“Bu gün səhnədə dörd populyar dini qrup var”

“Məqsədimiz xalqımızın mənəvi islahı yoluna çalışmaqdır”

“Nur” ilahilər qrupu 2003-cü ildə Bakı şəhərində yaradılıb. Bu qrup fəaliyyətə başladığı ilk dövrlərdən yaradıcılıq axtarışında olub. Hər il vətənimizin müxtəlif şəhər və rayonlarında keçirilən tədbir və mərasimlərdə uğurla iştirak edib. Üç nəfərdən ibarət qrupun rəhbəri Rahim Dərvişdir. Qrupun digər üzvləri isə Hacı Əlzaman Əliyev və Samir Süleymanovdur.

- Necə oldu ki, belə bir qrup yaratmaq qərarına gəldniz?

Rahim:

- Bismillahir-rəhmanir-rəhim! Biz uşaqlıq çağımızdan üçümüzdə, xüsusən də Hacı Əlzamanla mən kiçik yaşlarımızdan dini məclislərdə mərsiyə və növhələr demişik. Təbii ki, tədricən bu baxımdan inkişaf etmişik, üstəlik də İslam Universitetində təhsil almışıq. Ona görə sözümüz, amalımız bir olub və qərara gəlmişik ki, belə bir qrup yaradaq. İlk vaxtlar müsiqisiz oxuyurduq, sonra zamanın tələbinə uyğun olaraq, necə deyərlər, halal yolla, oynaq musiqi olmadan fəaliyyətimizi davam etdirmişik.

-İslamın musiqi ilə bağlı müəyyən qadağaları var. Bəs, İslamın icazə verdiyi musiqi hansıdır?

Əlzaman:

-Dinimzə görə, kef və əyləncə xarakteri daşımayan musiqiləri ifa etməyin, eləcə də dinləməyin heç bir eybi yoxdur. Yəni musiqi düşündürən, həzin, tərbiyəvi və məlahətli olmalı, sözlər və ahəngi bir-birini tamamlamalıdır. Mümkündür ki, ana barəsində musiqi olsun. Amma o musiqi hamını şənləndirib rəqs etmək səviyyəsinə çatdırmasın. Buna İslam dini icazə vermir.

Qadınların kişi məclislərində oxumasına İslam icazə vermir. Qadınların yalnız qadın məclisində oxumasına icazə verilir. Çünki qadının müəyyən bir səs telləri var ki, kişini özünə cəlb edə bilər.

-Demək, sizin mahnılarda rəqs etməyə yer yoxdur?

Rahim:

- Bəziləri var ki, Allah (c.c.), Məhəmməd Peyəğəmbər (s) haqqında mahnı ifa edirlər. Görürsən ki, dini mahnı olsa da bunu oynaq ritmdə oxuyurlar. Bu da haramdır. Hansısa musiqidə bir balaca ritmi çox etsək, ona oxşayar, amma əksinə biz onun ritmini aşağı salırıq ki, oynaqlıqdan tamam uzaq olsun. Çünki musiqidə hər bir şeyi təyin edən ritmdir.

Əlzaman:

- Məsələn, Sami Yusif estrada müğənnisidir. Özü də Azərbaycana gələrkən etiraf etdi ki, sırf ilahi musiqilər üzərində çalışan insan deyil. Amma onun bəzi dini musiqilərində bayağılıq diqqətə çarpır. Ona görə biz mediada çıxış edərək onun bu cür mahnılarına qarşı etiraz etmişdik. Çünki, əgər O, Allahdan, (c.c.) Peyğəmbərdən (s) oxuyursa bu tərzdə oxumaq haramdır. (Deyilənə görə, Sami Yusifin “Allahu Allah” mahnısını barlarda oxuyub-oynayanlar da var-H.F)

-Bu işdə özünüzə rəqib bildikləriniz varmı?

Rahim:

- Sağlam rəqabət hər işdə olmaldır. Hazırda dini qruplar çoxdur. Amma bu gün səhnədə 4 populyar dini qrup var. Bu qrupların arasında sağlam rəqabət gedir. Bu da təbiidir. Hər birinin də məqsədi fəaliyyət göstərib inkişaf etməkdir. Hətta bir-birimizlə məsləhətləşmələr də aparırıq. Məsələn, “Muminun” qrupu ilə fikirləşirik ki, necə edib birgə layihə həyata keçirək.

- Sizin qrupun bu vaxta kimi ən çox sevilən mahnısı hansıdır?

Rahim:

- Müxtəlif ilahilərimiz var ki, biz onlarla gündəlikdəyik. Konsertlərdə və toylarda elə musqilərimiz var ki, çox sələnir. Məsələn, “Haradasan” mahnısı buna misal ola bilər. Bu mahnının klipi də çəkilmişdi və televiziya kanallarında da dəfələrlə yayımlanıb. Təbiidir ki, hər il biz yeni-yeni mahnılar da ifa edirik. Deyərdim ki, həm ibadət əhlini, həm də namaz qılmayanları bu mahnı özünə daha çox cəlb edib. Bununla yanaşı 2010-cu ildə efir mahnısı səviyyəsindən enməyən Həzrəti Məhəmməd Peyğəmbərə (s) həsr olunmuş yeni “Məhəmməd” mahnımız da var. Biz onu efirdə bir dəfə oxumuşuq. O da sevilir, hara getsək onu da oxumağımızı istəyirlər. Belə çıxır ki, bizim 2010-cu ilin mahnısı “Məhəmməd” mahnısıdır.

Əlzaman:

- “Nur” qrupunun əsas məqsədi xalqımızın mənəvi islahı yoluna çalışmaqdır. Eyni zamanda öz Allahına (c.c.), Peyğəmbərinə və Əhli-beytinə məhəbbətini daha da artırmaqdır. Ona görə də “Haradasan” mahnısını bir neçə il əvvəl ifa etsək də,yenə də könülləri fəth etdiyinə görə hər dəfə bizdən onun ifasını istəyirlər. Çünki mənəviyyata aid olan bir mahnıdır.

Rahim:

- Bizim yolumuz dini musiqidir. Həm azərbaycanlı, həm vətənpərvər, həm bir müsəlman və Əhli-beyt davamçısı olaraq borcumuzdur ki, öz vətənimizə, ümumiyyətlə dünya müsəlmanlarına xidmət edək. Çalışırıq ki, gücümüz çatan qədər bizim üzərimizə düşəni insanlara çatdıraq.

Əlzaman:

- Xüsusilə də, vətənpərvərlik mövzusunda bizim bir neçə musiqimiz var. İki il bundan əvvəlki albomumuzda vətən barəsində iki mahnımız yer almışdı. Onu xalqın qarşında sevə-sevə ifa edirik. Xüsusən də “Azərbaycan” mahnısının sözləri xalqı düşündürür,eyni zamanda ermənilərin mənfur niyyətini ortaya qoyur.

- Ölkədən kənarda keçirilən tədbirlərdə də iştirak etmisinizmi?

Rahim:

- Əsasən iki ölkədə; Gürcüstanda və İranda bizim tədbirlərimiz olub. İstər toy şənlikləri, istərsə də dini tədbirlərdə iştirak etmişik. Ümuiyyətlə, bir neçə ölklərə dəvətlər almışıq. İnşallah, Ukrayna və Türkiyəyə səfərlərimiz gözlənilir.

-Toy üçün Bakıdan, yoxsa bölgələrdən daha çox dəvətlər alırsınız?

Rahim:

-Demək olar ki, bütün regionlarda toylarda olmuşuq. Düzdür, Bakıda fəaliyyətimiz daha genişdir.

Əlzaman:

- İldən ilə çox fərq var. İnsan bir şeyin qarşında məlumatsız olsa təbiidir ki, ona soyuq münasibət göstərəcək. Mümkündür ki, ikrah hissi də onda oyadır. Amma indi illər keçdikcə geniş məlumat verdikcə görürlər ki, İslam fanatiklik deyil. Biz mədh, tərif edirik,yəni Allahın həmdü-sənası və tərifi gedir orada. Xalqın mənəviyyatı oyanır və güclənir. Toy məclisində başqa ancaq mənəvi atmosfer olur. Biz toy şənliklərində əsasən xalqımıza nəyin yasaq və xeyrli olması barədə məlumat veririk. Hətta, şərabın ziyanlı olması haqda da qəsidələr oxuyuruq. Torpaq, vətən, ana və atanın dəyərli olması barədə klassik və müasir şairlərimizin qəsidələrindən istifadə edirik.

- İfa etdiyiniz mahnıları bəstələmək üçün musiqi təhsili ilə bərabər dini təhsil də olmalıdır, işlədiyiniz xüsusi bəstəkarlar varmı?

Rahim:

- Bizim musiqilərin 80 faizinin bəstəkarı və aranjimançısı, demək olar ki, özümüzük. Bəlkə də müraciət etsək, əldə edərik və kimsə də bizə təqdim etsə alarıq. Amma hələ ki bunu özümüz edirik.

Əlzaman:

- Bəstəkar əgər ilahi zəmində Peyğəmbər (s) ailəsinə həsr olunan mənəvi xəzinələrimizə bəstə yaratmaq istəyirsə, o sözlərin mənasına varmalıdır. Bəstəkarın Allaha məhəbbəti yoxdursa, ateistdirsə,təbii ki, onun musiqisi xalqın qəlbində yer tutmayacaq və sevilməyəcək. Ateizm dövründə bir çox bəstəkarların musiqiləri olub. Öz zamanına görə çoxunun da xoşuna gəlib,amma solub getdilər. Çünki mənəviyyata xidmət göstərməyiblər. Niyə Nizami, Nəsimi, Füzuli qalıb? Ona görə ki, mənəviyyatdan qaynaqlanan şeirlər yazıblar və dünya durduqca da bu əsərlər yaşayacaqlar. Yaradanımız əbədiyaşardır. Onun barəsində bəstələnən sözlər də əbədi yaşayacaq.

-Belə başa düşdüm ki, sizin musiqi müəlliminiz olmayıb. Siz elə özünüz-özünüzün müəllimi olmusunuz?

Əlzaman:

- Bizim ilk növbədə Quran müəllimlərimiz olub. Musiqi ayrı bir şeydir, mahnı ayrı bir şey. Musiqi təbii doğan səslərdir. Yarpağın, dalğanın, küləyin öz musiqisi var. Bunlar təbii musiqilərdir. Mahnı insanın musiqi ahənglərini qarışdırıb yaratdığı əsərdir. Bir var Yaradının ona verdiyi səs, bir də insanın özünün düzəltdiyi səs. İndi Allahın (c.c.) bizə verdiyi səs özü başdan ayağa muğamdır. Azərbaycan muğamatında olan “Segah” Quran qiraətində olan “Segah”la eynidir. Amma başqa muğamlar deyəndə adlar fərqlənir. Məsələn, “Bayatı-Şiraz” dediyimiz muğam Quran qiraətində “Nəhavənd” adlanır. Adlar fəqlidir, amma kök eynidir, yəni muğamatdır. Ona görə də hər nə oxusaq, muğam üzərindədir. Bizim ilahi mahnıların əksəriyyəti “Şur” üzərindədir. “Segah” və “Çahargah” üzərində də var. Amma “Şur” muğamatı daha çox zəngin muğamdır. Həm də onda ifa etmək daha asandır.

Rahim:

- Təbii ki bizim musiqilərimizdə də muğam muğamdır, not notdur, musiqi musiqidir. Yəni Azərbaycan milli muğamı nə üzərində qurulursa, bizim musiqlər də bu formadadır.

-Bu vaxta kimi neçə albomunuz işıq üzü görüb?

Rahim:

- Rəsmi albom şəklində 4 albomumuz var. İlk albomumuz “Eşq əhli” adlanır və 2004-cü ildə çıxıb. İkinci isə 2006-cı ildə “Yoluna canlar fəda” eyni adlı klip və albom işıq üzü gördü. Üçüncü albom Peyğəmbərimizə (s) həsr olunan “Könlüm arzular səni” adı ilə 2008-ci ildə 10 musiqi ilə çıxdı. 2009-cu ildə isə sırf musiqisiz “Qardaş Əbəlfəz” adıyla dinləyicilərimizə təqdim etdik. İndiyə qədər isə 11 klipimiz var. Bunun 3-4-ü efirdə nümayiş olunub. Qalanlarsa disk şəklində satış mərkəzlərinə vermişik. Qeyd edim ki, “Nur” ilahilər qrupunun www.nurqrupu.com adlı saytı və eləcə də wap xidməti fəaliyyət göstərir. Hər ikisində də bizim ifa etdiyimiz mahnı, növhə, mərsiyə, rövzə, şeir, qəzəl və video kliplər yerləşdirilib.

- Mümkünsə həyata keçirdiyiniz layihələr və gələcək planlarınız haqda da məlumat verərdiniz?

Əlzaman:

- Biz milli və dini əlamətdar günlərdə maddi imkanımıza uyğun olaraq tədbirlər keçiririk. Qeyd edim ki, Xocalı soyqırımı günün də müstəqillik tariximizdə ilk dəfə olaraq “Muminun”, “Kövsər” və bizim qrupun bir birgə dəstəyi ilə “Aktyorlar Evi”ndə “Ravilərin görüşü” adlı şəbeh-tamaşa səhnəyə qoyuldu. Burada Xocalı soyqırımı Kərbəla faciəsinin davamı kimi göstərilmişdi. Bu tamaşa, izləyicilərin hədsiz marağına və rəğbətinə səbəb oldu. Eyni zamanda səhnə əsəri çox böyük hüznlə, bəzən hıçqırıqlarla ağlama səsləriylə, bəzən hönkürtülü və bəzən də həzin ağlamaqlarla müşayiət olundu.

Rahim:

- Mütəmadi olaraq qocalar evində və kimsəsiz uşaqlar üçün xeyriyyə konsertləri də təşkil edirik. Yalnız musiqi oxumuruq. Bir neçə dostlarımızla məsləhətləşib gedirik imkanımız çatan qədər ehsanat paylayırıq. Həm köməklik göstəririk, həm də aktyorlar vasitəsilə onların könüllərini şad edirik. Məsələn, iyunun 27-də Qafqaz Müsəlmanları İdarəsinin sədri Allahşükür Paşazadənin dəstəyi ilə Bakı Əyləncə Mərkəzində kimsəsiz uşaqların əl işlərindən ibarət sərgi keçirdik. Həmin gün Həzrəti Əlinin (ə) doğum gününə təsadüf edirdi. Əli (ə) həmişə kimsəsiz uşaqlara yardım etdiyindən ona “Yetimlərin atası” deyərdilər deyə, biz də çalışdıq ki, bununla əlaqələndirək. Həm öz albomlarımızı, həm də uşaqların əl işlərini təqdim etdik.

Yaradıcılıqla bağlı müxtəlif yeni planlarımız var. İnşəallah, nəzərdə tutduğumuz tədbirlərimizi gələcəkdə reallaşdırmağa çalışacağıq.

FUAD

Paritet.- 2010.- 28-29 sentyabr.- S. 12.