Tərsinə çevrilən dünya”

Ənvər Əbluc : “Uşaqların istər məktəb dövrü ilə əlaqəli, istər əyləncəli və istərsə də tərbiyəvi xarakterli filmlərə çox ehtiyacı var”

Bu il premyerası keçirilməli olan tammetrajlı bədii filmlərdən sonuncusu da təqdim edildi. Bu həftəiçi Beynəlxalq Muğam Mərkəzində təqdimatı gerçəkləşən Çingiz Abdullayevin ssenarisi əsasında “Azərbaycanfilm” kinostudiyası ilə “Sədra-film” (İran) şirkətinin birgə istehsal etdikləri “Tərsinə çevrilən dünya” bədii filmidir. Filmin təqdimatından öncə foyedə ekran əsərinin rejissoru Ənvər Əblucla qısa həmsöhbət olduq. O, söhbət əsnasında bildirdi ki, uzun müddət bədii film çəkməsə də, sənədli filmlərə heç vaxt ara verməyib.

-Ənvər müəllim, filmin süjet xətti ilə bağlı nə deyə bilərsiniz?

-Bu gün mənim və çəkiliş qrupunun ən xoşbəxt günlərindən biridir. İlk öncə qeyd edim ki, film Çingiz Abdullayevin ssenarisi əsasında çəkilib. “Ağ atlı oğlan” filmindən sonra hardasa 15-16 ildir ki, mən bədii film çəkmirdim. Nəhayət mənə etimad göstərildi və bu ssenari təklif olundu. Filmə qədər Çingiz Abdullayevlə şəxsi tanışlığım yox idi. Əsərləri ilə tanış idim, gözəl yazıçı olduğunu bilirdim, amma bu qədər...Bu filmin iş prosesində onunla daha yaxından tanış oldum və çox təvazökar biri olduğunu gördüm. Ssenari narkotik malların qaçaqmalçılığına qarşı Azərbaycan və İran polisinin mübarizəsindən bəhs edir. Daxili işlər orqanlarının əməkdaşları tərəfindən keçirilmiş əməliyyat nəticəsində cinayətkar dəstənin fəaliyyətinə son qoyulur. Sözün düzü, ssenaridə ilk öncə Azərbaycan polisinin işi, qəhrəmanlığı nəzərdə tutulurdu. Amma İranda müəyyən epizodlar var idi ki, bunu görən iranlı dostlar təklif etdilər ki, İran polisini də ssenariyə əlavə edək. Artıq bütün heyət təsdiq olunmuşdu. Təəsüflər olsun ki, Azərbaycanda kinoteatr olmadığına görə, bir- iki dəfə film göstərilir, sonra isə bir də filmi görmək olmur. İnanıram ki, “Nizami” kinoteatrı təmirdən qurtarandan sonra tamaşaçılar Azərbaycan filmlərini görə biləcəklər.

-Ssenariyə çoxmu dəyişiklik etdiniz?

-Müəyyən qədər. İran polisi ilə bağlı Çingiz Abdullayev ssenariyə yeni epizodlar əlavə etdi. Onu da deyim ki, filmin quruluşçu operatoru Kənan Məmmədov, quruluşçu rəssamı Rafis İsmayılov, bəstəkarı Oqtay Rəcəbov, icraçı prodüsseri Adil Qulamovdur. Çəkiliş qrupundan çox razı qaldım. Amma sizə deyim ki, elə bu çəkiliş qrupu ilə 1983-cü ildə “Qara gölün cəngavərləri” filmini də çəkmişdim. SSRİ miqyasında o film böyük əks səda doğurmuşdu. Sözün düzü, çox istəyirəm ki, o uğurun indi bu filmlə davamı gəlsin.

-Filmin İranda nümayişi gözlənilirmi?

-Əlbəttə. Çünki ssenari İran Mədəniyyət Nazirliyi tərəfindən də təsdiq olunmuşdu. İran kimi böyük ölkədə film ekranlara çıxandan sonra tamaşaçıların necə reaksiya verəcəyi maraqlıdır. Cənubi Azərbaycanda 35 milyon azərbaycanlı yaşayır.

Filmdə İranın məşhur aktyorları Məhəmmədrza Forutən və Humayun İrşadi eləcə də digər iranlı aktyorları görə biləcəksiniz. Onu da qeyd edim ki, Azərbaycan polisi rolunda Məhəmmədrza Forutən oynayır. Onların Azərbaycana və Azərbaycan kinosuna böyük məhəbbətləri var. İran tərəfdən bizə çox gözəl şərait yaradıldı. Azərbaycan tərəfdən isə rollarda Rasim Balayev, Fuad Poladov, İlham Əsgərov, Natella Kərimova, Günel Məmmədova, Sona Mikayılova, Qorxmaz Əlilicanzadə, Məmməd Səfa oynayırlar. Filmin araya- ərsəyə gəlməsində Azərbaycanda Daxili İşlər Nazirliyinin çox köməkliyi oldu. Elə ilk nümayişi nazirliyin üzvləri üçün təşkil etdik. Çox bəyəndilər.

-Ənvər müəllim, daha hansı mövzularda film çəkmək istərdiniz?

-Mənim mövzularım çoxdur. Amma təəssüf ki, istədiyimizlə imkanlarımız üst- üstə düşmür. Mən uzun müddət uşaq filmləri çəkmişəm. Uşaqlarla işləmək çətindir, amma mütləq uşaqlar üçün filmlər çəkilməlidir. Uşaqların istər məktəb dövrü ilə əlaqəli, istər əyləncəli və istərsə də tərbiyəvi xarakterli filmlərə çox ehtiyacı var.

NƏRMİN

Paritet.-2011.-5 noyabr.-S.16.