Türk Xalqlarının Vətəndaş Cəmiyyəti Forumu yaradılıb

Bakıda fəaliyyət göstərən 5 qeyri-hökumət təşkilatı Türk xalqlarının Vətəndaş Cəmiyyəti Forumunu təsis edib. Bu barədə fevralın 17-də Forumun təqdimatı üçün keçirilən mətbuat konfransında TXVCF-nın əlaqələndiricisi Vüsalə Hüseynova bildirib. O sözlərinə görə, Forum türkdilli xalqların vətəndaş cəmiyyəti institutlarının bir qurumda cəmlənməsi niyyəti ilə yaradılıb. “Forum bütün türkdilli dövlətləri və respublikaları əhatə edəcək. Artıq bizə müxtəlif türk respublikalarındakı QHT-lərdən foruma qoşulmaq məqsədilə 88 müraciət məktubu daxil olub”.

TXVCF-u əsas təşkilatçıları isə “Demokratik İslahatçı Gənclər”, “Sağlam İnkişaf və Maarifləndirmə”, “Bakı Gənclər Klubu” “Demokratik Azərbaycan Naminə” və “Yeni Həyat” Humanitar və Sosial Dayaq ictimai birlikləridir.

Yeni qurumun siyasi təşkilat olmadığını deyən Vüsalə Hüseynova əsas məqsədin türk dövlətlərindəki müxtəlif problemləri qabartmaq, ortaq türk dili və türk əlifbasının yaradılmasına cəhd göstərmək və digər məsələlərdən ibarətdir: “Bu gün dünyanın siyasi gedişi elə bir nöqtəyə çatıb ki, belə bir vəziyyətdə türklər yalnız birləşərək güclü ola bilər. Bütün türkdilli xalqların kökləri bir mənbədən qaynaqlanır. Həmin xalqlar başqa-başqa dövlətlərin sərhədlərində yaşasalar da eyni atanın, eyni ananın övladlarıdır. Bizim təsis etdiyimiz yeni forumun da məqsədi qardaş xalqları bir araya gətirmək, düşmənlərimizə qarşı birgə savaşmağı təmin etməkdir. Bunun üçün biz qərara gəldik ki, ortaq əlifba və dil yaradılsın. Çünki dil əsas amildir. Onsuz da əksər türkdilli bir-birini gözəl anlayır, amma ortaq dilin olması bu anlaşmanı daha da möhkəmləndirəcək. Eyni zamanda bu forumda müzakirələr aparılacaq, problemlərin həlli yolları araşdırılacaq.”

Qeyd edək ki, forum Qarabağ problemini də xüsusi olaraq gündəmə gətirəcək. V.Hüseynova hesab edir ki, hər hansı bir türk dövlətinin problemi bütün türk dünyasının problemidir və bu yaranmış problemi aradan qaldırmaq üçün bütün türklər birləşməlidir. “Bu gün Azərbaycanın Qarabağ problemi bütün türk dünyasının problemi, dərdi olmalıdır. Azərbaycana qarşı edilmiş təcavüz bütün türklərə qarşı edilmiş sayılmalıdır, eyni zamanda türklərin dərdi Azərbaycanın dərdidir. Bu məsələləri nəzərə alaraq bu forumda Qarabağ və türk dünyasının bir çox problemləri müzakirə ediləcək.”

Tədbirdə çıxış edən Tatarıstan Respublikasının Azərbaycandakı daimi nümayəndəsi Nail Zaripov forumun əhəmiyyətini vurğulayaraq bildirdi ki, türk xalqlarının inteqrasiyası məsələsində atılan addımları rəsmi Kazan həmişə dəstəkləyir: “Biz forumun yaradılmasını və qarşısına qoyduğu məqsədləri dəstəkləyirik. Tarix boyu türklərə qarşı edilən təcavüzlərə baxmayaraq, türklər heç vaxt sınmayıblar. Bu gün eyni kökə malik türkdilli xalqlar müəyyən səbəblər üzümdən ayrı düşsələr də, onlar həmişə birliyə can atıblar. Bu xalqların birləşməsi yolunda görülən işlər təqdirəlayiqdir və belə işlər epizodik xarakterli olmamalıdır.”

Türkiyənin Azərbaycandakı səfirliyinin nümayəndəsi İsmayıl Çalışkan da yeni qurumu dəstəklədiklərini bildirib. Onun sözlərinə görə türk xalqlarının birləşməsi üçün Azərbaycan ictimaiyyətinin fəallığı xüsusilə qeyd edilməlidir.

Qeyd edək ki, Qurum bu il Türk Xalqlarının Vətəndaş Cəmiyyətlərinin I Bakı Forumunu keçirmək niyyətindədir.

A.Nərimanlı

Paritet.- 2011.-19-21 fevral.- S.8.