Moskvada Sərxan Sərxanın yubiley gecəsi keçirilib

Moskva Beynəlxalq Musiqi Evində populyar estrada müğənnisi, Azərbaycanın əməkdar artisti Sərxan Sərxan psevdonimi ilə tanınan Sərxan Qurbanovun 60 illiyinə həsr olunan yubiley gecəsi keçirilib. Yubiley gecəsində Azərbaycanın Rusiyadakı fövqəladə və səlahiyyətli səfiri Polad Bülbüloğlu, diplomatik korpusun üzvləri, Rusiyadakı azərbaycan diasporunun nümayəndələri, qonaqlar və bir çox jurnalistlər iştirak ediblər.

Sərxan Sərxan yubiley gecəsinə təşrif buyurmuş hər kəsə öz minnətdarlığını bildirərək özünün məşhur kompozisiyalarını ifa edib.

Dinləyicilər xüsusi sevgi ilə “ay gecikən məhəbbətim” musiqi parçasını dinləyiblər. Bu musiqi parçası 1980-ci illərdə Azərbaycanda çox popluyar olub, onun ifaçısı Sərxan isə romantik qəhrəmanı təcəssüm etdirib.Yubiley gecəsində muğənninin dostları, gecəyə toplaşan qonaqlar onu təbrik edərək onunla xoş xatirələrini bölüşüblər.

Qeyd edək ki, öz yaradıcılıq karyerasına Sərxan gitarada ispan musiqilərini ifa edərək başlayıb. 1960-cı illərin əvvəllərində onu Tom Cons, Stiv Uander, Frenk Sinatra, Rey Çarlz kimi məşhur sənətkarların musiqiləri ruhlandırıb.

Sərxan Bakıda ən reytinqli müğənni olub və bir çox konsertlər verib. 1991-ci ildə müğənni Moskvaya köçüb, dünyanın bir çox ölkələrini qastrol səfərləri ilə dolaşıb və rus dilində romanslar ifa etməyə başlayıb.Yubiley gecəsində onun ifasında “Sevgilim”, “Yalqızam yalqız”, “Fialka” kimi mahnılar da səslənib.

Tədbirdə həmçinin onun özünün çəkildiyi “Musiqi müəllimi” filmindən fraqment də göstərilib.Yubiley gecəsində ən böyük sürpriz isə “Gəl ey səhər” mahnısının ifası zamanı olub. Bu mahnını ifa edərək Sərxan Azərbaycanın xalq artisti, bəstəkar, müğənni və Azərbaycanın Rusiyadakı səfiri Polad Bülbüloğlunu səhnəyə dəvət edib.

“Əgər mən səhnəyə çıxdımsa, onda gəl hamının bildiyi daha bir mahnını birlikdə ifa edək”- deyə Polad Bülbüloğlu bildirib. Onların ifasında “Zəng et” mahnısı sürəkli alqışlarla müşaiyət olunub.

Yubiley gecəsində Sərxan həmçinin mədəniyyət və incəsənətdə göstərdiyi xidmətə, xalqların mədəni yaxınlaşması və zənginləşməsi istiqamətindəki fəaliyyətinə görə İctimai Təltiflər üzrə Ümumrusiya Şurasının medalına da layiq görülüb.Tədbirdə S.Sərxanı həmçinin Özbəkistanın əməkdar artisti, estrada mahnılarının ifaçısı Nataliya Nurməhəmmədova da təbrik edib.“Mən Sərxanı 30 ildir ki tanıyıram və onunla qürür duyuram”- deyə o qeyd edib.

3 saatlıq konsertin sonunda musiqiçi tamaşaçıların gur alqış sədaları altında “Mənin yolum” və “Mən sənin oğlunam, Azərbaycan” adlı məşhur musiqi parçalarını da ifa edib. “Mən heç vaxt unutmayacağam ki, mən harada dünyaya gəlmişəm, mən Azərbaycanın oğluyam”- deyə S. Sərxan qeyd edib və konserti təşkil etdiklərinə görə Heydər Əliyev adına Fonda və Azərbaycanın Rusiyadakı səfirliyinə öz minnətdarlığını bildirib.

Əlimərdan SULTANOV, Moskva

Paritet.-2012.-1-3 dekabr.-S.16.