Xocalı soyqırımı, Qarabağ hadisələri, Azərbaycan xanlıqları ilə bağlı seriallar təqdim olunub

Sona Vəliyeva: “Televiziya rəhbərləri ədabaz aparıcısını efirə çıxaracaqsa, bir müddətdən sonra öz reytinqlərini itirəcəklər”

“Bugün gənclər televiziyadakılara bənzəməyə çalışırlar. Bu çox kiçik detal kimi görünə bilər. Əslində mahiyyət etibarı ilə bu, böyük hadisədir. Gənclərin milli-mənəvi ruhda tərbiyə olunmasında televiziyaların rolu şərhsiz olaraq böyükdür və televiziyaların rəhbəri düşünməlidirlər ki, aşıladıqları tərbiyə biləvasitə öz övladlarına yönəlir”.

Bu barədə “Kaspi” qəzetinin rəhbəri, Milli Teleradio Şurasının üzvü Sona Vəliyeva mediyaya müsahibəsində deyib. Onun sözlərinə görə, MTRŞ hər həftə bütün kanallar üzrə monitorinq aparır: “Bütün verilişlər yazılır və istənilən verilişə istədiyimiz zaman təkrar baxıb nöqsanı araşdıra bilərik. Həftəlik iclasda isə biz radio və televiziyaların mənfi və müsbət cəhətlərini bildiririk. Biz həmin iclaslarda onlara iradlarımızı bildirərək tövsiyələr veririk. Həmin televiziyanın nümayəndələri nə qədər özlərini müdafiə etməyə çalışsalar da, şura da qanunları əsas tutaraq onların üzərinə gedir və onlardan nəyisə tələb etməyə tam ixtiyarı var”. Şura üzvü qeyd edib ki, iclaslarda hətta proqramda aparıcıların işlətdiyi sözün təhlili belə gedir.

S.Vəliyeva hər bir kanalın rəhbəri şuranın qanunlardan çıxış edərək onun üzərinə gəlməyini gözləmədən, cəmiyyətinə, millətinə xalqına bağlılıq keyfiyyətini ortaya qoyaraq verilişlər hazırlamasına üstünlük verməsini istədiyini deyib. Qeyd edib ki, MTRŞ-da belə bir deviz var: “Ailənə, övladına, özünə rəva bilmədiyin məzmunlu verilişləri, proqramı kanala gətirməyəcəksən”. Şura üzvü hesab edir ki, Azərbaycan milli-mənəvi xüsusiyyətini özündə daşıyan kanal rəhbəri buna yol verməməyə çalışır.

Şuranın qanunlarında televiziya verilişlərinə müdaxilə etmək səlahiyyətinin olmadığını, sadəcə olaraq tövsiyələr verdiyini deyən MTRŞ üzvü diqqətə çatdırıb ki, qanunun konkret elə bir maddəsi yoxdur ki, orada “evlənmə proqramı və ya mətbəx verilişlərinin dayandırılması” barədə şuraya səlahiyyət verilsin.

“Hər kanalın rəhbəri Azərbaycan milli-mənəvi dəyərlərinin onun rəhbərlik etdiyi kanalda hansı səviyyədə qorunması və yayımlanmasına nəzarət etməlidir. Bir Azərbaycan xanımı kimi, bir jurnalist kimi və söz adamı kimi evlənmə proqramlarının əleyhinəyəm. Bəlkə də, həmin proqramlar fiziki cəhətdən qüsurlu olaraq ünsiyyətə ehtiyacı olan insanlar üçün açılsaydı, biz bunu alqışlayardıq. Bir daha deyirəm ki, mən Azərbaycan xanımı kimi 18 yaşlı qızın evlənmə proqramına çıxıb, hətta atası ilə bərabər gəlməsini bəyənmirəm. Təkcə mən deyil, təmsil etdiyim Teleradio Şurası da bu proqramları bəyənmir. Yenə qeyd edirəm ki, kanal rəhbərləri özlərinin şəxsi maraqlarından proqramların məzmununa yanaşmamalıdır”-deyə o qeyd edib.

Mətbəx proqramlarına gəldikdə isə, S.Vəliyeva bildirib ki, əgər orada nümayiş olunan yemək nüsxələri bizim sağlamlığımıza, milli mətbəximizin təbliğinə yol açırsa, onu bəyənəcəyik: “Əgər istənilən mətbəx proqramından yağ-soğan iyi alacağıqsa, bəyənməyəcəyik. Bəzən kanal rəhbərləri bunu reytinqlə bağlayırlar. Mən burdan bir daha demək istəyirəm ki, bütün məsələləri reytinqlə bağlamaq olmaz, reytinqdən əlavə bir də bizim malik olduğumuz dəyərlər sistemi var. Hesab edirəm ki, bütün malik olduqlarımızın üstündə dəyərlər durmalıdır və həmin dəyərlər bizim fəaliyyətimizi, bizim həyatımızı, bizim gələcəyimizi və cəmiyyətimizin inkişafını tənzimlənməlidir”.

Televiziyaların dil məsələsinə də toxunan MTRŞ üzvü bunun birbaşa kanal rəhbərliyindən aslı olduğunu deyib. Bildirib ki, televiziya rəhbərləri zaman-zaman özünün nitqi qüsurlu, amma ədabaz aparıcısını efirə çıxardacaqsa, bir müddətdən sonra öz reytinqlərini itirəcəklər: “Bu səbəbdən kanallar nitqi gözəl olan, nitq mədəniyyətinə sahib olan aparıcıları ekrana gətirməlidir. İndi də müğənnilər aparıcılıq edir və biz şura olaraq bunu bəyənmirik. Çünki onlar özlərinin şəxsi keyfiyyətlərini ortaya qoyaraq proqrama reytinq qazandırırlar. Bu proqramlar da bəzən ədabazlıqdan başqa bir şey deyil. Mən indi ad çəkmək istəmirəm, amma hazırda bir çox müğənnilər veriliş aparır və yalnız bəziləri sevilə-sevilə izlənilir. Ola bilər ki, həmin müğənni öz sənətində birincidir və böyük uğur qazanıb. Bu o demək deyil ki, o gözəl aparıcı ola bilər. Çünki aparıcılıq özü bir mərhələli məktəbdir”. Onun sözlərinə görə, kanal rəhbərləri bunun üzərində çox dayanmalı və düşünməlidirlər.

Milli serialların çəkilməsi məqsədilə MTRŞ-nın dövlət tərəfindən ayrılan maliyyəni telekanallar arasında böldüyünü deyən S.Vəliyeva bunu Azərbaycan məkanında milli-mənəvi dəyərlərə xidmət baxımından düşünülmüş və planlaşdırılmış addım olduğunu deyib.

“Burada bizim teleseriallarımız mütləq Azərbaycan milli-mənəvi dəyərlərinin qorunmasına xidmət edəcək və hesab edirəm ki, həmin əcnəbi serialların bizim televiziyalardan çıxarılması nə boşluq, nə də ki nostalji hiss yaratmamalıdır. Bunlar olmamalıdır. Çünki bütün inkişaf etmiş ölkələrdə həmin ölkələrin milli serialları göstərilir. Bu həm istehsal baxımından televiziyalarımızı irəli aparacaq, həm kadrların üzə çıxmasına şərait yaradacaq”-deyə o qeyd edib.

Digər məqsədin milli-mənəvi dəyərlərin qorunması olduğunu deyən şura üzvü bildirib ki, hazırda MTRŞ-yə təqdim olunan filmlər arasında, xüsusilə də Xocalı soyqırımı, Qarabağ hadisələri, Azərbaycan xanlıqları ilə bağlı seriallar da təqdim olunub. Bunun yerinə düşmüş qərar olduğunu deyən S.Vəliyeva qeyd edib ki, mayın əvvəlindən xarici serialların bizim televiziya məkanlarından çıxarıldığının şahidi olacağıq və zaman-zaman milli seriallarımız onların yerini tutacaq.

Serialların keyfiyyətinə gəlincə MTRŞ üzvü bildirib ki, seriallar ələnəcək və yerdə yaxşısı qalacaq. Onu da qeyd edib ki, serialların çox çəkilməsi bizim xeyrimizədir, bu zaman televiziya kanalının seçimləri çox olacaq, çox seçim olandan sonra, təbii ki, ən keyfiyyətlisi seçiləcək.

“Bu kanal rəhbərliyindən asılı olan bir şeydir. İstədiyi gündə komediya tərzdə olanı verəcək və ya ayrı gündə tarixi mövzulardan çəkilmiş serialı təqdim edəcək. Bizi düşündürən əsas məsələ istehsal məsələsidir. Buna həm dövlət dəstəyi var, həm də bizə olan müraciətlərdən aydın olur ki, tarixi faktlara, gündəlik məişət problemlərinə əks olunmuş ssenarilər artıq mövcuddur. Aydındır ki, kimi hansı məsələ narahat edirsə, o mövzuya müraciət edəcək. Hazırda əsas məsələ seriallarımızın televiziya kanallarında yer almasıdır. Zaman-zaman isə yaxşı-pis məsələsi süzgəcdən keçiriləcək və keyfiyyətsiz filmlər öz-özünə kənarlaşacaq” -deyə S.Vəliyeva vurğulayıb.

NƏRİMAN

Paritet.-2012.-28-30 aprel.-S.4.