Bu il
türk xalqları QHT-lərinin I Bakı Forumunun keçirilməsi nəzərdə tutulur
“TXVCF-nin tərkibində fəaliyyət
göstərmək üçün
indiyə kimi türk dövlətlərini
təmsil edən 100-ə
yaxın QHT-dən müraciət daxil olub”
Bu günlərdə bir
qrup QHT rəhbəri Türk Xalqları Vətəndaş Cəmiyyəti
Forumunu (TXVCF) təsis
ediblər.
Forumu Bakı Gənclər klubu (sədr Azər Cavadov), “Demokratik Azərbaycan Naminə” (sədr Elməddin Behbud), “Demokratik İslahatçı
Gənclər” (Vüsalə
Hüseynova), “Sağlam
İnkişaf və Maarifləndirmə” (sədr Anar Xəlilov) və “Yeni Həyat” (sədr Nailə İsmayılova) ictimai birlikləri təsis ediblər. Artıq TXVCF ölkədə baş verən ictimai hadisələrə
münasibət bildirərək
öz aktivliyini göstərməkdədir.
Belə ki, Forumda təmsil
olunan təşkilatlar
dövlət başçısı
İlham Əliyevə
dəstək müraciəti
ünvanlayıblar. TXVCF idarə heyətinin üzvü Elməddin Behbud “Paritet”ə bildirdi ki, forumun Azərbaycan
nümayəndəliyində təmsil olunan beş QHT ölkə
Prezidenti tərəfindən
aparılan islahatlara və korrupsiya ilə mübarizəyə
görə təşəkkür
edib: “Bu işdə forumda olan təşkilatların
minlərlə gənci
adından İlham Əliyevin gənclər qüvvəsi
olaraq arxasında olduğumuzu və lazım olan hər bir işdə
ona dəstək olacağımızı bildirmişik.
Biz gənclərlə işləyən
təşkilatların rəhbərləri
kimi ətrafımızda
olan gənclərin fikirlərini ölkə başçısına çatdırmaq
istədik ki, bu gün Azərbaycan
gəncləri öz prezidentinin ətrafında
birləşərək, onun
apardığı islahatlara
öz töfhəsini
verməyə və ali baş komandanın
əmrində olan ordunun nümayəndələri
kimi hər zaman Azərbaycanın inkişafına və çiçəklənməsinə xidmət etməyə hazırdır. Bu gün gənclər öz prezidentinin arxasında qüvvə olaraq dayanıbdır və bu belə
də olacaqdır”.
TXVCF idarə heyətinin
üzvü bildirdi ki, müraciəti Forumda Azərbaycan tərəfindən təmsil
olunan beş
təşkilat sədrləri
imzalayıblar.
E.Behbud bizimlə söhbətində
Forumun məqsədindən
və gələcəkdə
görüləcək işlərdən
də danışdı. Qeyd etdi ki, Forumun yaradılmasında əsas məqsəd türkdilli xalqlarla Azərbaycanın münasibətlərinin
daha da dərinləşməsi
və beynəlxalq arenada həmrəylik nümayiş etdirilməsidir.
“Biz böyük türk millətinin bir hissəsiyik. Bu gün türk
xalqlarının gəncləri
arasında əlaqələr
zəifdir. Məqsəd ortaq problemlərlə bağlı vahid mövqe ortaya qoymaqdır. Bizim proqramda təxminən 9-a yaxın bənd var. Bura mətbu orqanın, elektron vasitələrin təsis olunması, Birinci Bakı Forumunun keçirilməsi, türk
dövlətləri ali məktəbləri
arasında türk gənclərin mübadiləsi
və s. daxildir. Biz bir-birimizlə daha çox münasibətdə olandan
sonra yeni əlverişli təşəbbüslər
verilsə onu da proqrama
salacağıq. Yəni qarşılıqlı əməkdaşlıq
münasibətləri genişləndikcə
yeni-yeni təkliflər
ortaya çıxacaq və biz birlikdə işləyəcəyik”.
Forumun saytı da yaxın
günlərdə istifadəyə
veriləcək: “Orda forumda təmsil olunan bütün QHT-lərin adları olacaq. Eyni zamanda onların
vaxtaşırı müsahibələri,
eləcə də birgə bəyanatlarımız,
indiyə qədərki
fəaliyyətimiz haqqında
məlumatlar yerləşdiriləcək.
Qeyd edim ki, bizim
“Facebook”da səhifəmiz
var və orda mütəmadi məlumatlar yayılır”.
İctimai Birlik
sədri türk millətlərinin həmrəyliyinin həm Azərbaycan, həm də digər türk xalqlarının mənafeyi baxımından
çox böyük əhəmiyyət daşıdığını,
bunun üçün
bütün sahələr
üzrə əməkdaşlıq
münasibətlərinin dərinləşdirilməsinin
zəruri olduğunu bildirdi: “Təəssüflər
olsun ki, nə BMT-nin ölkəmizə qarşı
işğalçılıq siyasətini pisləyən
məlum 822, 853, 874, 884 saylı
qətnamələri, nə
İslam Konfransı Təşkilatının illik
toplantılarının yekun
qərarları nə
də ki, digər beynəlxalq qurumların analoji mövqeləri hələ
ki, pozulmuş ərazi bütövlüyümüzün
bərpası üçün
yetərli olmayıb. Bu sırada birmənalı
surətdə ölkəmizin
haqq işini müdafiə edən tək dövlətin Türkiyə olduğu da hamımıza gün kimi aydındır.
Biz istəyirik ki, digər türkdilli dövlətlərlə
də münasibətləri
belə dərinləşdirək”.
O
hesab edir ki, bundan sonra
bu ağrılı problemin həlli üçün əsas diqqət ölkəmizin hərtərəfli inkişaf
etdirilməsinə və
eyni tarixi, dili, dini, mədəniyyəti
paylaşdığımız altı müstəqil türk dövləti və hazırda müxtəlif ölkələrinin sərhədləri
daxilində öz ana torpaqlarında yaşayan türk xalqları ilə inteqrasiyanın dərinləşdirilməsinə
yönəlməlidir: “Avropa
İttifaqı modelindən
nümunə götürərək
bütün sahələr
üzrə türk dövlətlərinin əməkdaşlığının
müttəfiqlik səviyyəsinə
qalxmasını və
ortaq milli maraqların müdafiəsində
vahid güc olaraq çıxış
etməyi vacib və gərəkli hesab edirik. Müasir dünyada
vətandaş cəmiyyətləri
strukturlarının ictimai
rəyə təsir imkanlarına və problemlərin həllində
oynadığı rola
diqqət edərək
TXVCF-nun təsis edilməsini
qərara aldıq”.
Bu
il TXVCF-nin
I Bakı Forumunu keçirtməyi nəzərdə
tutduqlarını deyən
E.Behbud burada yeni struktur, nizamnamənin bəlli olacağını vurğuladı. “İndi biz müraciət
hazırlayırıq 6 türk
dövlətinin başçısına
ki, foruma dəstək versinlər.
Bu Forum siyasi qurum
deyil. Biz mədəni irsimizi, tariximizi, kökümüzü
dünyaya tanıtmaq istəyirik. Bizə demokratiya
dərsi keçənlərə
anlatmaq istəyirik ki, elə ilk demokratiya türk dövlətlərinə məxsus
olub”, deyə o əlavə etdi.
Həmsöhbətimiz
həmçinin “Xocalı
soyqırımı”
ilə bağlı Türkiyə, Qazaxıstan,
Qırğızıstan, Tatarıstan
kimi türkdilli dövlətlərdə tədbirlər
keçirildiyini də bildirdi: “Forum Xocalı faciəsi ilə bağlı Birləşmiş
Millətlər Təşkilatı, BMT-nin baş katibi, BMT-nin İnsan Hüquqları üzrə
Ali Komissarı, Avropa Komissiyası, Avropa Şurası, ATƏT, Beynəlxalq Sülh Bürosu, Dünya Gənclər Assambleyasına, Türk dövlətlərinin parlamentlərinə,
Türk dövlətlərinin
Azərbaycandakı səfirliklərinə
bəyanat ünvanladı.
Bəyanata Forumda ilk olaraq
təmsil olunan Azərbaycan, Türkiyə,
Qazaxıstan, Özbəkistan,
Qırğızıstandan olan vətəndaş cəmiyyətinin nümayəndələri
qoşuldular”.
TXVCF
idarə heyətinin üzvü türk xalqları arasında əməkdaşlığın və inteqrasiyanın zəifliyindən danışaraq
ayrı-ayrı adlar altında fəaliyyət göstərən qurumların
fəaliyyətlərinin sözdən
o yana keçmədiyini,
keçirilən tədbirlərin
səmərə vermədiyini
önə çəkdi.
Artıq forumun
Azərbaycan nümayəndəliyinin
yaradıldığını deyən E.Behbudun sözlərinə görə,
Forumun tərkibində
fəaliyyət göstərmək
üçün indiyə
kimi türk dövlətlərini təmsil
edən 100-ə yaxın
QHT-dən müraciət
daxil olub: “Bu rəqəm artmaqda davam edir. Münasibət çox yaxşıdır.
Qırğızıstandan, Qazaxıstandan ümidverici
dəstək verənlər
var. Qazaxıstanda artıq
TXVCF ilə bağlı
yerli bir model yaranıb. Məsələn, bu yaxınlarda
biz Türkiyədə olarkən
bir neçə QHT sədri ilə görüşdük. Onlar birmənalı
şəkildə bizə
dəstək verdilər.
Forumun yaradılmasında əsas
məqsəd bir tərəfdən türkdilli
xalqların vətəndaş
cəmiyyəti institutlarının
bir-birini yaxşı tanımasıdırsa, digər
tərəfdən türk
dövlətlərinin bir-birini
tanıması və problemlərini daha dərindən bilməsidir”.
E.Behbud may ayında
Qırğızıstana səfərləri
olacağını da
bildirdi: “Ola bilər ki, yalnız Qırğızıstanla məhdudlaşmasın
Orta Asiya respublikalarının bir çoxuna səfər edək. Ora gedəndə həm
əyani materiallar, həm də nəzəri proqramımızı
da aparacağıq.
Bu tip təmaslar bizim bir-birimiz haqqında məlumatlığımızı
artıracaq”.
F.HÜSEYNZADƏ
Paritet.-2011.-17-18
mart.-S.8.