Finlandiyadakı diasporumuz fəaliyyətini daha da genişləndirir

Diaspor fəallarımız Almaniyada “20 il Dağlıq Qarabağ Respublikası” adlı konsert keçirilməsinə etiraz bəyanatı yayıblar

Finlandiyadakı diasporumuz Almaniyada “20 il Dağlıq Qarabağ Respublikası” adlı konsert keçirilməsinə qəti surətdə etiraz edir. Finlandiya Azərbaycan Assosiasiyasından “Paritet”ə verilən xəbərə görə, assosiasiyanın sədri Vasif Muradlının adından Ştuttqart şəhərinin baş meri Dr. Wolgang Schusterə, Almaniyanın Baden Vürtemberq əyalətinin Baş naziri Winfried Kretschmana, Baden Vürtemberq əyalətin dövlət nazirliyinin mətbuat xidmətinə, Almaniya dövlət rəhbərlərinə, “20 il Dağlıq Qarabağ Respublikası”adlı konsertin təşkilatçılarına ünvanlanmış müraciətdə xatırladılır ki, Ermənistan - Azərbaycan, Dağlıq Qarabağ münaqişəsinin nizama salınması istiqamətində bütün beynəlxalq təşkilatların, xüsusilə BMT, ATƏT, Avropa Şurası, o cümlədən Avropa Parlamentinin qəbul etdiyi sənədlərdə Azərbaycanın ərazi bütövlüyü, müstəqilliyi və suverenliyi təsdiq olunur.

Xatırladılır ki, beynəlxalq təşkilatlar, o cümlədən, Avropa Parlamentin Azərbaycanın ərazi bütövlüyünü dəstəkləyir və Dağlıq Qarabağ torpaqlarını Azərbaycan ərazisi hesab edir: ”Biz Finlandiya Azərbaycan Assosiasiyası AŞPA-nın Hüquqi işlər və insan hüquqları komitəsinin sədri Kristos Pirquridesin Ermənistan-Azərbaycan Dağlıq Qarabağ münaqişəsinin həlli yolları barədə fikirlərini Almaniyada keçirilməsi nəzərdə tutulan “20 il Dağlıq Qarabağ Respublikası” adlı konsertə dəstək olan dövlət məmurlarının nəzərinizə çatdıamaq istəyirik. “Ermənistanın Azərbaycana təzyiqi, Dağlıq Qarabağı və onun ətrafındakı 7 rayonu işğal altında saxlaması həm yerli, həm də beynəlxalq qanunların norma və prinsiplərinə ziddir”.

“Sizdən rica edirik ki, bu adda konsertin keçirilməsinə izn verməyəsiniz. Əks halda, Avropada fəaliyyət göstərən Azərbaycan diaspor təşkilatları birləşərək Azərbaycanın ərazi bütövlüyünün qorunması, məqsədi ilə, dövlətimizə dəstək olaraq bu konsertin təşkilatçılarını və təşkilatçılara dəstək olan məmurları beynəlxalq məhkəməyə vermək qərarına gəlmək məcburiyyətində olacağıq”-deyə bəyanatda bildirilir.

FAA bir Azərbaycan diaspor təşkilatı olaraq Almaniya dövlətinin rəhbərlərindən icra məmurlarından xahiş edir ki, Azərbaycan Respublikasının müstəqilliyinin bərpasının 20-ci ildönümü ərəfəsində İşğalçı Ermənistan dövlətini dəstəkləmək əvəzinə, Almanyada fəaliyyət göstərən Azərbaycan diaspor təşkilatlarına Azərbaycan mədəniyyəti, Dağlıq Qarabağ həqiqətləri adlı tədbirlər keçirməkdə dəstək olsun.

FAA əlaqələrini və fəaliyyyət dairəsini də genişləndirir. Belə ki, FAA Ramazan bayramını Finlandiya Türk dərnəyilə birgə avqustun 31-də Helsinki şəhərində qeyd edib. Assosiasiyadan qəzetimizə verilən məlumata görə, bayramda digər dinlərin nümayəndələri də iştirak edib. Kiçik yaşlı uşaqlar bayramı daha da şənləndirib.

Bu arada isə Flippinin Fillandiyadakı səfirliyinin təşkilatçılığı ilə “Qadınların Cəmiyyətdə rolu “adlı seminar keçirilib. Finlandiyada fəaliyyət göstərən azsaylı xalqların fəaliyyətdə olan diaspor cəmiyyətləri səfirlik tərəfindən bu seminara dəvət olunublar. FAA nəzdində fəaliyyət göstərən Qadınlar Cəmiyyətinin sədri Arzu Oqtay, hüquqşünas Cəmilə Tamayeva və cəmiyyətin digər üzvləri də bu seminarda iştirak ediblər. Seminarın keçirilməsində əsas məqsəd qadınların hüquqları və maraqlarının qorunmasına xidmət edən normalarla bağlı Finlandiyada olan icmaların əməkdaşlarının bilgilərini artırmaq olub. Seminarda çıxış edən Filippinin Finlandiyadaki səfiri xanım Maria Angelina Miciano Sta Catalina layihə və seminarın məqsədindən, qadın hüquqlarından söhbət açıb. Sonra mövzu ətrafında məruzə çıxışları edilib və iştirakçılara qadın hüquqlarının təminatı sahəsində reallıqlar və problemlər barədə ətraflı məlumat verilib. Seminar iştirakçıları məruzələr ətrafında müzakirələr aparıblar və mövzu ilə bağlı məruzəçilərə çoxsaylı suallarla müraciət ediblər.Seminarın sonunda sorğu anketi vasitəsi ilə seminarın işi qiymətləndirilib.

Günay MURADLI

Paritet.- 2011.- 15-16 sentyabr.- S.12.