Fransada təhsil alan
gənclərimiz Azərbaycanı uğurla
təmsil edirlər
Günel Çəndirova: “İllər
keçdikcə gücümüzü artırırıq”
Azəri
diasporunun tarixən sıx məskunlaşdığı
ölkələrdən biri də Fransadır. Diasporla
İş üzrə Dövlət Komitəsinin
açıqladığı statistikaya əsasən, bu
ölkədə yaşayan soydaşlarımızın
sayı on mindən çoxdur. Hələ 19-cu əsrin ikinci
yarısından etibarən Fransa və onun paytaxtı Paris azərbaycanlı
ziyalıları özünə cəlb edirdi. Buna əsas səbəb
o zaman üçün bu ölkənin Avropanın əsas mədəni-elmi
mərkəzi sayılması, fransız dilinin isə
Avropanın aparıcı dilinə-linqvofrankoya çevrilməsi
idi. Təsadüfi deyil ki, tanınmış nasirimiz
İsmayıl bəy Qutqaşınlı özünün “Rəşid
bəy və Səadət xanım” hekayəsini fransızca qələmə
almışdı. Mirzə Fətəli Axundzadə isə
özünün “Hekayəti-Müsyö Jordan həkimi-nəbatat
və dərviş Məstəli şah cadukünu-məşhur” komediyasında o zaman formalaşmaqda
olan yeni ziyalı təbəqəsinin Parisə can
atmasını maraqlı bir tərzdə təqdim edir.
Bu canatmalar sonradan həm də
Fransada ilk diaspor fəallarımızın fəaliyyəti ilə
nəticələndi. Azəriəsilli böyük mütəfəkkir Cəmaləddin Əfqani -Astrabadi
Şərq xalqlarının azadlığı
ideyasını təbliğ edən “Uravat-ül-vusqa” qəzetini
məhz Parisdə nəşr etməyə
başlamışdı. İlk
siyasi təşkilatımız olan “Difai”nin qurucusu Əhməd
bəy Ağaoğlu 19-cu əsrin sonlarında Parisdə təhsil
almış, fransız mediasında yazılarla
çıxış etmişdi. BDU-nun ilk azərbaycanlı
professoru, ”Şərqi-Rus” qəzetinin təsisçisi və
baş redaktoru Məhəmməd ağa Şahtaxtılı
da Parisdə Sorbanna universitetində təhsil almış, sonrada
həm də burada mühazirələr oxumuş və Beynəlxalq
Fonetika Cəmiyyətinin üzvü seçilmişdi.
Fransaya
ikinci mühacirət dalğası Azərbaycan Xalq
Cümhuriyyətinin süqutu ilə başlayır. Azərbaycan
parlamanının sədri Əlimərdan
bəy Topçubaşı, tanınmış
yazıçı və diplomat Yusif Vəzir Çəmənzəminli,
tanınmış bəstəkar Üzeyir Hacıbəylinin
qardaşı Azərbaycan
istiqlalı və müstəqilliyi uğrunda mübarizlərdən
olmuş Ceyhun Hacıbəyli və b. Parisdə məskunlaşır. Y. Çəmənzəminli Azərbaycan
ədəbiyyatının tarixinə dair fransızca bir kitab
da çap etdirir. O, sonradan Azərbaycana qayıtsa da, digər
AXC qurucuları Parisdə də
ömürlərini başa vururlar. Ə.Topşubaşi və
C.Hacıbəylinin məzarları indi də Parisədir.
Mühacirətin
üçüncü dalğası İkinci Dünya
Müharibəsinə təsadüf edir. Bu illər bir
çox azərbaycanlılar Fransa Müqavimət Hərəkatında
da yaxından iştirak etmiş, onlardan biri Əhmədiyyə
Cəbrayılov isə bu fəaliyyətinə görə
Fransanın ən ali mükafatları ilə təltif
edilmişdi.
Ötən
əsrin sonlarında İranda baş verən ictimai-siyasi
proseslərlə əlaqədar
bu ölkədən mühacirət etmiş on minlərlə azərbaycanlının
bir hissəsi Fransada məskunlaşdı.
Nəhayət,
sonuncu mühacirət dalğası SSRİ-nin
süqutundan sonra Avropa ölkələrində
azərbaycanlıların yeni nəsillərinin məskunlaşması
ilə başlayıb.
Hazırda
Fransada sədri Mustafa Alınca olan və 2005-ci ildə təsis
edilmiş “Azərbaycan Evi” Cəmiyyəti,
2003-cü ildə təsis edilmiş Azərbaycan Fransız Gənclik
Assosiasiyası (sədri Vüsalə Məmmədzadə),
2001-ci ildən fəaliyyət göstərən Azərbaycan Kültür Mərkəzi
(sədri Əhməd Mehribani), 1999-cu ildə təsis
edilmiş Fransada Azərbaycanlı
Tələbələr Assosiasiyası (sədri Məmməd
İsmayılov), Fransa-Azərbaycan Mədəni Əlaqələr
Assosiasiyası “ARAZ” (sədri Qulam Abiyar) kimi təşkilatlar
var.
Diasporumuzun
güclənib, inkişaf etməsində xaricdə təhsil
alan azərbaycanlı tələbələrin müstəsna
xidmətləri var. Onların enerjisindən düzgün
istifadə, koordinasiya etmək üçün demək olar
ki, əksər ölkələrdə müxtəlif təşkilatlar,
qurumlar yaradılıb. Bu, Azərbaycan həqiqətlərinin
beynəlxalq aləmdə tanıdılması
baxımından çox əhəmiyyətlidir. Sevindirici
hallardan biri, gənclərimizin öz intellektual səviyyələri,
vətənpərvərlikləri ilə seçilmələridir. Xaricdə təşkil olunan
bütün aksiyalarda, sərgilərdə, tədbirlərdə
könüllü olaraq iştirak edir, öz təşəbbüsləri
ilə seçilirlər.
2003-cü
ildə Parisdə təhsil alan bir qrup azərbaycanlı tələbələr
tərəfindən yaradılmış dünyəvi,
qeyri-siyasi təşkilat olan Azərbaycan-Fransa Gənclik
Assosiasiyasının (AFGA) fəaliyyəti buna nümunə
ola bilər. Təşkilatın əsas məqsədi mədəniyyətimizi,
tariximizi, uğurlarımızı, problemlərimizi
çatdırmaqla yanaşı, Azərbaycan-Fransa arasında
dostluq əlaqələrini möhkəmləndirmək,
iqtisadi, elmi və mədəni münasibətlərin
inkişafına dəstək verməkdir. Təşkilat Parisdə,
eləcə də Fransanın müxtəlif şəhərlərində
fərqli mövzularda tədbirlər, layihələr həyata
keçirir. Təbii ki, Dağlıq Qarabağ məsələsi
də daim diqqət mərkəzində olur. Azərbaycan həqiqətlərinin
dünya ictimaiyyətinə çatdırılması, Ermənistanın
Azərbaycana təcavüzü ilə bağlı beynəlxalq
aləmin məlumatlandırılması və bu faktın
dünya dövlətlərinin parlamentlərinin, siyasi dairələrinin
müzakirəsinə çıxarılması Azərbaycan
diaspor təşkilatlarının əsas fəaliyyət
istiqamətlərindən hesab olunur.
AFGA
bu günə kimi bir sıra kiçik və böyük həcmli
tədbirlərə imza atmışdır. Bu tədbirlər
sırasına milli bayramlar (Novruz, Respublika günü, Həmrəylik
günü, Yeni il), qan
yaddaşımız olan 20 yanvar və Xocalı faciəsinin
anma mərasimləri, foto və rəsm sərgiləri,
konsertler, universitetlərdə Azərbaycanın müxtəlif
baxışlardan təqdimatı, xüsusi gecələr və
s daxildir.
Təşkilat təkcə tədbirlərlə
kifayətlənmir, həmçinin fransız oxucusuna Azərbaycanı,
azərbaycanlı oxucuya
Fransanı tanıtmaq məqsədilə iki dildə nəşr
edilən “Körpü” adlı
jurnalın naşiri. Artıq
jurnalın üçüncü nömrəsinin üzərində
işlərə başlanılıb və onun 2011-ci ilin
dekabr ayının sonunda çapdan çıxarılması
nəzərdə tutulub.
Bu məsul
təşkilatın katibi olan və
tədbirlərdə fəal iştirak edən Günel Çəndirovanın
fəaliyyəti bu baxımdan tərifəlayiq hesab
olunmalıdır. Gəncliyinə rəğmən o, Azərbaycan
həqiqətlərinin Fransa ictimaiyyətinə
çatdırılması üçün əlindən gələni
edir. Əslən Qazax rayonundan olan G.Çəndirova orta məktəbi
Bakıda bitirib. Bu illərdən fəallığı ilə
sinif yoldaşlarından fərqlənib. Məktəb illərində
keçirilən olimpiadalarda iştirak edərək, diplomlarla
mükafatlandırılıb. Bunun məntiqi nəticəsi
kimi 2005-ci ildə Bakı Dövlət Universitetinin Şərqşünaslıq
fakültəsinin “İbri dili və ədəbiyyatı”
ixtisasına daxil olur. Amma tale onu başqa istiqamətdə təhsil
almağa sövq edir:
“Bitirdiyim
ibrani dili ixtisası üzrə magistraturaya qəbul 4 ildən
bir aparıldığı üçün bu arzumu həyata keçirə bilmədim.
Lakin təhsil aldığım müddətdə turizm sahəsi
diqqətimi çox çəkirdi. Azərbaycanda bu sahəyə
getdikcə diqqət ayrılmağa və qayğı göstərilməyə
başlanırdı. Beləliklə, ikinci ixtisas oxumaq qərarına
gəldim. Və Fransada ilk təhsil aldığım
universitet Fransanın cənub-şərq bölgəsində
yerləşən Alp zonasının Savua (Savoie) regionunun
Şamberi (Chambery) şəhərində yerləşən
Savua Universiteti oldu. Beynəlxalq Turizm sahəsi üzrə
bakalavr təhsilimi məhz bu universitetdə uğurla başa
vurdum. Hazırda isə Paris “1 Pantheon-Sorbon” universitetinin turizm
və hotelçilik fakültəsinin “Beynəlxalq Turizmin
İqtisadi İnkişafı” ixtisasının birinci kurs
magistratura tələbəsiyəm.
Azərbaycan
təhsil sistemi sahəsində son illər kifayət qədər
inkişaf yolu keçib. Hər il Azərbaycandan Fransaya təhsil
almağa gələn tələbələrin sayında da bu
artım gözəçarpacaq
dərəcədədir. Bu isə, şübhəsiz ki, Azərbaycan
diasporunun güclənib, inkişaf etməsi ilə
müşahidə olunur. Mənim də Fransaya gəlməyimə
səbəb məhz təhsil sistemi ilə bağlı oldu.
Fransada, artıq iki ildir ki,
yaşayır və təhsilimi davam etdirirəm”.
Müsahibimin
sözlərinə görə, bütün bunlar gələcəkdə
Azərbaycanın nüfuzunun Fransada güclənməsinə
səbəb olacaq. Gənclərin burada təhsil alması,
yüksək fəallıqları ilə seçilməsi
müsbət imicin yaradılması ilə nəticələnir.
-Fransa ilə Azərbaycanı
müqayisə etsəniz, hansı fərqli cəhətləri
görə bilərsiniz? Çatışmayan nədir?
-Fransa
və Azərbaycan təhsil baxımından çox fərqlidir.
Fransada elm olduqca çox inkişaf edib. Tələbələrin
təhsil sahəsinə münasibəti çox ciddidir və
güclü rəqabət var. Kitabxanalara gəldikdə,
çeşid və assortiment cəhətdən kitab
qıtlığı ilə qarşlaşmırsan. Tələbələr
vaxtlarının çox böyük bir qismini kitabxanalarda
keçirərək maariflənirlər. Bütün bunlar
yüksək səviyyəli təhsil almağa imkan
yaradır.
Fransa
dövləti hər zaman tələbələrə çox
yüksək dəyər verir və təhsil aldıqları
dövr ərzində də tələbə həyatı ilə
yanaşı, ictimai həyatda da onlara kömək etməyə
çalışır. Fransada milliyyətindən
asılı olmayaraq, bütün tələbələrə
25 yaşına qədər ictimai nəqliyyat vasitələrində
güzəşt edilir, tələbə yataqxanalarındyer
verilir, aylıq müavinət ayrılır və.s.
-Fransada fəaliyyət göstərən
Azərbaycan diasporu yetərincə fəaliyyət göstərirmi?
Hansı zəif cəhətləri var?
-Fransada
Azərbaycan diasporu erməni diasporu qədər güclü
ola bilməsə də, yetərincə fəaliyyət
göstərmək üçün əlindən gələni
etməyə çalışır. Mütəmadi olaraq Azərbaycan
mədəniyyətinin təbliği üçün tədbir
və konsertlər keçirir. Bildiyiniz kimi, son zamanlar
Fransada Azərbaycan mədəni günləri kimi tədbirlərin
sayı getdikcə çoxalır. Bunun gerçəkləşməsi
üçün diaspor və eyni zamanda Azərbaycan dövləti
də yaxından səy göstərir. Fikrimcə, vaxt
keçdikcə daha da güclənəcəyik. Burada təhsil
alan, işləyən bütün azərbaycanlılar əllərindən
gəlini edirlər və bu, nəticəsiz qala bilməz. -Erməni yalanlarının ifşa
olunması üçün hansı addımları
atmısınız? Bu məsələdə
qarşınıza hansısa maneələr
çıxırmı?
-Erməni diasporu Fransada yetərincə söz sahibidir. Etiraf edim ki, bu
vəziyyətdə Azərbaycanın
lehinə addımlar atmaq elə də asan deyil.
Hər zaman düşmən ölkənin diasporunun maneələri ilə üzləşirik. Lakin bu çətinliklərə baxmayaraq,
erməni vəhşiliklərinin
ifşa olunmasını
bacardığımız qədər,
bizə icazə veriləcək dərəcədə,
yetərincə təbliğ
edirik. Fransada hər il
“20 Yanvar”, “Xocalı soyqırımı”, “31 Mart” irimiqyaslı
formada müxtəlif tipli aksiyalar, sərgilər, stendlər,
jurnallar vasitəsi ilə ictimaiyyətə çatdırılır.
Hər il “Xocalı soyqırımı” Justice pour Khojali
- “Xocalıya ədalət”
beynəlxalq məlumat
və təşviqat kampaniyası çərçivəsində
erməni zorakılıqları,
erməni təcavüzü,
təcavüzün ağır
nəticələri qənaətbəxş
dərəcədə aşılanır
və ictimaiyyətə
çatdırılır. Və
hər il
təbliğat aksiyası
son olaraq erməni səfirliyi qarşısında
sona çatır. Bu, balansın getdikcə
bizim xeyrimizə dəyişməsinə təsir
edir.
-Yaşadığınız
ölkədəki azərbaycanlıları
eyni məqsəd ətrafında birləşdirmək
mümkün olubmu, yoxsa, yenə də fikir ayrılıqları
var?
-Dünyanın hansı qitəsində yaşamasından
asılı olmayaraq, insanlar arasında fikir ayrılıqları həmişə mövcud
olub və olacaqdır. Təbii ki, hamı hər şeyi eyni cür fikirləşib
və qərar verə bilməz.Amma onu da nəzərinizə
çatdırmaq istərdim
ki, Fransada yaşayan azərbaycanlıların
böyük əksəriyyəti
bir - biri ilə sıx, qarşılıqlı münasibətdədirlər.
Bütün tədbirlərdə hamı bir araya
gəlib Azərbaycanın
tanıdılıb, təbliğ
olunması üçün
əllərindən gələni
maksimum dərəcədə
etməyə çalışırlar.
Mütəmadi olaraq müxtəlif
səpkili tədbirlərin,
konsertlərin, aksiyaların
gerçəkləşdirilməsində
yaxından iştirak edirlər.
-Fransada yaşayan azərbaycanlıların
hüquqları nə dərəcədə təmin olunur?
Yerli əhalinin Azərbaycana münasibəti necədir?
-Fransada
azərbaycanlılar say etibarilə az olduqları
üçün demək olar ki, tanınmırlar. Biz AFGA
olaraq Fransada Azərbaycanın tanınmasına səy göstəririk.
Fransanın müxtəlif universitetlərində təhsil alan
tələbələr AFGA-nın tərkib hissəsində
say etibarilə çox olduqlarına görə universitet həyatında
yetərincə diaspor işlərini təbliğ etməyə
çalışır və demək olar ki, artıq ilbəil
yetərincə nailiyyət qazana bilirik. Azərbaycan adı gələndə
nəinki keçmiş sovet
dövlətləri, bir azəri olaraq çox istərdik
ki, ölkəmizin adı məhz Türkiyə, BƏƏ,
Rusiya qədər tanınsın. Bunun üçün də
biz gənclər bu sahədə əlimizdən gələni
maksimum dərəcədə etməyə
çalışırıq. Bəlkə getdikcə Fransa-Azərbaycan
münasibətlərinin qarşılıqlı anlaşma nəticəsində
Fransanın Azərbaycanda açılacaq liseyi və Azərbaycanın
Fransada açılacaq olan “Mədəniyyət evi”ndən
sonra münasibətlərimiz lap geniş və sıx vüsət
alar.
-Orada gerçəkləşən
tədbirləri, aksiyaları maliyyələşdirməkdə
Bakıdan dəstək alırsınızmı?
-Təşkilata
maliyyə baxımından yardım Azərbaycanın
Fransadakı səfirliyi tərəfindən göstərilir.
Məhəmməd TAĞIYEV
Paritet.-2011.- 12-14 noyabr.-S.10-11.