“Erməni lobbisi fəallarının əksəriyyəti Qarabağın harda yerləşdiyini bilmir”

Bayram Səfərov: “Dağlıq Qarabağ münaqişəsində Azərbaycanın haqlı mövqeyinin dünya ictimaiyyətinə çatdırılmasında diasporun rolu əhəmiyyətlidir və diasporumuz buna nail olur”

Azərbaycanın ən ağrılı problemi olan Qarabağın geri qaytarılmasını hər bir azərbaycanlı səbirsizliklə gözləyir. Torpaqların qaytarılması üçün müharibə variantı olsa da, hələ ki Azərbaycan dövləti sülh yolunu seçib. Buna paralel olaraq dünya ictimaiyyətinə Azərbaycan həqiqətlərinin çatdırılması istiqamətdə də işlər həyata keçirilir. Dünyadakı diaspor təşkilatlarımızın fəaliyyəti nəticəsində artıq bu həqiqətlər təbliğ edilir. Hər bir diaspor təşkilatının təbliğ etdiyi başlıca məsələ isə Dağlıq Qarabağın tarixi Azərbaycan torpaqları olmasıdır. Çünki uzun illər özlərinə dayaq axtaran ermənilər bu vaxt ərzində lobbiçilik fəaliyyəti ilə Qarabağ haqqında yalnış informasiyalarını dünyaya yayması nəticəsində bir çox ölkələr bu dezinformasiyalara inanmışdılar. Amma bu gün vəziyyət tam əksinə olaraq Azərbaycanın xeyrinə dəyişməkdədir. Biz də “Paritet” qəzeti olaraq Dağlıq Qarabağ münaqişəsində Azərbaycanın haqlı mövqeyinin təbliği istiqamətində diaspor fəaliyyətinin əhəmiyyəti haqqında Dağlıq Qarabağın Azərbaycanlı İcmasının rəhbəri Bayram Səfərovun fikirlərini öyrəndik. İcma rəhbəri hesab edir ki, bu gün Azərbaycan həqiqətləri, o cümlədən Qarabağın bizim tarixi torpaqlarımız olduğu diaspor xətti ilə dünyaya çatdırılır.

-Dünya azərbaycanlılarının bir arada birləşməsi ulu öndər Heydər Əliyev tərəfindən 31 dekabr Dünya Azərbaycanlılarının Həmrəylik Günü kimi qeyd olunması ilə tarixə keçdi. Bu xalqımızı birliyə, bərabərliyə səslədi. Bu bərabərliyin nəticəsidir ki, bu gün dünyada bir arda mübarizə aparan azərbaycanlılar Azərbaycan həqiqətlərini təbliğ edirlər. O cümlədən Azərbaycanın ən ağrılı problemi olan Dağlıq Qarabağ münaqişəsində də Azərbaycanın haqlı mövqeyi diaspor təşkilatlarımız tərəfindən kifayət qədər təbliğ edilir. Bir zamanlar zəif fəaliyyəti ilə tənqid həfədinə çevrilən Azərbaycan diasporu bugün bu tənqidləri geridə qoyaraq öz sözünü deyir. Ümumiyyətlə, ötən 10 ildə bu istiqamətdə xeyli iş görülüb. İyul ayının 5-də isə Dünya Azərbaycanlılarının III Qurultayı oldu. Bu Qurultayda ötən illərdə göstərilən fəaliyyətin nəticələrini müzakirə edib, yeni fəaliyyət xətti müəyyənləşdirildi. Bildiyiniz kimi, bu qurultaya dünyanın əksər ölkəsindən həm azəbaycanlılar, həm də əcnəbilər təşrif buyurmuşdular. Prezident İlham Əliyevin qurultaydakı çıxışı da xüsusi əhəmiyyət daşıyırdı. Bütün bunlar hər bir azərbaycanlıya inam bəxş etdi. Diaspor xəttilə bu gün Azərbaycan həqiqətləri dünyaya çatdırılır. Həmçinin, dünyaya səpələnmiş hər bir azərbaycanlı da öz ətrafında olan əcnəbilərə bu həqiqətləri çatdırmalıdır. O zaman hər bir əcnəbi də öz ətrafına bu məlumatları yayacaq. Nəticədə, burda kifayət qədər iş görülə bilər. Mən hesab edirəm ki, hər bir azərbaycanlı bu istiqamətdə əlindən gələni edir. Diasporun son 10 ildən bəri həyata keçirdiyi işlər də bunu deməyə əsas verir. Bu istiqamətdə qazanılan uğurlar da artıq özünü göstərir. Hesab edirəm ki, Dağlıq Qarabağ münaqişəsində Azərbaycanın haqlı mövqeyinin dünya ictimaiyyətinə çatdırılmasında diasporun rolu əhəmiyyətlidir və diasporumuz bugün buna nail olur.

-Gənclərin, o cümlədən Rusiyada fəaliyyət göstərən RATİ gənclər təşkilatının bu istiqamətdə gördüyü işlərlə bağlı nə deyə bilərsiniz?

-Gənclərin də burda rolu böyükdür. Hər bir azərbaycanlı gənci təhsil aldığı xarici dövlətlərin universitetlərində Qarabağ və ümumilikdə Azərbaycan həqiqətlərini təbliğ edirlər. Bu da təbiidir, çünki onlar arxalarına Azərbaycan dövlətinin dəstəyini hiss edirlər. Heydər Əliyev Fondunun Rusiya filialının rəhbəri Leyla xanım Əliyeva da bu istiqamətdə çox əhəmiyyətli işlər görür. Onun rəhbərliyi altında “Xocalıya ədalət” kanpaniyasının həyata keçirilməsi Xocalı soyqırımının dünya ictimaiyyətinə çatdırılmasında böyük rol oynayır. Bu kampaniyanın 100 şəhərdə, 100 məmləkətdə keçirilməsi adi məsələ deyil və çox əhəmiyyətli işdir. Təsadüfi deyil ki, bu kampaniyadan sonra, dünya ictimaiyyətinin Xocalı soyqırımı haqqında fikirlərində köklü dəyişikliklər olub. Burda Heydər Əliyev Fondunun və fondun prezidenti, Azərbaycanın birinci xanımı Mehriban xanım Əliyevanın da xidmətlərini vurğulamaq lazımdır. Çünki bu istiqamətdə atılan addımların əsası da onun tərəfindən qoyuldu. Məhz Mehriban xanım Əliyevanın dəstəyi və Leyla xanımın rəhbərliyi altında gənclik daha sıx birləşdi və hər bir azərbaycanlının vətəni olan Azərbaycan üçün dünyada öz fəaliyyətlərini davam etdirirlər. Azərbaycan gəncliyinin istər ölkənin ictimai-siyasi həyatında, istərsə də xarici ölkələrdə Azərbaycanı layiqincə təmsil etməsi dövlətin gəncliyə olan etimadından irəli gəlir. Adi bir şeyi deyim. Bu gün bütün idman turnirlərindən Azərbaycana medallar gəlir. Əslində bununla Azərbaycan dünyada tanınır. Bu yaxınlarda bildiyiniz kimi, Qəbələdə Heydər Əliyev Fondunun dəstəyi ilə beynəlxalq musiqi festivalı keçirildi. Ora gələn musiqiçilər Azərbaycan xaqlının qonaqpərvərliyini, dövlətin apardığı demokratik siyasəti etiraf edirlər. Bu da birbaşa Azərbaycanın tanıdılmasıdır ki, bunun içində Qarabağ həqiqətləri də yer alır və hesab edirəm ki, bu cür mədəni tədbirlərlə daha çox iş görmək olar. Bununla yanaşı hər bir azərbaycanlı öz gücü daxilində dünya ictimaiyyətinə Azərbaycanın haqlı mövqeyini tanıtdırmalıdır. Gənclərimiz öz təhsili, idmançılarımız öz qələbələrilə, musiqçilərimiz öz bacarıqları ilə Azərbaycanı təmsil etməlidir.

-Hər il ABŞ Konqresi Dağlıq Qarabağın erməni əhalisinə 10 milyona qədər vəsait ayırırdı. Amma bu il, bu yardımın ayrılmasından imtina edildi. Bunun Amerikadakı Azərbaycan diasporunun Konqresə ünvanladığı məktub kampaniyasından sonra baş verdiyi də bildirilir...

-Bu məsələ barəsində ötən il ABŞ Konqresinə də, Amerika prezidentinə də Dağlıq Qarabağın Azərbaycanlı İcması adından da məktublar göndərmişdik. Bildirmişdik ki, əgər Dağlıq Qarabağ əhalisinə kömək etmək istəyirsinizsə, burda azərbaycanlılar da var, yaxud bu yardımı niyə Azərbaycan hökümətinin əli ilə etmirsiniz. Çünki Dağlıq Qarabağın Azərbaycan torpağı olduğunu tanıdıqları halda, bura edilən yardımın Ermənistan hökümətinin əli ilə edilməsi qəbul edilən məsələ deyil. Burda ədalətsizlik var. Amma bu il yardımın edilməsindən imtina etdilər. Çünki Amerika dövləti bu vəsaitin verilməsinin səhv olduğunu başa düşüb və bu vəsaitin xərcləndiyi yer naməlum qalır. Sonda ədalət öz yerini aldı. Burda Amerikadakı azəri diasporunun rolunu xüsusi vurğulamaq lazımdır. Diaspor təşkilatlarımızın bu məsələni vaxtında qaldırması, Konqresi ədalətli olmağa dəvət etməsi və Azərbaycan dövlətinin bu yöndə atdığı diplomatik addımların nəticəsidir ki, ermənilərin daha çox iş gördüyü Amerikada bu gün Azərbaycanın mövqeləri möhkəmlənib. Dağlıq Qarabağa yardımların ayrılması absurddur, çünki bu vəsait işğalçılara öz işğalçılıq siyasətini daha da möhkəmləndirməsinə sərf edilir. Diasporumuzun fəaliyyəti nəticəsində bu ədalətsizlik də aradan qaldırıldı. Bütün bunlar da dövlətlə diaspor təşkilatlarının birgə fəaliyyətindən və bu fəaliyyətin birbaşa Azərbaycana xidmət etməsindən doğan məsələlərdir. Amma ermənilərin fəxrlə danışdıqları lobbiçilik fəaliyyətlərinin nə qədər geniş olduğunu desələr də, Azərbaycan diasporunun qısa zaman kəsiyində etdiklərini edə bilməzlər. Çünki burda ilk növbədə Vətənə sevgi var. Bu sevgi Prezident İlham Əliyevdən başlamış, hər bir azərbaycanlının ürəklərindədir. Təbii ki, dövlət başçısının bu cür fəaliyyətini, Vətənə sevgisini görən hər bir azərbaycanlı da bu sevginin arxasınca gedir.

-Sizcə, Ermənistanın diaspor fəaliyyəti ilə, Azərbaycanın diasporu arasında əsl fərq nədədir?

-Hesab edirəm ki, burda fərq hər bir dövlətin və dövlət başçısının apardığı siyasətdir. Çünki hər şey də burdan başlayır. Bu gün hər bir Azərbaycan vətəndaşı və bütün dünyada yaşayan azərbaycanlılar Prezident İlham Əliyevin apardığı siyasəti dəstəkləyir və buna inanır. Bu Prezident İlham Əliyevin apardığı xarici və daxili siyasətin və dünya azərbaycanlılarının Azərbaycanın müstəqil və demokratik olduğunu görməsinin, dövlətin hər bir vətəndaşı üçün etdikləri və dövlət başçısının bu istiqamətdə atdığı addımların nəticəsidir. Buna görə də bütün dünya azərbaycanlıları öz prezidentlərini dəstəkləyir və ona inanırlar. Çünki dövlət başçısı prezident seçildiyi vaxt hər bir azərbaycanlının prezidenti olacağını bildirmişdi və bu fakt olaraq göz qabağındadır. Dövlət başçısı söz vermişdi ki, işsizlik və yoxsulluğu aradan qaldıracaq. Bu belə də oldu. O zaman yoxsulluq 49 faiz idi, bu günsə 9 faiz və daha aşağı enib. Hər bir dövlətin yoxsulu var, amma Azərbaycanda bu çox cuzi miqdardadır, yaxud ümumiyyətlə yoxdur. Bu gün 120 min ailə sosial yardım alır. Onlara bu yardımı əmək haqqından və pensiyalardan əlavə olaraq verilir. Eyni zamanda, köçkünlərə dövlətin etdiyi yardımlar da kifayət qədərdir ki, bu da hər bir köçkünün normal yaşamasına şərait yaradıb. Heç bir dövlətdə köçkünlərlə işləyən Dövlət Komitəsi yoxdur, amma Azərbaycanda var. Bu gün heç bir məcburi köçkün çadır şəhərciyində, yaxud vaqonlarda qalmır, hər birinin evi, həyatyanı sahəsi var. Yəni insanlar lazım olan hər şeylə təmin edilib. Bunların hamısı Prezident İlham Əliyevin apardığı siyasətin nəticəsidir. Məcburi köçkünlərə göstərilən köməkliklər-köçkün uşaqlarının pulsuz təhsil alması, işlərlə təmin edilməsi, bütün ödənişlərdə, bütün fəaliyyətdə güzəştlərin edilməsi və digər işləri hər bir azərbaycanlıyla yanaşı dünya azərbaycanlıları da görür. Onlar daim həsrətlərində olduqları vətənlərinin inkişafını və burda insanların yaxşı yaşamasını müşahidə etdikcə həm fəxr edirlər, həm də öz çevrələrində Azərbaycanın təbliğatını daha ürəkdən aparırlar. Bunlarla yanaşı, Prezident İlham Əliyev diaspor fəaliyyətinə xüsusi önəm verir. Elə sonuncu qurultayın keçirilməsi də buna sübutdur. Həmin qurultayda diaspor üzvlərinin mükafatlandırılması, təltif edilməsi, onlara göstərilən hörmət və qayğı hər bir azərbaycanlının Vətənə olan sevgisini bir az da artırır.

Gəlin, Ermənistana baxaq. Hesab edirəm ki, erməni diasporu öz xalqının, millətinin düşmənidir. Bununla yanaşı bu dövlətin başçısını Serj Sərkisyan da erməni millətinin, erməni gəncliyinin düşmənidir. Azərbaycanın Prezidenti İlham Əliyev gəncliklə apardığı siyasəti ilə Ermənistanın gəncliyi arasında dağlar qədər fərq var. Bu gün Azərbaycan rayonlarında idman komplekslərinin olmadığı yerləri barmaqla sayılır. Yəni gənclik üçün lazım olan idman, təhsil bütünlüklə təmin edilib. Amma Ermənistan prezidenti öz gənclərinə “Qarabağı biz aldıq, Ağrı dağı siz alacaqsınız” deməklə onlara nifrət öyrədir. Bizim aramızda fərq budur. Azərbaycan Prezidentinin apardığı siyasət göz qabağındadır. Bunun nəticəsidir ki, bütün dünya ölkələri Azərbaycanla əməkdaşlıq etməyə can atır. Bunlar Prezident İlham Əliyevə olan etimaddır. Ermənistanla isə heç bir dövlət işləmək istəmir. Onu da deyim ki, erməni lobbiçilərinin əksəriyyəti Qarabağın harda yerləşdiyini də bilmir.

-İcma bu istiqamətdə nə kimi təbliğat aparır?

-Dağlıq Qarabağ İcmasının hər bir üzvü Azərbaycan vətəndaşıdır. Bütün bu işləri biz də görməliyik və görürük. Hazırda biz təşkilatlanma işləri ilə məşğuluq. Köçkünlər arasında nə qədər gəncin olduğunu, qocaların sayını, dünyaya gələn uşaqların sayını və digər məsələləri hesablayırıq. Bununla yanaşı, görüşdüyümüz beynəlxalq təşkilatlarının nümayəndələrinə Qarabağ haqqında bilgilər verir, buranın tarixi Azərbaycan torpağı olduğunu faktlarla sübut etməyə çalışırıq. Hazırda təbliğatımızı aparmaq üçün internet resurslarından da istifadə edirik. İcmanın veb saytı da fəaliyyət göstərir. Bu saytda Qarabağın abidələri, mədəniyyəti, görkəmli şəxsləri, həqiqətlər barəsində ətraflı məlumatlar yer alır. Bu istiqamətdə bacardığımız qədər işi həyata keçirtməyə çalışırıq.

Asif NƏRIMANLI

Paritet.- 2011.- 18-19 avqust.- S.5.