Ağac üzərində “Quran” ayələrini yazan rəssam

Vüqar Məmmədov: ”Məni incəsənətə gətirən yol döyüş sənəti ilə məşğul olduğum müddətdən başladı”

Hər bir xalqın böyüklüyü onun zəngin mədəniyyəti və həmin mədəniyyəti qoruyub inkişaf etdirənlərin bacarığı ilə ölçülür. Belə ki, qədim tarixə malik olan Azərbaycan mədəniyyəti tarix boyu qorunub saxlanılıb. Bu gün dəyərli sənət nümunələri yaradan sənət adamlarıda onlardan bəhrələnir. Müasir və qədimliyi özündə birləşdirən dəyərli sənət nümunələri yaradırlar. Öz əsərlərində bu meyarları əsas götürən, bir sıra yerli və beynəlxalq sərgilərdə iştirak edən belə sənət adamlarından biri də Vüqar Məmmədovdur. Biz də onunla görüşüb maraqlı sənət dünyası haqqında danışdıq. O, bizimlə söhbətə həyat və sənət yolundan danışmaqla başladı.

-1969-cu ildə Ordubadda anadan olmuşam. Orta təhsilimi 1984-cü ildə Bakı şəhərində yerləşən 45 saylı orta məktəbdə almışam. 1988-ci il A.Zeynallı adına Bakı Musiqi Texnikumunu, 1998-ci ildə isə Bakı Musiqi Akademiyasını bitirmişəm. Dağlıq Qarabağda erməni hərbi birləşmələrinə qarşı gedən döyüşlərdə iştirak etmişəm. Eyni zamanda Çin döyüş sənəti “UŞU” və Yapon döyüş sənəti “CİU-CİTSU” üzrə məşqçi müəlliməm. “Mevlana” uşaq musiqi qrupunun rəhbəriyəm. 1997-ci ildən bədii xəttatlıqla, 2004-cü ildən isə ağac üzərində “Quran” ayələrini yazaraq oyulması ilə məşğul oluram. Hazırda Bakı şəhəri 28 nömrəli Uşaq Musiqi Məktəbində tədris işləri üzrə müdir müavini vəzifəsində çalışıram və yaradıcılıq işimi də davam etdirirəm.

-Sizi möcüzəli və qeyri-adi sənət aləminə gətirən yol hardan başladı?

- Məni incəsənətə gətirən yol döyüş sənəti ilə məşğul olduğum müddətdən başladı. 1990-cı ildə SSRİ-nin müxtəlif şəhərlərində (Bişkek, Aluşta, Moskva) Pekin UŞU akademiyasının professorları tərəfindən keçirilən praktik seminarlarda uğurla iştirak edərək məşqçi diplomuna layiq görülmüşəm. Pekin UŞU Akademiyasında təhsil almaq üçün Pr.Li Çzi Şen tərəfindən dəvət almışdım. Bu dəvət Azərbaycanın Müharibə dövrünə düşdüyünə görə imtina etməli olmuşam.

Praktik seminarda eyni zamanda Çin kalliqrafiyası ilə yaxından maraqlanmışam və bu təsirdən 7 il sonra möcüzəvi surətdə bədii xəttatlıqla məşğul olmuşam. (Möcüzəvi dedikdə, bütün çəkdiyim yazı-şəkilləri əyani surətdə, oyaqkən yatmış vəziyyətimdə göstərilib 3 il müddətində onları kağıza köçürmüşəm).

-İlk işiniz nə olub və daha çox hansı materiallardan istifadə edirsiniz?

-Ağac üzərində ilk işim “Allah və Bismillah “ yazılmış iş olub. Daha çox ağac üzərində Quran ayələrini yazıram. İşlərimdə əsasən qoz ağacından istifadə edirəm. Bu ağacın əldə olunmasında böyük çətinlik çəkirəm. Ümumiyyətlə, bu işin hər addımı böyük çətinliklərdən keçir. Məsələn, emalatxanam yoxdur. Ev şəraitində də hər zaman çalışmaq olmur. İş prosesində texniki alətlərdən və ən çox da xüsusi iskənələrdən istifadə olunur. Bu işin əsas mexanizmi isə Allah kəlamına ehtiram və bu işə isə böyük bir sevgi ilə yanaşmaqdır.

-Hansı yerli və beynəlxalq sərgilərdə iştirak etmisiniz?

- Çoxsaylı yerli və beynəlxalq sərgilərdə iştirak etmişəm. Belə ki, 2004-cü ilin noyabr ayında Təbriz şəhərində keçirilən sərgidə bədii xəttatlığa aid 4 işim nümayiş etdirilib. 2006-cı ildə Tehranda keçirilən 14-cü Beynəlxalq Quran Sərgisində Azərbaycanı təmsil etmişəm, 9 işim nümayiş etdirilib. 2-ci dəfə daha kamil işlərlə 2009-cu ildə Tehranda keçirilən 17-ci Beynəlxalq Quran Sərgisində iştirak etmişəm. 2007-ci ilin yanvar ayında Təbriz şəhərində keçirilən Beynəlxalq Kalliqrafiya Festivalında bir neçə bədii xəttatlığa aid işim nümayiş etdirilib. Ümumilikdə İranda 4 sərgidə təmsil olunmuşam. Sərgilər yüksək dərəcədə İslam Mədəniyyətini təmsil edilərək keçirilib. Bu sərgilərdə sənətimi inkişaf etdirmək üçün müxtəlif ölkələrdən çoxlu sayda dostlar qazanmağıma səbəb olub.

2009-cu il aprel ayının 18-də “İslam Mədəniyyəti Paytaxtı” çərçivəsində Bakı şəhəri Qobustan qoruğunda 16 işim nümayiş etdirilib. Eyni zamanda 2009-cu il aprelin 27-də Qala qoruğunda 16 işim nümayiş etdirilib. 2009-cu il mayın 6-da Bakı şəhəri Turizm İnstitutunda 17 işim nümayiş etdirilib. Ötən ilin iyun ayının 16-da İranın Azərbaycandakı Mədəniyyət Mərkəzinin Bakı da təşkil etdiyi tədbirdə 16 işim nümayiş etdirilib. 2009-cu il oktyabr ayının 5-də Əl Oyunlari İdman Sarayında keçirilən Beynəlxalq Kulinariya festivalında təşkil olunan sərgidə 12 işim nümayiş etdirilib. Həmin il noyabrın 3-də Mədəniyyət və Turizm Nazirliyinin Muzey Mərkəzində təşkil olunan sərgisində 13 işim nümayiş etdirilib. Həmçinin noyabrın 13-də Muzey Mərkəzində təşkil olunan I Respublika Dekorativ-tətbiqi sənət sergisində 20 işim sərgilənib və I dərəcəli diploma layiq görülmüşəm. 2009-cu il dekabr ayının 4-də Muzey Mərkəzində təşkil olunan “Ağ-qara”sərgisində 3 işim nümayiş etdirilib. Dekabrın 9-da Turizm İnstitutunda 34 işim nümayiş etdirilib. Həmin ayın 22-də Muzey Mərkəzində təşkil olunan I Ümumrespublika dekorativ-tətbiqi sənət festivalının yekun sergisində 4 işim nümayiş etdirilib. Bundan əlavə 2009-cu ilin avqust ayında Misirin Mədəniyyət Nazirliyindən müraciətimə əsasən fərdi sərgimin keçirilməsinə dair dəvət almışdım. Maddi vəziyyətimin pis olduğuna görə bu sərgidən imtina edəsi oldum. Bu sərgi üçün yalnız yol xərci istənilirdi. Eyni zamanda əlaqədar təşkilatlara müraciət etdim və heç bir cavab ala bilmədim.

-Azərbaycanda və ya hansısa xarici ölkə sərgi salonlarında işləriniz saxlanırmı?

- Əlbəttə, müxtəlif sərgi salonlarında var. Məsələn, hazırda Tehranda və Türkiyədə müxtəlif sərgi salonlarında işlərim saxlanılır.

-Hazrıda neçə işiniz var?

-Hazırda qoz ağacı üzərində 17 iş və kağız üzərində 33 işim var.Ağac üzərindəki işlərin mövzusu Quran ayələri və hədislərdir. Kağız üzərindəki işlərin mövzusu təsəvvüf və irfandır. İndi də bu istiqamətdə yaradıcılığımı davam etdirirəm.

Günay

Paritet.- 2010.- 19-20 yanvar.- S. 12.