16-cı Beynəlxalq İnşaat Sərgisinin açılışı olub

Sərgidə 25 ölkədən 260 şirkət iştirak edir

Dünən “BakuBuild” Beynəlxalq İnşaat Sərgisinin açılışı oldu. “BakuBuild” sərgisi ilə paralel “8-ci Xəzər Beynəlxalq Mebel, İnteryer və Dizayn” və 2-ci Beynəlxalq “İstilik, ventilyasiya, kondisiyalaşdırma, su təchizatı, santexnika və ətraf mühitin mühafizəsi üzrə texnologiyalar və üzgüçülük hovuzu” sərgiləri də ictimaiyyətə təqdim olundu.

Artıq dörd ildir ki, “BakuBuild” sərgisi ardıcıl olaraq Böyük Britaniyanın “ITE Group” şirkəti və onun Qafqazdakı tərəfdaşı “Iteca Caspian” şirkəti sərginin təşkilatçıları qismində çıxış edirlər. Qeyd edək ki, “BakuBuild” sərgisi Fövqəladə Hallar Nazirliyi, Dövlət Şəhərsalma və Arxitektura Komitəsi, Azərbaycan Respublikası Sahibkarlar (İşəgötürənlər) Təşkilatlarının Milli Konfederasiyası, eləcə də Memarlar İttifaqının dəstəyi ilə keçirilir.

Şəhərsalma və Arxitektura Komitəsinin sədr müavini Dövlətxan Dövlətxanov bildirdi ki, qonşu ölkələrlə müqayisədə artıq Azərbaycana investisiyaların cəlb edilməsində heç bir problem yoxdur. Problem böyük investisiyaların effektiv istifadəsindədir. .

ASK rəhbəri Məmməd Musayev bildirdi ki, Azərbaycanda bu gün çox gözəl biznes mühiti yaradılıb ki, bu da sahibkarlığın inkişafına imkan yaradır:”Konfederasiyanın əsas vəzifəsi neft və qeyri-neft sektorunun inkişafı, ölkənin ixrac potensialının artırılmasıdır. Bu vəzifənin yerinə yetirilməsində bu cür sərgilər böyük rol oynayır. Ümumiyyətlə, sərgilər bazar iqtisadiyyatına girişin açarıdır”.

Qeyd edək ki, sözügedən sərgidə 25 ölkədən 260 şirkət iştirak edir ki, bunların da arasında Azərbaycan, Yunanıstan, Polşa, Rusiya, Türkiyə və başqaları vardır. Sərgidə ilk dəfə iştirak edən debütant ölkələr - Portuqaliya və Latviyanı bir neçə şirkət təmsil edir. “BakuBuild” sərgisində fərdi stendlərlə bərabər, 6 birgə ekspozisiya da təqdim olunur, bunların da arasında Almaniya, Finlandiya, İran, Litva, İtaliya, Ukrayna vardır.

Sərginin ekspozisiyası müxtəlif çeşiddə çoxlu inşaat və bəzək materialları və texnologiyalarını əhatə edir. Bura tikinti materialları, bəzək və üzlük materialları, pəncərə istehsalı üçün avadanlıqlar, beton və sement istehsalı üzrə texnologiyalar, tikinti avadanlıqları, ixtisaslaşdırılmış texnika, sahələrin abadlaşdırılması, arxitektura və landşaftın layihələşdirilməsi, kimyəvi inşaat məhsullarının geniş spektri, ağac emalı üçün avadanlıqlar, istehsal xətləri və alətlər, santexnika, keramika və s. daxildir. Açıq meydançada Almaniya, Türkiyə, Koreya, Böyük Britaniya, Rusiya, İtaliya və digər ölkələrin böyük çeşiddə inşaat texnikası və avadanlıqları nümayiş olunur.

Bu il ilk dəfə olaraq, “BakuBuild” sərgisi ilə yanaşı keçirilən “Aqua-Therm Baku” - beynəlxalq “İstilik, ventilyasiya, kondisiyalaşdırma, su təchizatı, santexnika və ətraf mühitin mühafizəsi üzrə texnologiyalar” sərgisində dünyanın 12 ölkəsindən, o cümlədən Azərbaycan, Almaniya, Danimarka, İran, İtaliya, İsveçrə və digər ölkələrdən olan 50-dən çox şirkət artıq şirkət məhsullarını nümayiş etdirdi.

Sərgidə məhsularını nümayiş etdirən şirkətlərdən biri də Bakıda fəaliyyət göstərən “Kale Kilit” şirkətidir. Şirkətin satış meneceri Fuad Rzayev bildirdi ki, onlar Azərbaycanda sözügedən şirkətin rəsmi distribyutoru olaraq 1998-ci ildən fəaliyyət göstərirlər. “Tez bir zamanda genişlənən firmanız, bu sektorda liderliyi əldə etməyi bacarıb.Müştəri məmnuniyyətinə və keyfiyyətinə önəm verən firmamız yuxarıda qeyd olunan fəaliyyət sahələri üzrə də xidmət göstərir”. İstehsal etdikləri məhsullara gəldikdə isə F. Rzayev bunları dedi:”Şirkətimiz cam balkon sisteminin sifarişi,hazırlanması, quraşdırılması, cam balkon profil və aksesuarlarının satışı və sifarişi və gətirilməsi kimi məsələlər önəm verir”.

“TİMSPORT” idman avadanlıqları şirkəti administratoru Ramin Bayramov xatırlatdı ki, şirkətləri 19 ildən artıqdır ki, idman komplekslərinin avadanlıqlaşdırılması sahəsində ixtisaslaşıb:” Çoxillik təcrübə və peşəkarlıq sayəsində “TİMSPORT” hazırda Azərbaycanda idman sferasında fəaliyyət göstərən ən böyük şirkətdir. Bizim partnyorlar arasında dünyanın ən tanınmış idman avadanlıqları istehsalçıları var”.R.Bayramov bildirdi ki, “TİMSPORT” müxtəlif avadanlıqlar və xidmətlər təklif edir:” İdman komplekslərinin dizayn və smeta layihələrinin hazırlanması, İdman meydançaları və zallarının yer örtükləri, idman meydançalarının hasarları və işıqlandırma sistemləri, futbol,futzal, basketbol, voleybol, tennis, badminton və s. oyunlar üçün avadanlıqlar, tribuna oturacaqları, elektron tablo və monitorlar, qoruyucu torlar və s. avadanlıqlar təklif edir. Şirkətinin peşəkar mütəxəssisləri və montaj qrupları avadanlıqların operativ və kefiyyətli quraşdırılmasını təmin edir”.

Türkiyədə fəaliyyət göstərən “Çağsan” şirkətinin direktoru Dəniz Çağlayan bildirdi ki , şirkətləri 1980- ci ildən fəaliyyətdədir:”Şirkətimizin fəaliyyət sahələri alüminiumdan olan professional nərdivanları, körpü sistemləri, ev, ofis üçün nərdivanları satışa çıxarmaqdır. Məhsullarımızın kefiyyətinə də xüsusi diqqət yetiririk. Belə ki, sektordakı inkişafları və dünyadakı yenilikləri yaxından izləyən firmamız, xidmət etdiyi sektorlardakı müştərilərinin ehtiyaclarını diqqətə alaraq hərəkət etməkdədir. Bunun nəticəsi olaraq prioritetimiz bütünlüklə keyfiyyətdir. Keyfiyyət bizim üçün müştərilərimizin gözləmələridir. Bu gözləmələrin hər vaxt qarşılanacağı bizim zəmanətimiz altında olacaq”.

Sərgidə “Santral” mebel firmasının biri-birindən maraqlı mebel dəstləri ilə bəzədilmiş stendi hər kəsin marağına səbəb oldu. Sözügedən şirkətin təmsilçisi qeyd etdi ki, mebellər Türkiyədə istehsal olunur və Azərbaycana gətirilir:”Əsasən tik ağacından dizayn edilmiş, həsir şəklində toxunmuş, bağ şəraitində istirahət üçün rahat döşəkçələrlə təchiz edilib. Onların bəziləri diyircəkli mexanizmlə təchiz edildiyi üçün bir yerdən digər yerə asanlıqla hərəkət etdirmək mümkündür. Məlumat üçün bildirək ki, Beynəlxalq İnşaat Sərgisi 23 oktyabr tarixinədək davam edəcək.

GÜNAY

Paritet.- 2010.- 21-22 oktyabr.- S. 11.