Azərbaycan Respublikasının Prezidenti Heydər Əliyev və Gürcüstan Prezidenti Eduard Şevarnadze tərəfindən Tbilisi şəhərində 2000-ci il martın 22-də imzalanmış Birgə Bəyanatın təsdiq edilməsi barədə

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi qərara alır:

I. Azərbaycan Respublikasının Prezidenti Heydər Əliyev və Gürcüstan Prezidenti Eduard Şevarnadze tərəfindən 2000-ci il martın 22-də Tbilisi şəhərində imzalanmış Birgə Bəyanat təsdiq edilsin.

II. Bu Qanun dərc edildiyi gündən qüvvəyə minir.

Azərbaycan Respublikasının Prezidenti Heydər ӘLİYEV

Bakı şəhəri, 18 iyul 2000-ci il

№ 924-IQ

BİRGӘ bəyanat

Gürcüstan Prezidenti E. Şevardnadzenin dəvəti ilə 22—23 mart 2000-ci il tarixlərində Azərbaycan Respublikasının Prezidenti H. Əliyev Gürcüstanda rəsmi səfərdə olmuşdur.

Ölkələrindəki siyasi, iqtisadi və sosial proseslərin gedişinə dair aparılmış danışıqlar və fikir mübadiləsi zamanı ikitərəfli əməkdaşlığın daha da inkişafı və dərinləşməsi məsələləri, qarşılıqlı maraq kəsb edən aktual regional və beynəlxalq problemlər müzakirə olunmuşdur.

Tərəflər, iki dövlət arasındakı strateji tərəfdaşlığa əsaslanan ikitərəfli əlaqələrin yüksək səviyyəsini məmnuniyyətlə təsdiq etdilər.

Tərəflər, beynəlxalq hüquq normalarına uyğun olaraq müstəqil, suveren, demokratik Azərbaycan və Gürcüstan dövlətlərinin qurulmasında,

habelə XXI əsrdə dövlətlərarası münasibətlərin keyfiyyətcə yeni səviyyəsinin inkişafı üçün qarşılıqlı surətdə maraqlı olduqlarını qeyd etmişlər.

Tərəflər XXI əsrdə ayrıca xətlərsiz Avropanın qurulmasının tarixi zəruriliyini təsdiq etdilər.

Tərəflər yeni beynəlxalq reallıqlar şəraitində regionda təhlükəsizliyin yeni sisteminin formalaşdırılması prosesinə yardım edilməsi və sabitliyin əsasının təmin edilməsi baxımından Azərbaycan-Gürcüstan əməkdaşlığının möhkəmləndirilməsinin artmaqda olan əhəmiyyətini qeyd etdilər.

Tərəflər əmin olduqlarını bildirmişlər ki, dövlət suverenliyi, hüquq bərabərliyi, ərazi bütövlüyü, sərhədlərin toxunulmazlığı, bir-birinin daxili işlərinə qarışmamaq, mübahisələrin sülh yolu ilə həll olunması prinsiplərinə, habelə digər ümumtanınmış beynəlxalq hüquq normaları və prinsiplərinə riayət olunması, Cənubi Qafqaz regionunda sülhün və təhlükəsizliyin təminatıdır.

Tərəflər region dövlətlərinin beynəlxalq tanınmış sərhədlərinin zorla dəyişdirilməsinə yönəlmiş, dövlətlərin təhlükəsizliyini və ərazi bütövlüyünü təhlükə altına alan insan hüquq və əsas azadlıqlarını demokratik prinsipləri və ümumbəşəri dəyərləri dağıdan təcavüz aktlarını, təcavüzkar separatizmi və terrorizmi bütün forma və təzahürlərində pislədilər və bu təhlükələrə qarşı mübarizədə birgə fəaliyyəti inkişaf etdirmək arzusunda olduqlarını bildirdilər.

Qeyd olunmuşdur ki, 8 mart 1996-cı il tarixli Azərbaycan Respublikası və Gürcüstan arasında Dostluq, əməkdaşlıq və qarşılıqlı təhlükəsizliyin möhkəmləndirilməsi haqqında 8 mart 1996-cı il tarixli Müqavilə, 1996-cı il martın 8-də Tbilisidə imzalanmış Qafqaz regionunda sülh, təhlükəsizlik və əməkdaşlıq haqqında Bəyannamə, Azərbaycan Respublikası və Gürcüstan arasında strateji əməkdaşlığın daha da dərinləşdirilməsi haqqında 18 fevral 1997-ci il tarixli Bəyannamə, qarşılıqlı münasibətlərin möhkəm bazasını təşkil edir və Cənubi Qafqaz regionunda sülhün və təhlükəsizliyin təminatına yönəldilmiş əsaslı sənədin hazırlanması üçün zəmin yaradır. Tərəflər, Azərbaycan Respublikası Prezidenti H. Ə. Əliyevin ATƏT-in İstanbul Sammiti zamanı irəli sürdüyü Cənubi Qafqazda təhlükəsizlik və əməkdaşlıq Paktını və ATƏT-in İstanbul Sammitinin nəticələrini və onun keçirilməsi zamanı qəbul olunmuş digər sənədləri yüksək qiymətləndirmiş, habelə XXI əsrdə Avropada təhlükəsizliyin və sabitliyin möhkəmləndirilməsinə yönəldilmiş Avropa təhlükəsizlik Xartiyasının əhəmiyyətini qeyd etmişlər.

Tərəflər BMT, ATƏT, Avroatlantika Tərəfdaşlıq Şurası, Avropa Şurası, MDB və digər beynəlxalq təşkilatlar və forumlar çərçivəsində əməkdaşlığı gələcəkdə də davam etdirməyə hazır olduqlarını bildirmiş və Avropa təhlükəsizliyinin yeni strukturunun səmərəliliyinin, hər şeydən əvvəl bütün dövlətlər tərəfindən götürülmüş öhdəliklərin yerinə yetirilməsindən, ATƏT, Avropa Şurası, Avropa Birliyi, BMT arasında qarşılıqlı fəaliyyət mexanizmlərinin yaradılmasından asılı olacağını təsdiq etmişlər.

Tərəflər Dağlıq Qarabağ münaqişəsi, Abxaziya, Gürcüstan münaqişəsi üzrə BMT və ATƏT-in qərarlarının və bu təşkilatlar çərçivəsində qəbul olunmuş digər sənədlərin tezliklə həyata keçirilməsinin zəruriliyini təsdiq etmişlər. Tərəflər Dağlıq Qarabağ münaqişəsi, Abxaziya, Gürcüstan münaqişəsi üzrə BMT və ATƏT-in qərarlarının və bu təşkilatlar çərçivəsində qəbul olunmuş digər sənədlərin tezliklə həyata keçirilməsinin zəruriliyini təsdiq etmişlər. Tərəflər tam əmindirlər ki, bu münaqişələrin həlli suverenliyə, ərazi bütövlüyünə və sərhədlərin toxunulmazlığına hörmət və riayət edilməsinə əsaslanaraq, Cənubi Qafqaz dövlətləri arasında sülhün, sabitliyin və etimadın əldə olunması üçün etibarlı təminat yaradacaqdır.

Tərəflər GUÖAM çərçivəsində əməkdaşlığın genişləndirilməsi və dərinləşdirilməsində məmnun olduqlarını bildirmiş və müntəzəm məsləhətləşmələr və qarşılıqlı fəaliyyət mexanizmlərinin təkmilləşdirilməsi və möhkəmləndirilməsi niyyətində olduqlarını təsdiq etmişlər.

Tərəflər Avroasiya nəqliyyat dəhlizinin geniş miqyaslı fəaliyyəti, Böyük İpək Yolunun bərpası, TRASEKA və İNOQEYT proqramlarının həyata keçirilməsinin tezləşdirilməsi məqsədi ilə birgə əməli tədbirlərin həyata keçirilməsinin müstəsna əhəmiyyətini qeyd etmişlər.

Danışıqlar zamanı Prezidentlər Xəzər regionundan neftin nəqlində əsas ixrac neft boru kəməri kimi Bakı-Tbilisi-Ceyhan neft boru kəmərinin tikilməsi və istismara verilməsi üzrə, o cümlədən tranzit üçün tariflər üzrə bütün əsas prinsipial məsələləri tamamilə razılaşdırdılar və cari ilin aprel ayında bütün zəruri sənədlərin hazırlanmasının başa çatdırılmasına tam hazır olduqlarını təsdiq etdilər.

Tərəflər, enerji ehtiyatlarının beynəlxalq bazarlara daşınması üzrə Transxəzər əməkdaşlığı prosesinin hərtərəfli inkişafı və dərinləşdirilməsində maraqlı olduqlarını bildirdilər.

Prezidentlər Qara dəniz İqtisadi Əməkdaşlığının inkişafını müsbət qiymətləndirmiş və bu təşkilatın institutlaşdırılmasının möhkəmləndirilməsi üzrə görülmüş tədbirlərin vacibliyini qeyd etmişlər.

Tərəflər demokratik islahatlara, insan hüquqlarının qorunmasına, milli azlıqların hüquqlarına hörmət edilməsinə, BMT və ATƏT-in əsas sənədlərindən irəli gələn bütün öhdəliklərin yerinə yetirilməsinə sadiq olduqlarını bir daha təsdiq etmiş və hüquqi-demokratik dövlətlərin qurulmasında qətiyyətli olduqlarını qeyd etmişlər.

Tərəflər Azərbaycan Respublikası ilə Gürcüstan arasında dövlət sərhədlərinin delimitasiya və demarkasiyasının mühüm əhəmiyyətini qeyd etmiş və dövlət komissiyalarının işinin davam etdirilməsinin zəruriliyini təsdiq etmişlər.

Tərəflər iqtisadiyyatın bütün sahələrində qarşılıqlı faydalı əməkdaşlığın inkişafına şərait yaradılmasını, həmçinin bu əməkdaşlıq üçün əlverişli şəraitin təmin olunması üzrə tədbirlərin həyata keçirilməsini qətiyyətlə təsdiq etmişlər.

Tərəflər əmək, sosial müdafiə, təhsil, elm və mədəniyyət məsələləri üzrə əməkdaşlığın inkişafı və dərinləşməsində səylərini və bu sahədəki mübadilələrini dəstəklədiklərini ifadə etdilər.

Tərəflər Gürcüstanda yaşayan azərbaycanlıların, həmçinin Azərbaycanda yaşayan gürcülərin hüquqlarına riayət olunması və maraqlarının qorunması məsələlərinə böyük əhəmiyyət verdiklərini və onlara qayğı göstərilməsinin dövlət siyasətinin mühüm sahəsi hesab etdiklərini bir daha təsdiq etmişlər.

Tərəflər, keçirilmiş səfərlərin nəticələrini müsbət qiymətləndirərək və danışıqların səmərəliliyini qeyd edərək, əməkdaşlığın mehriban qonşuluq, dostluq və qarşılıqlı yardım ruhunda davam etdirilməsi və genişləndirilməsinə səy göstərəcəklərini bəyan etmişlər.

Tbilisi şəhərində 2000-ci il martın 22-də, hər biri Azərbaycan, gürcü və rus dillərində olmaqla iki əsl nüsxədə imzalanmışdır, bütün mətnlər eyni qüvvəyə malikdir.

Azərbaycan Respublikası Prezidenti Gürcüstan Prezidenti

Heydər ӘLİYEV Eduard Şevardnadze

Azərbaycan Respublikasının Qanunvericilik toplusu. – 2000. – 31 avqust, № 8. – S.3895-3897.