Ordumuzun döyüş hazırlığı durmadan artır

Son yeddi il ərzində dövlət büdcəsindən hərbiyyəyə ayrılan xərclər 14 dəfəyədək artırılıb

Azərbaycanda ordu quruculuğu prosesinin geniş vüsət alması artıq heç kimdə şübhə doğurmur. Silahlı Qüvvələr quruculuğunun ölkə Prezidenti, Ali Baş Komandan cənab İlham Əliyev tərəfindən prioritet elan olunması bu sahədə həyata keçirilən kompleks tədbirlərə rəvac vermiş, xalqın milli maraqlarının təmin edilməsi sahəsində kifayət qədər strateji rol oynamışdır. Şahidi olduğumuz son hadisələr, o cümlədən, ordumuzla bağlı həyata keçirilən silsilə kütləvi tədbirlər müvafiq yöndə ciddi irəliləyişlərin əldə olunmasından xəbər verir.

Təkcə onu demək kifayətdir ki, son yeddi il ərzində dövlət büdcəsindən hərbiyyəyə ayrılan xərclər 14 dəfəyədək artırılıb. 18 iyun 2010-cu il tarixdə Milli Məclisin növbədənkənar sessiyasında isə müdafiə və təhlükəsizlik xərclərinin daha 400 milyon manat artırılması müvafiq sahəyə göstərilən diqqətin bundan sonra da sistemli və ardıcıl xarakter daşıyacağına əsaslı sübutdur. Bununla da cari ilin bütün hərbi xərcləri 2 milyard 150 milyon dollaradək artıb, təcavüzkar Ermənistan Respublikasının hətta dövlət büdcəsini belə arxada qoymuşdur. Milli Məclisin məlum sessiyasından bir neçə gün sonra, daha dəqiq desək, 23 iyun 2010-cu il tarixdə “Azərbaycan Respublikasının Müdafiə Nazirliyinin həqiqi hərbi xidmət hərbi qulluqçularının sosial müdafiəsinin gücləndirilməsi barədə” ölkə başçısının imzaladığı Sərəncama əsasən xidməti mənzilə və mənzil şəraitinin yaxşılaşdırılmasına ehtiyacı olan hərbi qulluqçular üçün xidməti yaşayış evlərinin tikintisinə 5 milyon manat vəsait ayrılmışdır. Bu sırada ölkə başçısının şəxsi tapşırığı ilə müxtəlif hərbi qarnizonlarda bir sıra sosial, mədəni və məişət obyektləri ilə birlikdə inşa olunan beş hərbi şəhərcik kompleksi hərbi qulluqçularımız üçün kifayət qədər ciddi etimad və qayğıdır. Tikintisi yaxın vaxtlarda başa çatdırılacaq, ümumilikdə 627 mənzilə malik yaşayış binaları da ömrünü hərb sənətinə həsr edən gizir və zabitlərimiz üçün dövlətin növbəti hədiyyəsidir. 20 sentyabr 2010-cu il tarixdə ölkə başçısının imzaladığı növbəti Sərəncama əsasən, Müdafiə Nazirliyi, o cümlədən, digər güc strukturlarının dövlət büdcəsindən maliyyələşdirilən qurumlarında çalışan hərbi qulluqçuların, xüsusi rütbəsi olan əməkdaşların və dövlət qulluqçusu olmayan mülki işçilərin aylıq vəzifə maaşları sentyabrın 1-dən orta hesabla 10 faiz artırılmışdır ki, bu da hərbçilərimizin sosial müdafiəsinin gücləndirilməsi istiqamətində dövlət rəhbərliyinin həyata keçirdiyi növbəti dəyərli tədbirlərdəndir, hansı ki, hərbi qulluqçularımız bu Sərəncamı dövlətin onlara göstərdiyi diqqət və qayğısı kimi dəyərləndirmiş, böyük minnətdarlıq hissi ilə qarşılayıblar.

Ümumiyyətlə, ordu quruculuğu sahəsində hazırda planlı şəkildə kompleks tədbirlər həyata keçirilir. Başqa sözlə desək, bu gün Azərbaycanda təkcə hərbiçilərin sosial vəziyyətinin, maddi rifah halının yaxşılaşdırılması sahəsində işlər aparılmır, eyni zamanda ordunun yüksək döyüş hazırlığına yiyələnməsi üçün kifayət qədər ciddi tədbirlər həyata keçirilir. Məsələn, 2009-cu ilin sonuna Silahlı Qüvvələrin döyüş hazırlığını artırmaq məqsədilə təxminən 1 milyard ABŞ dollarından artıq dəyərdə modern silah və texnikanın hərbçilərimizin ixtiyarına verilməsi dediklərimizə əyani sübutdur. Bu il aprelin 23-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Müdafiə Nazirliyində keçirilən və ordu quruculuğu məsələlərinə həsr olunmuş müşavirədə müvafiq sahə ilə bağlı görülən işlər haqqında ölkə ictimaiyyətinə ətraflı məlumat verilmişdir. Məlum müşavirədə ordumuzun yüksək döyüş hazırlığına malik olduğunu və hərbi qulluqçularımızın ruh yüksəkliyini xüsusi vurğulayan Azərbaycan Prezidenti cənab İlham Əliyev ölkənin öz müdafiə qüdrətini daim artırmasını Azərbaycan xalqının təbii haqqı kimi dəyərləndirmiş, Azərbaycan ordusunu bütün cəhətlərdən Ermənistan ordusundan daha güclü və peşəkar bir silahlı qurum kimi xarakterizə etmişdir. Onu xüsusi vurğulamışdır ki, Silahlı Qüvvələr quruculuğuna aid xərclər bundan sonra da sistemli şəkildə artırılacaqdır. Ölkə başçısının məzmunlu və geniş nitqindən sonra Azərbaycan Respublikasının Müdafiə naziri general-polkovnik Səfər Əbiyev çıxış edərək son illər ordumuzun əldə etdiyi uğurlardan danışmış, ordunun döyüş qabiliyyətinin daha da artırılması, əməliyyat işləri üzrə hazırlığın gücləndirilməsi, idarəetmənin təkmilləşdirilməsi ilə bağlı həyata keçirilən tədbirlərdən, o cümlədən tədris ilində birlik və birləşmələrin 70-dək komanda-qərargah təlimlərindən ətraflı məlumat vermişdir. Xüsusi qeyd etmişdir ki, bu təlimlərə Silahlı Qüvvələrin müxtəlif qoşun birləşmələri cəlb olunmuş və ən müasir tələbələrə cavab verən simulyator və kompyuter şəbəkələrindən fəal istifadə olunmuşdur.

Bu il Silahlı Qüvvələr günü ərəfəsində iyunun 24-də keçirilən Müdafiə Nazirliyinin, Dövlət Sərhəd Xidmətinin və Daxili İşlər Nazirliyi Daxili Qoşunlarının birləşmə və hissələrinin irimiqyaslı birgə əməliyyat-taktiki təlimi yuxarıda deyilənlərin arxasında konkret faktların dayandığını bir daha göstərdi. Bu təlimi izləyən Ali Baş Komandan cənab İlham Əliyev birgə səylərlə doğma torpaqlarımızın işğalçılardan təmizlənməsinin əsas məqsəd olduğunu xüsusilə vurğuladı və təlim zamanı qarşıya qoyulan bütün vəzifələrin icra edildiyini, Silahlı Qüvvələrimizin yüksək peşəkarlıq nümayiş etdirdiyini bildirdi.

Əlbəttə, əldə olunan uğurlarda mühüm rol oynayan ən əsas məsələlərdən biri də Silahlı Qüvvələr quruculuğu ilə bağlı həyata keçirilən tədbirlərdə fikir və əməl birliyinin daim ön planda dayanmasıdır. Bu gün inamla deyə bilərik ki, Müdafiə Nazirliyinin rəhbərliyi ölkə başçısının qarşıya qoyduğu bütün vəzifələri layiqincə yerinə yetirir, yüksək döyüş hazırlığına nail olmaqla dövlətin və xalqın etimadını doğruldur.

Orduya ayrılan maddi vəsaitin səmərəli xərclənməsi də günün ən vacib tələbi kimi Müdafiə Nazirliyi rəhbərliyinin daim diqqət mərkəzində dayanan əsas faktlardandır. Bu sırada Azərbaycan ordusunun ən müasir və modern silah-sursat və hərbi texnikalarla təmin olunmasına xüsusi diqqət yetirilir. Məqsəd ordumuzu qısa zaman kəsiyində dünyanın ən qabaqcıl və aparıcı güc strukturuna çevirməkdir.

Təəssüf ki, orduya aid xərclərin artırılması ilə bağlı müzakirələrin başladığı bütün dövrlərdə olduğu kimi bugünlərdə də bir sıra müxalif yönlü KİV-lərin vasitəsilə dövriyyəyə həqiqətə uyğun gəlməyən bir sıra yalançı informasiyalar buraxılır, bir növ Silahlı Qüvvələrimizə qarşı qara piyar əməliyyatlarına start verilir. Ötən həftənin mətbuatla bağlı siması bunu bir daha təsdiq etdi. Bütün bunlar, şübhə yoxdur ki, dövlətlə xalqın fikir və əməl birliyini sarsıtmaq, Azərbaycan Respublikasının ən böyük güc strukturu sayılan ordumuzu nüfuzdan salmaq məqsədi daşıyır. Bir mərkəzdən tərtib olunan, o cümlədən müxtəlif qeyri-peşəkar qəzetlərə ötürülən və bu zaman heç olmasa peşə prinsipləri xatirinə mətni belə azacıq da olsa redaktə olunmayan yazılara başqa cür nə ad vermək olar. Taleyüklü məsələlərin həllində Azərbaycan hökumətinin ciddi irəliləyişlərə nail olduğu bir vaxtda bu cür çirkin kampaniyalara qoşulanlar düşmən dəyirmanına su tökdüklərini bilməlidirlər.

Bütün bunlarla bərabər, dövlətin ordu ilə bağlı siyasəti ən yaxın gələcəkdə Silahlı Qüvvələrimizin daha böyük uğurlara imza atacağından xəbər verir. Nazirlər Kabinetinin oktyabrın 20-də keçirilən iclasında ölkə Prezidenti, Silahlı Qüvvələrin Ali Baş Komandanı cənab İlham Əliyev bir daha ordu quruculuğu məsələsinə toxunaraq gələn il üçün hərbi xərclərin 2 milyard 500 milyon manat səviyyəsində olacağını, bununla da, müvafiq sahəyə 3 milyard dollardan çox vəsait ayrılacağını bildirərək demişdir: “ Ermənistandan fərqli olaraq, iqtisadiyyatımızı, ordumuzu Azərbaycan xalqının iradəsi və zəhməti hesabına qururuq. Xalqımızın zəhməti hesabına qazanılmış gəlirlər Azərbaycan üçün ən vacib olan ordu quruculuğu sahəsinə yönəldilir. Biz gələcəkdə də bu işləri davam etdirəcəyik.” Azərbaycan Prezidentinin fikirlərini böyük ruh yüksəkliyi ilə qarşılayan ordu mənsubları öz üzərlərinə düşən vəzifələri dərindən dərk edir, onlara göstərilən inam və etimadı doğrultmağa çalışırlar. Bu, onların dövlət və xalq qarşısında ən böyük məsuliyyətidir.

İbrahim RÜSTƏMOV,

əməkdar jurnalist

Paritet.- 2010.-26-27 oktyabr.- S. 9.