Həvva Məmmədova Dağlıq Qarabağla bağlı film çəkib

35 dəqiqəlik sənədli filmdə xarici ekspertlər Dağlıq Qarabağ və Azərbaycanla bağlı öz fikirlərini səsləndirib

“Azərbaycanın mövcudluğu ermənilərin məğlubiyyətidir. Azərbaycanın mövcudluğu işğal olunmuş ərazilərin azad olunacağına dəlalətdir. Və bu zaman Azərbaycanın başında duran sərkərdə və bu sərkərdənin arxasında dayanan böyük Azərbaycan xalqı var”. Bu fikirlər millət vəkili Həvva Məmmədovanın müəllifliyi ilə yeni çəkilmiş “Dağlıq Qarabağ: həqiqətlər, yalanlar...” filmindəndir.

Avqustun 31-də Azərbaycan Prezidenti yanında Strateji Araşdırmalar Mərkəzində (SAM) bu filmin təqdimat mərasimi keçirildi. Filmin təqdimatı da ağrılı günə-Qubadlı rayonunun işğal gününə təsadüf edirdi. Buna görə də ilk olaraq tədbir iştirakçıları Qarabağ uğrunda qurban gedən şəhidlərin ruhunu 1 dəqiqəlik sükutla yad etdilər. Sonra filmin nümayişi oldu. Qeyd edək ki, hər sözü və kadrı erməni yalan və terrorunu ifşa edən film tədbir iştirakçılarında bir ağrı, nifrət yaratmışdı.

Tədbiri açan SAM-ın direktoru Elxan Nuriyev Dağlıq Qarabağ münaqişəsi ilə bağlı Azərbaycan həqiqətlərinin dünyaya çatdırılmasında təşkilatın qarşısında duran vəziflərə toxundu.

O, qeyd etdi ki, ermənilər tərəfindən azərbaycanlılara qarşı törədilən soyqırım həqiqətləri bütün janrlarda dünya ictimaiyyətinə çatdırılmalıdır: “Dünya ictimaiyyəti bilməlidir ki, erməni sindromu mövcuddur və ona qarşı ciddi mübarizə aparılmalıdır. Məhz bu fonda bu gün izləyəcəyimiz film buna bariz nümunə ola bilər. Filmdə ermənilərin həqiqi siması ortaya qoyulub. Ermənilərin tarixi boyu törətdikləri vəhşiliklər tam mənzərəli ifadə olunub. Azərbaycan və dünya seyircisi bunu rəğbətlə qarşılayacaq”.

H. Məmmədova çıxış edərək qeyd etdi ki, 35 dəqiqəlik sənədli filmdə ilk dəfə olaraq xarici ekspertlər (ABŞ, Rusiya, Türkiyə və Qazaxıstan) Dağlıq Qarabağ və Azərbaycanla bağlı öz fikirlərini səsləndirib. H.Məmmədova filmin ingilis dilinə tərcümə olunduğunu və digər dillərə də tərcümə olunacağını dedi. Filimdə Milli Təhlükəsizlik Nazirlyinin arxivinə məxsus kadrlardan istifadə olunub.

Filmin məsləhətçisi, deputat Rəbiyyət Aslanova dedi ki, Həvva xanım bir qarabağlı, bir millət vəkili və bir vətəndaş kimi öz məsuliyyətini dərk edərək bu filmi çəkib: “Bu onun haqqı idi. Bu onun vətən, torpaq, bu ağrı qarşısında bir borcu idi ki, onu gercəkləşdirdi”.

Onun sözlərinə görə, filmdə göstərilən faktların heç biri sovet dovründə tətbiq olunan tarix dərslərində qeyd olunmamışdı: “Bu günki film Azərbaycan tarixşünaslığında yeni bir mərhələnin başlanğıcıdır. Ona görə də bu gün Azərbaycanın tarixini yenidən yazanlara minnətdarlığımı bildirirəm”.

R.Aslanova dünya ictimaiyyətinin, beynəlxalq təşkilatların Dağlıq Qarabağ münaqişəsinin həllində maraqlı olmadıqlarını söylədi: “Onlar Dağlıq Qarabağla bağlı bugünkü status-kvonun dəyişdirilməsində maraqlı deyillər. Dünya sanki kordur, kardır”. Millət vəkilinin fikrincə, 20-ci əsr insanı 21-ci əsr insanından daha xoşbəxt idi, çünki 20 əsr insanı münaqişələrin beynəlxalq təşkilatlar tərəfindən həll olunacağına inanırdı.

Millət vəkili Qənirə Paşayeva bildirdi ki, Həvva xanım əlindən gələni edir ki, vətəni, milləti qarşısında olan borcunu yerinə yetirsin: “Bu günki filmi də Həvva xanımın həmin o keyfiyyətinin göstəricisidir”. Q. Paşayeva hesab edir ki, hər bir insan özündən başlamaldır: “Əgər biz danışırıqsa Qarabağ həqiqətlərini belə təbliğ etmək lazımdır, dünyaya belə çatdırmaq lazımdır. Bunu deyən insanlar heç nə etmirsə və hesab edirsə bunu başqaları etməlidir, o zaman düzgün fikirləşmirlər. Həvva xanım da o adamlardandır ki, özündən başlayaraq Qarabağ məsələsinə yanaşır. Mən nə edə bilərəm? Mənim gücüm nəyə çatır? Öz gücü və qüvvəsi istiqamətində bu işləri görür”.

Bu filmin gələcək nəsillərə bir mesaj olduğunu deyən millət vəkili bildirdi ki, bu baxımdan hər kəs əlindən gələni etməldir: “Cənab Prezident də bu fikri azərbaycanlılara vaxtaşırı söyləyir ki, biz müdafiədən hücuma keçməliyik”.

O təklif etdi ki, film Azərbaycanın xarici ölkələrdəki səfirlikləri vasitəsilə Azərbaycan diasporuna çatdırılsın: “50 milyon azərbaycanlı bu filmi görməli, onu digər insanlar arasında yaymalıdır”.

Prezident yanında Dövlət İdarəçilik Akademiyasının müəllimi Musa Quluzadənin sözlərinə görə, ermənilər öz yalançı dərdlərini dünyaya çoxdan tanıdıblar və bu barədə 28 mindən artıq kitab yazıb müxtəlif dillərə tərcümə ediblər: “Bu mənada da rus alimi İvan Petruşevski deyib ki, erməni xalqı öz tarixindən daha çox, öz tarixçilərinə borcludur. Yəni erməni tarixçiləri olmayan hadisələri, olmayan torpaqları öz adlarına çıxarıblar və dünya ictimaiyyətini də buna inandırıblar. İndi bu inamı, erməni yalanlarını onların qəlbindən qoparmaq üçün belə sənədli filmlərin böyük əhəmiyyəti var. Atalar deyir ki, yüz eşitməkdənsə bir görmək yaxşıdır. Ona görə belə filmləri alqışlamaq lazımdır. Ermənilərin yalanı bitib-tükənmir. Dünyanın gözü kordur, yalanı eşitməkdə isə kardır”. Tədbirin digər çıxışçıları da film haqqında öz fikirlərini bildirdilər.

FUAD

Paritet.- 2010.- 2-3 sentyabr.- S. 5.