Azərbaycan Respublikasının Milli Bankı ilə Ukraynanın Milli Bankı arasında hesablaşmaların təşkili haqqında Sazişin təsdiq edilməsi barədə

Azərbaycan Respublikasının Qanunu

Azərbaycan Respublikasının Milli Məclisi qərara alır:

1. Azərbaycan Respublikasının Milli Bankı ilə Ukraynanın Milli Bankı arasında hesablaşmaların təşkili haqqında 2000-ci il martın 16-da Bakı şəhərində imzalanmış Saziş təsdiq edilsin.

2. Bu Qanun dərc edildiyi gündən qüvvəyə minir.

Azərbaycan Respublikasının Prezidenti Heydər ƏLİYEV

Bakı şəhəri, 18 iyul 2000-ci il

№ 920-IQ

Azərbaycan Respublikasının Milli Bankı ilə Ukraynanın Milli Bankı arasında hesablaşmaların təşkili haqqında

Saziş

«Tərəflər» adlandırılan Azərbaycan Respublikasının Milli Bankı (bundan sonra — Azərbaycan Respublikası Bankı) və Ukraynanın Milli Bankı (bundan sonra — Ukrayna Bankı) aşağıdakılar barədə razılığa gəlmişlər:

Maddə 1

1. Azərbaycan Respublikasının və Ukraynanın təsərrüfat subyektləri (hüquqi və fiziki şəxsləri) arasında bağlanmış müqavilələr (kontraktlar) üzrə onların arasında əmtəə (işlər, xidmətlər, intellektual mülkiyyət hüquqları) hesablaşmaları və ödənişləri Azərbaycan Respublikasının və Ukraynanın milli valyutalarında, habelə Azərbaycan Respublikasının və Ukraynanın qanunvericilik və digər normativ hüquqi aktlarına uyğun olaraq üçüncü ölkələrin valyutalarında həyata keçirilir.

2. Xarici iqtisadi fəaliyyət həyata keçirilərkən ödəniş valyutası və hesablaşmaların forması Azərbaycan Respublikasının və Ukraynanın təsərrüfat subyektləri tərəfindən müstəqil surətdə, onların arasında bağlanan müqavilələrdə (kontraktlarda), iki dövlətin ərazisində qüvvədə olan qanunlar və qaydalar çərçivəsində müəyyən edilir.

Maddə 2

1. 1-ci maddədə göstərilən hesablaşmalar və ödənişlər Azərbaycan Respublikasının və Ukraynanın müvəkkil banklarının qarşılıqlı razılaşma üzrə onların bir-birlərində açdıqları müxbir hesabları vasitəsilə aparılır. Müvəkkil banklar vasitəsilə həyata keçirilən hesablaşmalar üzrə qarşılıqlı ödəniş öhdəliklərinin və tələblərinin yerinə yetirilməsi üçün məsuliyyət tamamilə xarici iqtisadi fəaliyyət subyektlərinin üzərinə düşür.

2. Ukraynanın müvəkkil bankları valyuta qiymətliləri ilə əməliyyatlar aparmaq üçün Ukrayna Bankının lisenziyasını almış kommersiya banklarıdır.

3. Azərbaycan Respublikasının müvəkkil bankları xarici valyutada bank əməliyyatları aparmaq üçün Azərbaycan Respublikası Bankının lisenziyasını almış kommersiya banklarıdır.

4. Azərbaycan Respublikasının və Ukraynanın müvəkkil banklarında Azərbaycan Respublikasının və Ukraynanın milli valyutalarında, habelə üçüncü ölkələrin valyutalarında müxbir bankların hesablarının açılması və fəaliyyəti qaydaları Azərbaycan Respublikasının və Ukraynanın qanunvericilik və digər normativ hüquqi aktları ilə nizama salınır.

5. Hökumətlərarası sazişlər üzrə hesablaşmalar bu sazişlərdə nəzərdə tutulmuş qaydada həyata keçirilir.

Maddə 3

1. Azərbaycan Respublikası Bankında Ukrayna Bankının (Azərbaycan manatı ilə) və Ukrayna Bankında Azərbaycan Respublikası Bankının (qrivna ilə) açdıqları müxbir hesablarının aparılması qaydaları və rejimi Azərbaycan Respublikası tərəfindən milli valyutanın tətbiqi ilə əlaqədar Azərbaycan Respublikasının Milli Bankı ilə Ukraynanın Milli Bankı arasında banklararası hesablaşmaların təşkili haqqında 1994-cü il 18 mart tarixli Sazişə uyğun olaraq Tərəflər arasında bağlanmış ayrıca Müqavilə ilə nizama salınır.

2. Tərəflər razılığa gəlmişlər ki, onların bir-birlərində açdıqları müxbir hesabları vasitəsi ilə yalnız dövlətlərin mərkəzi banklarının funksiyalarından irəli gələn əməliyyatlar həyata keçirilsin.

Maddə 4

1. Azərbaycan Respublikasının müvəkkil bankları və Ukraynanın müvəkkil bankları müxbir münasibətləri haqqında onların arasında bağlanmış müqavilələr əsasında bir-birlərində, yaxud birtərəfli qaydada hesablar açırlar. Müqavilələrdə ödənişlərin və hesablaşmaların həyata keçirilməsinin texniki qaydaları və şərtləri müəyyən edilir.

2. Müxbir münasibətləri haqqında bağlanmış müqavilələr çərçivəsində Azərbaycan Respublikasının və Ukraynanın müvəkkil bankları qəbul olunmuş beynəlxalq bank təcrübəsinə və Tərəflərin dövlətlərindən hər birinin qanunvericilik və digər normativ hüquqi aktlarına uyğun olaraq, Azərbaycan Respublikasının və Ukraynanın milli valyutalarının qarşılıqlı surətdə alınmasını və satılmasını, Tərəflərin milli valyutalarında və üçüncü ölkələrin valyutalarında depozit əməliyyatlarını və kreditləşdirməni həyata keçirə bilərlər.

3. Tərəflərin dövlətlərinin müvafiq müvəkkil banklarının müxbir hesablarında Azərbaycan Respublikasının və Ukraynanın milli valyutaları ilə olan vəsaitdən Tərəflərin dövlətlərindən hər birinin qanunvericilik və digər normativ hüquqi aktlarına uyğun olaraq cari əməliyyatlar üzrə ödənişləri həyata keçirmək üçün istər Azərbaycan Respublikasının və Ukraynanın hüquqi və fiziki şəxslərinin xeyrinə, istərsə də üçüncü ölkələrin hüquqi və fiziki şəxslərinin xeyrinə istifadə edilə bilər.

4. Tərəflər müvəkkil bankların meydana çıxan öhdəliklərinin tənzimlənməsi üzrə məsuliyyət daşımırlar və müvəkkil banklar vasitəsi ilə həyata keçirilən ödənişlər, hesablaşmalar və əməliyyatlar üzrə saldo tarazlığını təmin etmirlər.

Maddə 5

1. Azərbaycan Respublikasının və Ukraynanın xarici iqtisadi fəaliyyət subyektləri Azərbaycan Respublikasının və Ukraynanın milli valyutasında olan pul vəsaiti ilə onların daxili valyuta bazarlarında Tərəflərin dövlətlərinin qanunvericilik və digər normativ hüquqi aktları ilə müəyyən olunmuş qaydada əməliyyatlar apara bilərlər.

2. Azərbaycan Respublikası qanunvericiliyində başqa hal nəzərdə tutulmadıqda, Ukraynanın müvəkkil bankları Azərbaycan Respublikasının daxili valyuta bazarında Azərbaycan Respublikasının müvəkkil bankları vasitəsi ilə əməliyyatlar aparırlar.

3. Ukraynanın qanunvericiliyində başqa hal nəzərdə tutulmadıqda, Azərbaycan Respublikasının müvəkkil bankları Ukraynanın daxili valyuta bazarında Ukraynanın müvəkkil bankları vasitəsi ilə əməliyyatlar aparırlar.

Maddə 6

1. Ukraynanın kommersiya banklarında Azərbaycan Respublikasının hüquqi şəxsləri (qeyri-bank idarələri) üçün hesabların açılması və aparılması Azərbaycan Respublikası Bankının müvafiq icazəsi olduqda Ukraynanın qanunvericilik və digər normativ hüquqi aktlarına müvafiq surətdə həyata keçirilir.

2. Azərbaycan Respublikasının kommersiya banklarında Ukraynanın hüquqi şəxsləri (qeyri-bank idarələri) üçün hesabların açılması və aparılması xarici bankda hesab açılması və ondan istifadə edilməsi üçün Ukrayna Bankının fərdi lisenziyası olduqda Azərbaycan Respublikasının qanunvericilik və digər normativ hüquqi aktlarına müvafiq surətdə həyata keçirilir.

Maddə 7

1. Ukraynanın kommersiya banklarında Azərbaycan Respublikasının fiziki şəxsləri — rezidentləri üçün Ukraynanın milli valyutasında və (yaxud) xarici valyutada hesabların açılması və aparılması Ukraynanın qanunvericilik və digər normativ hüquqi aktlarına müvafiq surətdə həyata keçirilir.

2. Azərbaycan Respublikasının kommersiya banklarında Ukraynanın fiziki şəxsləri — rezidentləri üçün Azərbaycan Respublikasının milli valyutasında və (yaxud) xarici valyutada hesabların açılması və aparılması Azərbaycan Respublikasının qanunvericilik və digər normativ hüquqi aktlarına müvafiq surətdə həyata keçirilir.

Maddə 8

1. Bir Tərəfin dövlətinin milli valyutasının digər Tərəfin dövlətinin milli valyutası ilə alınıb-satılması üzrə Azərbaycan Respublikasının və Ukraynanın müvəkkil banklarının əməliyyatları tələb və təklifi nəzərə almaqla hər əqd üzrə razılaşdırılmış alqı-satqı məzənnəsi üzrə Tərəflərin dövlətlərindən hər birinin valyuta bazarlarında qüvvədə olan xarici valyuta ticarəti qaydaları və şərtləri əsasında həyata keçirilir.

2. Tərəflərdən hər biri milli pul vahidinin rəsmi məzənnəsinin müəyyənləşdirilməsi qaydalarını müstəqil surətdə müəyyən edir.

3. Tərəflər milli valyutaların rəsmən müəyyən etdikləri məzənnələri barədə informasiyanı, habelə onların mərkəzi bankların funksiyalarını yerinə yetirməsi barədə digər informasiyanı daimi zəmində mübadilə edirlər.

Maddə 9

Tərəflərin dövlətlərinin ərazilərində Azərbaycan Respublikasının və Ukraynanın milli valyutalarında nağd pul vəsaitinin gətirilməsi və aparılması qaydaları Tərəflərin dövlətlərindən hər birinin valyuta qanunvericiliyi və müvafiq normativ hüquqi aktları ilə tənzimlənir.

Maddə 10

1. Qeyri-ticarət ödənişləri haqqında hökumətlərarası sazişlərdə başqa hal nəzərdə tutulmadıqda, qeyri-ticarət əməliyyatları üzrə ödənişlər sərbəst dönərli valyuta ilə həyata keçirilir.

2. Qeyri-ticarət əməliyyatları üzrə ödənişlər Tərəflərin dövlətlərindən hər birinin ərazisində qüvvədə olan qanunvericilik və digər normativ hüquqi aktlarla müəyyən olunmuş qaydada müvəkkil bankların müxbir hesabları vasitəsilə həyata keçirilir.

Maddə 11

Tərəflər öz fəaliyyətlərinə dair məsələlər üzrə bu Sazişin məzmunu barədə öz dövlətlərinin banklarına məlumat verirlər.

Maddə 12

1. Bu Sazişin qüvvəyə minməsi ilə əlaqədar olaraq, Azərbaycan Respublikasının milli valyutasının tətbiqi ilə əlaqədar Azərbaycan Respublikasının Milli Bankı ilə Ukraynanın Milli Bankı arasında banklararası hesablaşmaların təşkili haqqında 1994-cü il 18 mart tarixli Saziş qüvvəsini itirir.

2. Bu Sazişin təfsirinə və tətbiqinə aid bütün mübahisələr və fikir ayrılıqları Tərəflər arasında danışıqlar yolu ilə həll ediləcəkdir.

3. Tərəflərin danışıqlar yolu ilə razılığa gələ bilmədikləri mübahisələrə, əlavə sazişə uyğun olaraq, beynəlxalq arbitraj məhkəməsində baxılacaqdır.

Maddə 13

1. Bu Saziş onun qüvvəyə minməsi üçün zəruri olan müvafiq dövlətdaxili qaydaları Tərəflərin yerinə yetirdiklərini təsdiq edən yazılı bildirişin alındığı gündən qüvvəyə minir.

2. Saziş Tərəflərdən birinin bu Sazişin qüvvəsinə xitam vermək istədiyi barədə yazılı bildirişi günündən üç ay sonra qüvvəsini itirmiş hesab edilir.

3. Tərəflərin qarşılıqlı razılığına əsasən bu Sazişin müddəalarına əlavələr və dəyişikliklər edilə bilər. Bu Sazişdə dəyişikliklər və əlavələr yazılı surətdə rəsmiləşdirilir və Sazişin ayrılmaz tərkib hissəsidir. Dəyişikliklər və əlavələr bu maddədə nəzərdə tutulmuş qaydada müvafiq surətdə qüvvəyə minir.

Bu Saziş Bakı şəhərində 2000-ci il martın 16-da tarixində hər biri iki nüsxədə olmaqla Azərbaycan, ukrayna və rus dillərində imzalanmışdır. Bütün mətnlər eyni qüvvəyə malikdir. Bu Sazişin müddəalarının təfsiri məqsədləri üçün rus dilində olan mətn üstün qüvvəyə malikdir.

Azərbaycan Respublikasının Ukraynanın

Milli Bankı adından Milli Bankı adından

(imza) (imza)

Azərbaycan Respublikasının Qanunvericilik toplusu. – 2000. – 31 avqust, № 8. – S.3871-3875.