Yaponiya Hökuməti tərəfindən ayrılmış qrant hesabına alınacaq texnikanın istifadəsi haqqında

AZƏRBAYCAN RESPUBLİKASININ NAZİRLƏR KABİNETİ QƏRARI

Azərbaycan Respublikası ilə Yaponiya Hökuməti arasında 1999-cu il 15 mart tarixdə imzalanmış Notalar mübadiləsinə əsasən Azərbaycan Respublikasında ərzaq istehsalının artırılmasına kömək məqsədi ilə Yaponiya Hökumətinin ayırdığı 376047250 iyen məbləğində qrant vəsaiti hesabına alınacaq kənd təsərrüfatı texnika və avadanlığının istifadəsini təmin etmək məqsədi ilə Azərbaycan Respublikasının Nazirlər Kabineti qərara alır:

1. Müəyyən edilsin ki, Yaponiya Hökuməti tərəfindən 2000-ci il üçün ayrılmış 376047250 iyen qrant vəsaiti hesabına alınacaq kənd təsərrüfatı texnikası və avadanlıq "Yaponiya Hökuməti tərəfindən ayrılmış qrant hesabına alınmış texnikanın istifadəsi haqqında" Azərbaycan Respublikası Nazirlər Kabinetinin 1998-ci il 7 aprel tarixli, 70 nömrəli qərarı ilə təsdiq edilmiş "Yaponiya Hökuməti tərəfindən ayrılmış qrant hesabına alınmış texnikanın müqavilə əsasında icarəyə verilməsi və ya satılması nəticəsində əldə edilmiş vəsaitin Tərəfdaşlıq Fonduna yığılması Qaydaları"na əsasən istifadə edilir.

Qaydalarda nəzərdə tutulmuş Səhmdar Kommersiya Aqrar-Sənaye Bankının səlahiyyətləri Azərbaycan Respublikası Nazirlər Kabinetinin 2000-ci il 21 fevral tarixli, 40s nömrəli sərəncamına uyğun həmin bankın fəaliyyətini tənzimləyən yeni veriləcək məhdudlaşdırılmış lisenziya qüvvəyə mindikdən sonra Birləşmiş Universal Səhmdar Bankı tərəfindən həyata keçiriləcəkdir.

2. Rayon (şəhər) icra hakimiyyəti orqanlarına tapşırılsın ki, kənd təsərrüfatı məhsullarının istehsalı ilə məşğul olan və onlara xidmət göstərən fiziki və hüquqi şəxslər tərəfindən Yaponiya Hökumətinin qrantı hesabına respublikaya gətirilmiş traktor, taxılyığan kombayn və digər kənd təsərrüfatı maşınlarının alınmasında və ya müəyyən olunmuş qaydada icarəyə götürülməsində, habelə həmin texnikanın səmərəli istifadə edilməsində onlara lazımi şəraitin yaradılmasında əməli köməklik göstərsinlər.

3. Bu qərar imzalandığı gündən qüvvəyə minir.

Artur RASİ-ZADƏ

Azərbaycan Respublikasının Baş naziri

Bakı şəhəri, 17 aprel 2000-ci il
                   № 66

Azərbaycan Respublikasının Qanunvericilik toplusu. – 2000. – 30 aprel, № 4. – S. 2083-2084.