Rəsul Rzanın 90 illik yubileyinin keçirilməsi haqqında

AZƏRBAYCAN RESPUBLİKASI PREZİDENTİNİN SƏRƏNCAMI

2000-ci ildə müasir Azərbaycan ədəbiyyatının görkəmli nümayəndələrindən biri, tanınmış ictimai xadim, Sosialist Əməyi Qəhrəmanı, SSRİ Dövlət mükafatı laureatı, əməkdar incəsənət xadimi, xalq şairi Rəsul İbrahim oğlu Rzayevin (Rəsul Rzanın) anadan olmasının 90 illiyi tamam olur.

Azərbaycan poeziyasını yeni forma və üslub keyfiyyətləri, məzmun rəngarəngliyi, orijinal obrazlarla zənginləşdirmiş novator şair Rəsul Rzanın yaradıcılığı XX əsr Azərbaycan ədəbiyyatı tarixinin ən parlaq səhifələrindən birini təşkil edir. Rəsul Rza analitik bədii idrak, mövzuya dərindən nüfuz etmək bacarığı, həyat hadisələrinə fəlsəfi münasibətlə seçilən poeziyası ilə yanaşı ədəbi tənqid və publisistika, dünya poeziyasının ən gözəl nümunələrinin tərcüməsi sahələrində də zəngin irs qoymuşdur.

Azərbaycan ədəbiyyatının inkişafında mühüm rol oynamış Rəsul Rzanın 90 illik yubileyinin respublikada layiqincə keçirilməsini təmin etmək məqsədilə qərara alıram:

1. Rəsul Rzanın 90 illik yubileyi tədbirlərinin hazırlanması və həyata keçirilməsi üçün aşağıdakı tərkibdə Təşkilat Komitəsi yaradılsın:

Təşkilat Komitəsinin sədri:

Elçin Əfəndiyev                          - Azərbaycan Respublikası Baş nazirinin müavini

Təşkilat Komitəsinin üzvləri:

Rəfael Allahverdiyev                  - Bakı şəhər İcra Hakimiyyətinin başçısı

Fatma Abdullazadə                    - Azərbaycan Respublikası Prezidentinin İcra Aparatının Humanitar siyasət şöbəsinin müdiri

Fərəməz Maqsudov                    - Azərbaycan Elmlər Akademiyasının prezidenti

Polad Bülbüloğlu                        - Azərbaycan Respublikasının mədəniyyət naziri

Misir Mərdanov                          - Azərbaycan Respublikasının təhsil naziri

Nizami Xudiyev                          - Azərbaycan Dövlət Televiziya və Radio Verilişləri Şirkətinin sədri

Şamil Şahməmmədov                 - Azərbaycan Dövlət Teleqraf Agentliyinin (AzərTAC) baş direktoru

Oqtay Mirqasımov                     - "Azərkinovideo" İstehsalat Birliyinin baş direktoru

İsmayıl Vəliyev                           - "Azərbaycan Ensiklopediyası" Nəşriyyat-Poliqrafiya Birliyinin baş direktoru

Bəkir Nəbiyev                             - Azərbaycan Elmlər Akademiyasının Ədəbiyyat, dil və incəsənət bölməsinin akademik-katibi

Anar Rzayev                               - Azərbaycan Yazıçılar Birliyinin sədri

Bəxtiyar Vahabzadə                   - xalq şairi

Balaş Azəroğlu                            - xalq şairi

Fikrət Qoca                                  - xalq şairi

Qabil İmamverdiyev                   - xalq şairi

Vaqif Səmədoğlu                        - xalq şairi

Gülrux Əlibəyova                       - tədqiqatçı-alim

Rəfael Hüseynov                         - tədqiqatçı alim

2. Azərbaycan Respublikasının Nazirlər Kabineti bu Ssərəncamdan irəli gələn məsələləri həll etsin.

Azərbaycan Respublikasının Prezidenti Heydər Əlİyev

Bakı şəhəri, 29 aprel 2000-ci il
                   № 403

Azərbaycan Respublikasının Qanunvericilik toplusu. – 2000. – 30 aprel, № 4. – S. 2072-2074.