Gənclərdə turizm sektoruna maraq artıb

Bu il ATİ-yə qəbul olan 320 tələbənin 16-sı 600-dən çox bal toplayıb

Son illər ölkəmizdə gənclər arasında təhsilə maraq bir qədər artıb. Bu il ali təhsil ocaqlarına daxil olan gənclər arasında yüksək bal toplayanların sayı çoxluq təşkil edir. Belə ki, ölkənin ali məktəbləri sırasına 2006-cı ildə qoşulsa da, fəaliyyət göstərdiyi qısa müddət ərzində özünə layiqli nüfuz və reytinq qazanan Azərbaycan Turizm İnstitutuna(ATİ) yeni dərs ilində qəbul olaraq tələbə adını qazanan 320 nəfərdən 16-sı qəbul imtahanlarında 600-dən çox bal toplayıb. ATİ-nin yüksək bal toplayan tələbələrinin fikirlərini öyrənmək və gələcək planları haqqında ətraflı məlumat əldə etmək üçün onlarla həmsöhbət olduq.

İlk həmsöhbətim 645 balla ATİ-nin tələbəsi adını qazanan İsrail Buttayev orta təhsilini Balakən rayonunda alıb:”Hələ orta məktəbdə oxuyanda sinif yoldaşlarımla hansı ali məktəbdə oxuyacağımızla bağlı müzakirələr aparırdıq. Mən həmişə birinci Azərbaycan Turizm İnstitutunun adını çəkirdim. Çünki burada yüksək səviyyədə təhsil verildiyini eşitmişdim. Bir də onu bilirdim ki, ATİ-dən xaricə getmək imkanları var. Mənimsə ən böyük arzularımdan biri təhsilimi xarici ölkələrdən birində davam etdirməkdir”. İ.Buttayev qeyd etdi ki, ölkəmizdə son illər turizm sektoruna diqqət və qayğı artıb:” Biri-birindən möhtəşəm hotellər tikilir, eyni zamanda tez-tez ölkəmizdə konfranslar keçirilir və beynəlxalq turizm sərgiləri təşkil olunur. Mən də istəyirəm ki, turizm sahəsi üzrə daha mükəmməl təhsil alım və xarici ölkələrdə olum və bu sahədə təcrübəni mənimsəyim. Azərbaycanda turizm mərkəzlərindən birində fəaliyyətimi davam etdirim və xaricdə qazandığım təcrübəni ölkəmizdə tətbiq edim”.

650 balla iqtisadiyyatın təşkili və idarəedilməsi fakültəsinə daxil olan Baba Babayevin dediyinə görə Bakının Xətai rayonunda təhsil alıb və Azərbaycan Turizm İnstitutunda təhsil almaq onun arzusu olub: “Ölkəmizdə turizm sahəsinin perspektivli olması və bu sahədə mövcud kadr çatışmazlığı problemindən xəbərdaram. Düşünürəm ki, səhv seçim etməmişəm. Əsas məqsədim yaxşı bir mütəxəssis kimi yetişmək və bu sahədə ölkəmə hər hansı bir töhfə verməkdir”. B.Babayev üçün turizm sektorunda hansı istiqamət üzrə çalışmağın fərqi yoxdur:”Əsas odur ki, seçdiyi sahə üzrə əsl mütəxəssis olum və bu sahədə bilik, bacarığımı daha da təkmilləşdirim və Azərbaycana xidmət edim. Onun üçün imtahanın elə bir qorxusu da olmayıb: “İmtahan cavabları çıxanda bildim ki, bir neçə sualın cavabını səhv yazmışam. Bununla belə, topladığım 650 bal mənə istədiyim ixtisası seçməyə imkan verirdi”.

Samir Şahbazlı orta məktəbi Sumqayıt şəhərində bitirib və builki qəbul imtahanından 619 bal toplayıb. Onun dediyinə görə ixtisas seçimi edəndə də birinci ATİ-nin adını yazıb: “Gün-gündən ölkəmizdə turizm şirkətlərinin və hotellərin sayı artır. Bu sahənin perspektivli və maraqlı bir sahə olduğunu düşünürəm. Ona görə də qarşıdakı dörd illik bakalavr, iki illik də magistratura təhsilində yaxşı bir mütəxəssis kimi yetişməyi və turizm şirkətlərindən birində çalışmağı məqsəd olaraq qarşıma qoymuşam”. Samirin digər həmkarlarından fərqli olaraq maraqlı bir arzusu da var:” Artıq inkişaf dövrünü yaşayan turizm sahəsində nailiyyətlərin günü-gündən artması bizi sevindirir və həm də həvəsləndirir. Mənim də arzum odur ki, yaxşı bir mütəxəssis kimi formalaşım və gələcəkdə hər hansı bir turizm şirkətinin əsasını qoyum. Azərbaycana çoxlu sayda turist axınını təşkil edim”.

Növbəti həmsöhbətim Taleh Vahabzadə instituta 615 balla daxil olub. Taleh deyir ki, turizm sahəsi Azərbaycanda yenicə inkişaf edir. Bu baxımdan da indi ölkəmizdə bu sahədə kadr çatışmazlığı mövcuddur. Onun sözlərinə görə, ali məktəbi bitirəndən sonra onun üçün iş tapmaq çətin olmayacaq. Azərbaycanın Dağlıq Qarabağ bölgəsinin turizm imkanlarının çox geniş olduğunu deyən Talehin ən böyük arzusu torpaqlarımız işğaldan azad olunandan sonra orada turizm mütəxəssisi kimi çalışmaqdır.

Qəbul imtahanlarında 610 bal toplayan Rəşad Ramazanlı Qəbələ rayonunda doğulub böyüyüb, orta təhsilini də elə orda alıb. Bəlkə elə Rəşadın turizm sahəsinə olan marağının səbəbi də budur. Çünki özünün də dediyi kimi, Qəbələ Azərbaycanın turizm baxımından ən çox inkişaf etmiş rayonlarından biridir. Yaxşı mütəxəssis olmaq Rəşadın da böyük arzusudur: “Ümumiyyətlə, mən fikirləşirəm ki, yaxşı mütəxəssis olmadan heç bir sahədə irəli getmək, nailiyyət əldə etmək mümkün deyil. Ona görə də ali təhsil almaq üçün Turizm İnstitutunu seçdim. Burada dərslərin Avropa təhsil sisteminə uyğun keçildiyini bilirəm”.

Seymur Xanəhmədlini ATİ-yə gətirən səbəb isə bu ali təhsil müəssisəsinin Avstriyanın Krems Universiteti ilə əməkdaşlığı və institutun məzunlarının eyni zamanda iki diplom ala bilməsidir. 605 balla ATİ-nin tələbəsi olan Seymur deyir ki, buranı həm də valideynlərinin məsləhəti ilə seçib. O da digər yoldaşları kimi turizm üzrə mütəxəssis olub ölkəmizdə çalışmaq niyyətindədir.

Məlumat üçün bildirək ki, əsas məqsədi turizm sektoru üçün ixtisaslı kadr hazırlamaq olan ATİ ən yaxşı tələbələrini Türkiyədə, İsraildə, Yunanıstanda, İsveçrədə, Portuqaliyada və Almaniyada təcrübə keçməyə göndərir. Bu il isə sözügedən təhsil müəssisənin tələbələri təcrübə keçmək üçün Kanada və ABŞ-a da göndərilməsi nəzərdə tutulub.

GÜNAY

Paritet.- 2010.- 12-13 oktyabr.-S. 11.