Dədə Qorqud heykəli və “Dədə Qorqud dünyası” tarixi-etnoqrafik kompleksinin yaradılması haqqında

AZƏRBAYCAN RESPUBLİKASI PREZİDENTİNİN FƏRMANI

Azərbaycan xalqının, bütün türk xalqlarının qədim və zəngin mədəniyyətinin ən möhtəşəm abidələrindən biri olan "Kitabi - Dədə Qorqud" dastanının ölkəmizdə daha geniş təbliğini təmin etmək, onun qəhrəmanlarının xatirəsini əbədiləşdirmək məqsədilə və "Kitabi - Dədə Qorqud" dastanının 1300 illik yubileyi üzrə Dövlət Komissiyasının tədbirlər planına uyğun olaraq qərara alıram:

1. Bakı şəhərində Dədə Qorqud heykəli ucaldılsın. Azərbaycan Respublikasının Mədəniyyət Nazirliyi və Bakı şəhər İcra Hakimiyyəti Rəssamlar İttifaqı və Memarlar İttifaqı ilə birlikdə heykəlin yeri ilə bağlı təkliflərini 10 gün müddətində hazırlayıb Azərbaycan Respublikasının Prezidentinə təqdim etsin.

2. Bakı şəhərinin Nərimanov rayonu ərazisində yerləşən Uşaq dəmir yolu bağının və ona bitişik Şəhriyar adına bağın ərazisində "Dədə Qorqud dünyası" tarixi- etnoqrafik kompleksi yaradılsın. Təbii əhəmiyyətini nəzərə alaraq "Dədə Qorqud dünyası" tarixi - etnoqrafik kompleksinə milli park statusu verilsin. Azərbaycan Respublikasının Mədəniyyət Nazirliyi, Bakı şəhər İcra Hakimiyyəti və Azərbaycan Elmlər Akademiyası Rəssamlar İttifaqı və Memarlar İttifaqı ilə birlikdə heykəlin və kompleksin baş planının layihəsini müsabiqə yolu ilə müəyyənləşdirib 2000-ci il iyunun 1-nə qədər Azərbaycan Respublikasının Prezidentinə təqdim etsin.

3. Azərbaycan Respublikasının Nazirlər Kabineti Bakı şəhər İcra Hakimiyyəti ilə birlikdə Uşaq dəmir yolu bağının və Şəhriyar adına bağın ərazisində yerləşən dövlət və qeyri-dövlət təşkilatların, müəssisələrin və mülkiyyət formasından asılı olmayaraq bütün digər obyektlərin Azərbaycan Respublikasının qanunları ilə müəyyən edilmiş qaydada köçürülməsini təmin etsin.

4. Azərbaycan Respublikasının Nazirlər Kabinetinə tapşırılsın ki:

Uşaq dəmir yolu bağının Azərbaycan Dəmir Yolu İdarəsinin balansından Bakı şəhər İcra Hakimiyyətinin balansına verilməsini təmin etsin;

bu fərmandan irəli gələn digər məsələləri həll etsin.

Azərbaycan Respublikasının Prezidenti Heydər Əliyev

Bakı şəhəri, 1 aprel 2000-ci il

№ 312

Azərbaycan Respublikasının Qanunvericilik toplusu. – 2000. – 30 aprel, № 4. – S. 2046.