“Azərbaycan alüminiumu” Səhmdar Cəmiyyətinin yaradılması və idarəetməyə verilməsi haqqında

AZƏRBAYCAN RESPUBLİKASI PREZİDENTİNİN SƏRƏNCAMI

Ölkənin alüminium sənayesi müəssisələrinin maliyyə-iqtisadi vəziyyətini sağlamlaşdırmaq, onların inkişafı üçün investisiyaların və yeni texnologiyanın cəlb olunmasına əlverişi şərait yaratmaq və bazar iqtisadiyyatı prinsiplərinə uyğun olaraq idarə olunmasını təmin etmək məqsədi ilə qərara alıram:

1. "Sumqayıtəlvanmetal", Gəncə "Gil-torpaq" istehsalat birliklərinin və Zəylik alunit mədən idarəsinin bazasında səhmlərinin 100 faizi ilkin mərhələrdə dövlətə məxsus olan "Azərbaycan alüminiumu" ("Azəralüminium") Səhmdar Cəmiyyəti yaradılsın.

2. Azərbaycan Respublikasının Dövlət Əmlakı Nazirliyinə tapşırılsın:

2.1. Qanunvericiliyə uyğun olaraq "Azəralüminium" Səhmdar Cəmiyyətinin əlverişli şərtlərlə idarəetməyə verilməsi barədə xarici şirkətlərlə danışıqlar aparsın və müvafiq müqavilə bağlasın.

2.2. İdarəetməyə verilmə barədə müqavilədə aşağıdakı məsələləri əks etdirsin:

idarəetməyə götürən tərəfindən "Azəralüminium" Səhmdar Cəmiyyətinin tərkibinə daxil olan müəssisələrin fəaliyyətini əsaslı bərpa etmək və maliyyə vəziyyətini sağlamlaşdırmaq;

müəssisələrin səmərəliliyini təmin etmək məqsədilə yaranmış borcları (əmək haqqı borcları istisna olmaqla) dondurmaq, istifadə olunan enerjidaşıyıcıları (elektrik enerjisi, təbii qaz), istehsalata lazım olan xammal, material və avadanlığın, hazır məhsulların daşınmasında nəqliyyat xərcləri üzrə güzəştli tariflər tətbiq etmək.

3. Azərbaycan Respublikasının Nazirlər Kabineti "Azəralüminium" Səhmdar Cəmiyyətinin idarəetməyə verilməsi barədə müqaviləni Azərbaycan Respublikası Prezidentinin təsdiqinə təqdim etsin.

4. "Metallurgiya sənayesində iqtisadi islahatların sürətləndirilməsi haqqında" Azərbaycan Respublikası Prezidentinin 1998-ci il 19 may tarixli 805 nömrəli Sərəncamının 1-ci və 2-ci bəndlərindən "Sumqayıtəlvanmetal", Gəncə "Gil-torpaq" istehsalat birlikləri və Zəylik alunit mədən idarəsi" sözləri çıxarılsın.

4. Bu Sərəncam dərc olunduğu gündən qüvvəyə minir.

Azərbaycan Respublikasının Prezidenti Heydər Əlİyev

Bakı şəhəri, 25 aprel 2000-ci il
                   № 398

Azərbaycan Respublikasının Qanunvericilik toplusu. – 2000. – 30 aprel, № 4. – S. 2068-2069.