Qələmə sarılan ömür

Çoxdan idi ki, müasir Azərbaycan jurnalistikasının istedadlı nümayəndələrindən olan Ağaddin Babayev haqqında yazmaq məndə bir ehtiyaca çevrilmişdi. Biləndə ki, bu il onun anadan olmasının 55, yaradıcılığının 40 illiyidir, bu istək məndə daha da gücləndi. Əlimə qələm alanda bilmirdim haradan və necə başlayım. Bu, bəlkə də yaxından tanıdığım insan haqqında ilk dəfə söhbət açmaq məsuliyyətinin ağırlığından irəli gəlirdi.

Öncə onu bildirim ki, Ağaddin Babayev 1956-cı ildə Lənkəran rayonunun Şağlaser kəndində dünyaya göz açıb. Hələ orta məktəbdə oxuyarkən jurnalistikaya maraq göstərib, “Azərbaycan pioneri”, “Sovet kəndi”, “Azərbaycan gəncləri”, “İnşaatçı””, “Vışka”, “Bakinski raboçi”, “Leninçi” (indiki “Lənkəran”) qəzetlərində, “Kənd həyatı”, “Təşviqatçı”, “Mədəni-maarif” jurnallarında maraqlı yazılarla çıxış edib. İllər ötdükcə onun imzası nəinki respublikamızda, eləcə də keçmiş İttifaqın, o cümlədən Rusiya mətbuatında görünməyə başlayıb.

A.Babayevin qələm təcrübəsini və bacarığını nəzərə alaraq 1990-cı ildə onu “Lənkəran” qəzetində xüsusi müxbir kimi işə götürüblər. Bir müddət sonra isə o, redaksiyada kənd təsərrüfatı şöbəsinin müdiri vəzifəsinə irəli çəkilib və 1995-ci ilə kimi burada çalışıb. Ağaddin müəllim jurnalistika ilə yanaşı, maraqlı bədii yazıları ilə də yaxşı tanınıb. Onun hekayə və şeirləri “Ədəbiyyat”, “Mədəniyyət”, “Paritet”, “Palitra”, “Kaspi” qəzetlərində, “Ulduz”, “Söz”, “Məşəl”, “Şəfəq”, “Alov” və digər dərgilərdə işıq izi görüb. Ağaddin Babayevin rus dilindən tərcümə etdiyi çoxlu sayda şeir, hekayə, yumoreska və pyeslər oxucular tərəfindən rəğbətlə qarşılanıb. Onun özünün qələmə aldığı “Kaloğlanın sərgüzəştləri” və “Sehrli sandıq” pyesləri, dünya xalqlarının dramaturgiyasından tərcümə etdiyi Georgi Xuqayevin “Andro və Sandro”, Lev Korsunskinin “Fırıldaqçı” komediyaları N.B.Vəzirov adına Lənkəran Dövlət Dram Teatrında tamaşaya qoyulub.

O, həmçinin “Moi sobesedniki” ( 2002), “ Ot naşeqo korrespondenta” (2009) kimi publisistik kitabların müəllifidir. A.Babayev hazırda “Bakinski raboçi” qəzetinin Cənub zonası üzrə xüsusi müxbiri və APA İnformasiya Agentliyinin Cənub bürosunun rəhbəri kimi çətin və şərəfli yaradıcılıq fəaliyyətini davam etdirir.

Dörd yaradıcılıq təşkilatının - Azərbaycan Yazıçılar Birliyinin (2009), Azərbaycan Jurnalistlər Birliyinin (1990), Azərbaycan Teatr Xadimləri İttifaqının (1987) və Azərbaycan Reklamçılar İttifaqının (1994) üzvü olan Ağaddin Babayev Azərbaycan Respublikası Prezidenti yanında Kütləvi İnformasiya Vasitələrinə Dövlət Dəstəyi Fondunun Novruz bayramı münasibətilə keçirdiyi yazı müsabiqəsinin qalibi kimi Fondun diplomu və pul mükafatına layiq görülüb.

Sizə 55 illik bir ömrün səhifələrini vərəqlədik. Elə bir ömür ki, el-obanın sevincinə, kədərinə həmişə şərik olub, kiminsə hüququ tapdananda həyəcan siqnalı çalıb və tənqidi faktları təfəkkür süzgəcindən keçirərək mətbuat aləminə yayıb.

...Budur, gecədən xeyli keçib, Lənkəranın Şağlaser kəndində evlərin birinin işığı gecə yarıdan keçənədək sönmür. Bu işıq həmkarımız Ağaddin Babayevin işığıdır. Ümid və gələcək mövzularla dolu baxışlar, bir də sabaha boylanan jurnalist işığıdır...

Azad Zülaloğlu,

Azərbaycan Jurnalistlər Birliyinin üzvü

Paritet.-2011.-9-11 aprel.- S.11.