“Azərbaycanda sərgimin keçirilməsi məndə xoş təəssürat yaratdı”

Pərviz Əbdi: ”Bu sərgidə 22 ağac üzərində oyma işlərim nümayiş olundu”

Son zamanlar ölkəmizdə mövcud olan müxtəlif mədəniyyət ocaqlarında bir sıra xarici ölkələrin rəssamlarının sərgiləri təşkil edilir. Eyni zamanda bizim görkəmli sənət adamlarımızın da sərgiləri bir çox xarici ölkələrin qalereyalarını bəzəyir. Bu hal da ölkələr arasında mədəni mübadilənin yaranmasına təkan verməklə yanaşı, sənət adamlarının bir-birinin təsviri sənət aləmi ilə yaxından tanış olmağa imkan yaradır.

Belə ki, bu günlərdə iranlı təsviri sənət ustalarının əsərlərinin yer aldığı Rəssamlar İttifaqının Vəcihə Səmədova adına sərgi salonunda “Xəttatlıq-illüminasiya miniatür” sərgisinin açılışı olub. Sərgidə müxtəlif növ ağaclar üzərində bir-birindən fərqli, müxtəlif obrazlarda təsvir olunmuş əsərləri ilə seyrçilərin diqqətiniçəkən heykəltəraş, uzun illərdi ağac üzərində oyma sənəti ilə məşğul olan Pərviz Əbdi bizimlə söhbətində ilk olaraq bildirdi ki, İran və Azərbaycan rəssamlarının, eləcə də rəssamlar ittifaqlarının bir-biri ilə sıx əlaqəsi var:

- Onu da qeyd edim ki, azərbaycanlı rəssamlarında İranda sərgiləri təşkil olunur. Çox istedadlı sənət adamlarınız var. Bu sərgiyə çox böyük məhəbbət və sevgi ilə qatıldım. Sərgidə mənimlə yanaşı, üç iranlı təsviri sənət ustaları da iştirak edirlər. Azərbaycana ilk səfərimdir. Belə deyərdim ki, bu sərgi mənim bura gəlməyim üçün bir bəhanə və əsas vasitə oldu. Babalarım Azərbaycanda-Bakıda yaşayıb. Evimizdə həmişə Azərbaycan dilində danışırdıq. Atamın ürəyində qaldı, o Bakıya gələ bilmədi. Mən ona söz verdim ki, necə olsa Azərbaycana gedəcəyəm. Çox sevinirəm ki, bu arzuma çatdım və bu gün Bakıda öz sənət işlərimi azərbaycanlılara təqdim edirəm. Bu səfərimdə Bakının çox hissəni gəzmək imkanım oldu. Şəhər məndə çox gözəl təəssürat yaratdı. Fikrim var ki, yenə də Azərbaycana gəlim və yeni -yeni əsərlərimi sizlərə təqdim edim. Eyni zamanda sizin sənət adamlarınızla da əlaqə yaratmaq istəyirəm ki, gələcəkdə qarşılıqlı iş birliyimiz olsun.

Sərgidə iyirmi iki işinin nümayiş olunduğunu deyən P.Əbdi bildirdi ki, ümumilikdə əlli işi var. 33 ildir ki, bu sənətlə məşğul olur:

-Ancaq bu sahə üzrə heç bir ali təhsil almamışam. Mən ancaq çox kiçik yaşlarımdan bu işə böyük maraq göstərərək, bıçaqla müxtəlif ağaclar üzərində fiqurlar oyardım. Ağac üzərində oyma sənətiylə bizim ailə üzvlərimiz məşğul olub, indi də mən davam elətdirirəm. Ailə üzvlərimizin ağacdan hazırladıqları işləri gördüm və o işlərdən də çox şeylər öyrəndim.

Material kimi, ancaq təbii ağac məmulatından istifadə edirəm. Hər bir ağacın öz rəngi və gözəlliyi var. Müxtəlif ağacları bir-birinə qoşub, maraqlı işlər hazırlayıram. Belə ki, portağal, qovaq, alma və s. kimi ağaclardan istifadə edirəm. Yəni, Tanrı tərəfindən təbiətə bəxş edilən gözəllikdən istifadə edərək, biz sənət adamlarıda maraqlı işlər hazırlamağa çalışırıq. Hətta mən deyərdim ki, tullantı kimi yararsız olan ağacdan belə gözəllik yaratmaq olur. Heç bir süni rəngdən istifadə etmirəm, ancaq ağacın öz təbii rəngi qalır.

İşləmək prosesinə gəlincə isə həmsöhbətim bildirdi ki, o eyni zamanda bir neçə iş üzərində çalışır:

- Mən heç zaman uzun müddət bir iş üzərində işləyə bilmərəm. Bu zaman həvəsdən düşərəm, yorularam. Ancaq üç-dörd iş üzərində bir vaxta çalışaram. Uzun müddət çalışdıqdan sonra yaxşı bir iş meydana çıxar. Mən ağac üzərində qəhrəmanlarımı təsvir edərkən, bir xeyli fikirləşirəm və axtarışda oluram. Müxtəlif təbəqələrə və sənət növlərinə məxsus olan işlər hazırlayıram. Məsələn, bir çox ağac üzərində qadınları rəqs edən formada təsvir etmişəm. Çünki bir çox qadınlar rəqs etməyi xoşlayır. Azərbaycandan qayıdandan sonra aşıq yaradıcılığı ilə bağlı maraqlı bir iş hazırlamaq istəyirəm.

Rəssam Azərbaycandan əvvəl, başqa bir sıra xarici ölkələrdə də əsərlərinin festival və sərgilərdə nümayiş olunaraq mükafata layiq görüldüyünü dedi:

- Tehranda tanınmış qalereyalarda sərgilərim mütəmadi olaraq keçirilir, xarici ölkələrdən isə İtalyada, Küveytdə, Türkmənistanda və başqa bir sıra ölkələrdə sərgilərim nümayiş olunub. Türkmənistanda 16 ölkədən sənət adamlarının iştirak etdiyi bir təsviri sənət festivalı idi. Mən də bu festivalda diplom aldım. Onu qeyd edim ki, Bakıda sərgidə iştirak edən adi seyrçilər və sənət adamları təsviri sənəti çox yaxşı bilirlər. Onların bu sahədə mükəmməl bilgiləri var. Bunun üçün də onlara gərək dəyərli işlər təqdim olunsun. Deyərdim ki, Azərbaycanda sərgisini təşkil etmək istəyən hər bir sənət adamının gərək bu sahədə kamil biliyi olsun. Bu dəfə Bakıda nümayiş olunan işlərimin satışı olacaq. İstəyirəm ki, qoy mənim sənət əsərlərim Azərbaycanda qalsın. İnanıram ki, işlərimin bir xeyli hissəsini Bakıda qoyacam ki, müxtəlif qalereya və şəxsi kolleksiyaları bəzəsin.

Məlumat üçün bildirək ki, üç gün davam edən bu sərgidə 4 iranlı təsviri sənət ustasının 120 sənət əsəri sərgilənib.

GÜNAY

Paritet.- 2011.- 12-14 fevral.- S. 16.