaqəsiz şəkildə fəaliyyət göstərirlər.

Məhz bu mədəni koordinasiya ehtiyacından irəli gələrək Azərbaycan Gənclərinin Avropaya İnteqrasiyası Təşkilatı (AGAT) 2009-cu ildə Qafqazda ilk dəfə olaraq ölkəmizdə Milli İcmaların Gənclər Təşkilatlarının Koordinasiya Şurasını yaradıb. Şuraya rus, tatar, ukraynalı, yəhudi, yunan, türk, polyak icmaları daxildir. Xatırladaq ki, AGAT 2007-ci il may ayında təsis edilib dövlət qeydiyyatından keçib.

AGAT-ın sədri Gülsel Səfərova “Paritet”ə açıqlamasında dedi ki, Koordinasiya Şurasının yaradılması milli icmaların, ilk öncə isə gənclərin inteqrasiyasındakı boşluğu aradan qaldıran platforma rolunu oynayır. G.Səfərova bildirdi ki, əsas məqsədləri etnik icmaların gənclər təşkilatlarının qarşılıqlı əməkdaşlıqlarının təmin olunması, onların Azərbaycanın mədəni mühitinə inteqrasiyasını daha da surətləndirməkdir: “Azərbaycanda müxtəlif etnik icmaların bir sıra mədəni mərkəz və təşkilatları mövcuddur. Lakin mərkəz və təşkilatların fəaliyyəti əsasən avtonom xarakter daşıyırdı. Onların bir-biri ilə münasibəti demək olar ki, yox idi. Bu səbəbdən biz Azərbaycanda ilk dəfə icmaların gənclər təşkilatlarını bir araya gətirərək onlar arasında geniş ictimai əlaqəni təmin edən Koordinasiya Şurası yaratmışıq”.

AGAT sədri Koordinasiya Şurasının əvvəlcədən müəyyən edilmiş təqvim günlərinə əsasən ayda bir dəfə tam tərkibli iclası keçirilir: “Koordinasiya Şurasının tərkibi üç aydan bir milli icma nümayəndələrinin seçilməsi ilə yeniləşir. AGAT isə, bu şuranın daimi üzvi olaraq fəaliyyət göstərir. Koordinasiya Şurasında milli icmalarla bağlı mədəni tədbirlər planı, müştərək layihələr müzakirə edilərək həyata keçirilməsi üzərində iş aparırlar. Eyni zamanda gənclər təşkilatları təmsil etdikləri etnik icmaların tarixi, mədəni, müasir sosial həyatı və nailiyyətləri barədə bir-biri ilə informasiya mübadiləsi aparmaq, bu məlumatları Azərbaycan cəmiyyətinə çatdırmaq imkanlarına malikdirlər”.

Onun sözlərinə görə Koordinasiya Şurasının heyəti milli icma nümayəndələrinin gənclər təşkilatlarının və ya bu funksiyanı həyata keçirən səlahiyyətli nümayəndələrin bir neçəsindən və AGAT-dan təşkil olunub.

AGAT xalqımızın əlamətdar günlərində Koordinasiya Şurasına daxil olan təşkilatlar üzvləri ilə mütəmadi tədbirlər də keçirir. Burada da məqsəd onlara Azərbaycanla bağlı həqiqətləri çatdırmaqdır. AGAT-a Azərbaycan Ombudsman Aparatı da öz köməkliyini əsirgəmir. Bu tədbirlərdən biri kimi AGAT-ın “2 fevral gənclər günü” münasibəti ilə bu il 1 fevralda təşkil etdiyi ombudsman Elmira xanım Süleymanova və Azərbaycanda Yaşayan Milli İcma və Xalqlarının Gənclər Təşkilatlarının rəhbərləri ilə görüşünü qeyd etmək olar: “Görüş zamanı icma sədrləri təqdimat etdikdən sonra gələcək fəaliyyət üçün təkliflər irəli sürdü. İcma sədrləri qeyd etdilər ki, Koordinasiya Şurasının hazırlanmış fəaliyyətləri həyata keçirməsi, yeni layihələrin hazırlanması üçün ciddi maneələr mövcuddur. “Xalqımız üçün çox mühüm olan bu imkanları həyata keçirə biləcək bir mexanizmin-Koordinasiya Şurasının mərkəzinin olmaması fəaliyyətdə keçilməz və ağır maneələr yaradır”. Bunları nəzərə alaraq Azərbaycanda yaşayan rus, ukraynalı, türk, tatar, yəhudi və yunan icmaları gənclər təşkilatlarının sədrləri Ombudsmana Koordinasiya Şurasının Mərkəzinin yaradılmasını təklif etdi”.

AGAT sədrinin sözlərinə görə, həmin tədbirdə Ombudsman E.Süleymanova da maraqlı təkliflər irəli sürüb. O bildirib ki, Milli İcma Gənclər Təşkilatlarının Koordinasiya Şurası ilə birlikdə “İnsan Hüquqları Məktəbini” yaratmaq olar. Bundan başqa KŞ ilə birlikdə Sülh naminə dinlərarası körpülərin qurulması və Azərbaycanın regionlarında icmalarla tədbir həyata keçirmək və s. təlkiflər verib.

Koordinasiya Şurası Yəhudi Mədəniyyət Mərkəzində Xocalı Soyqırımının 18-ci ildönümü ilə əlaqədar da 25 fevral, 2010-cu il tarixində “Faciəmiz” adlı anım mərasimini keçirib. Tədbiri giriş sözü ilə açan “Hillel” Beynəlxalq Yəhudi Tələbə-Gənclər Təşkilatının Bakı nümayəndəliyinin rəhbəri İlona Əzimbəyova Xocalı soyqırımının yalnız Azərbaycan xalqına qarşı deyil, bütün bəşəriyyətə olan cinayət kimi dəyərləndirib. Daha sonra çıxış edən Gülsel Səfərova 1 dəqiqəlik hüzn sükutundan sonra soyqırımın tarixi, ağır nəticələri və onun beynəlxalq hüquqi şərhini verib. Azərbaycan Rus Gəncləri Assosasiyasının mətbuat katibi Oksana Qrubaçova bu hüznü paylaşaraq rus xalqının yaxın keçmişdə yaşadığı Budyonovsk və “Nord Ost” faciələri barədə məlumatlar verib. Türk Tələbələri Şurasının sədri Yasin Dikman 1915-ci ildə türk xalqının Çanaqqala savaşında göstərdiyi qəhrəmanlıq və 250 min şəhidləri barədə söhbət açıb. O, Xocalı soyqırımi ilə Çanaqqala şəhidlərinin oxşar taleyi yəni, işğalçılara qarşı mübarizə qurbanları olduqlarını bildirib. Tədbirin ev sahibəliyini edən “Hillel” Yəhudi Gənclər Təşkilatının sədri İlona Əzimbəyova yəhudi xalqının faşizmin irticası dövründəki “Holokost” soyqırımından geniş bəhs etməklə bərabər, beynəlxalq status qazanmış faciə ilə Xocalı soyqırımı arasında paralellər aparıb. O, hər iki qətliamın bəşəriyyətə qarşı olan ən ağır soyqırımlardan biri kimi dəyərləndirib. Daha sonra “Hillel” təşkilatı tərəfindən hazırlanmış Xocalı və “Xolaxos” soyqırımını əlaqəli şəkildə əks etdirən video çarx nümayiş etdirildi. Çıxışının sonunda İlona Əzimbəyova Holokost və Xocalı soyqırımı qurbanlarının əziz xatirəsinə 2 ədəd şam yandırdı. Çıxış üçün söz alan Koordinasiya Şurasının koordinatoru Nizami Vəliyev yaradıldığı qısa müddətdə Azərbaycanda tolerantlığın, azərbaycançılıq ideyalarının möhkəmlənməsi istiqamətində Şuranın gördüyü işlərdən söz açıb.

Koordinasiya Şurası müxtəlif icma nümayəndələrinin veteranlarının iştirakı ilə İkinci Dünya müharibəsində qələbənin 65 illiyi ilə əlaqədar mayın 7-də mədəni tədbir keçirib.

AGAT-ın İdarə heyətinin rəhbəri Nərgiz Eyvazova isə qeyd etdi ki, bu təşkilat Azərbaycanda yaşayan müxtəlif dini və etnik icmalarla, eyni zamanda gənclərlə bağlı həyata keçirilən dövlət siyasətinə öz tövfəsini verib. Belə ki, AGAT Gənclər və İdman Nazirliyinin birgə Azərbaycanda yaşayan milli icma və xalqlarının yaradıcı gənclərinin ümumilli lider Heydər Əliyev irsinin öyrənilməsi və təbliğinə həsr olunmuş “FENOMEN” adlı bədii müsabiqə keçirib. Həmsözhbətimiz layihə çərçivəsində Azərbaycanda yaşayan milli icma və xalqların gənclər təşkilatları ilə əlaqənin saxlanıldığını bildirdi. N.Eyvazov layihə çərçivəsində 4 istiqamətdə- ən yaxşı rəsm, şeir, hekayə və əl işləri müsabiqəsinin keçirildiyini qeyd etdi: “Ən yaxşı rəsm üzrə “Hillel” yəhudi gənclər təşkilatı, ən yaxşı şeirə görə “Arqo” yunan gənclər təşkilatı, ən yaxşı hekayəyə görə “Tuqan-tel” tatar gənclər təşkilatı, ən yaxşı əl işinə görə “Poloniya- Azərbaycan” polyak gənclər təşkilatı sertifikat və mükafatlar aldılar. Müsabiqənin rəsm, hekayə, əl işi və şeir üzrə qalibləri Milli Elmlər Akademiyasının professor heyəti tərəfindən müəyyənləşdirilib. Hər bir icma və fərdi olaraq birinci yer sahibləri qiymətli hədiyyələrlə mükafatlandırılaraq sertifikatlarla təltif olunublar”.

AGAT-ın İdarə heyətinin rəhbərinin fikrincə, layihənin unikallığını və vacibliyini əks etdirən əsas amil Heydər Əliyev irsinin öyrənilməsi və təbliği ilə bağlı bu formatda fəaliyyətin ilk dəfə keçirilməsi olub: “Layihə nəticəsində ulu öndər Heydər Əliyevin irsi Azərbaycan cəmiyyətində, xüsusən də etnik icmalar arasında daha güclü təbliğ olunmaqla bərabər əsası qoyulmuş Azərbaycançılıq ideologiyası Azərbaycanda yaşayan milli icma və xalqlar arasında işıqlandırılıb”.

Fuad Hüseynzadə

Paritet.- 2010.- 13-19 noyabr.- S. 9.