Azərbaycan Respublikası Maliyyə Nazirliyi yanında Dövlət Əyar Palatası haqqında Əsasnamənin təsdiq edilməsi barədə

AZƏRBAYCAN RESPUBLİKASI NAZİRLƏR KABİNETİNİN QƏRARI

Azərbaycan Respublikasının Nazirlər Kabineti qərara alır:

1. "Azərbaycan Respublikası Maliyyə Nazirliyi yanında Dövlət Əyar Palatası haqqında Əsasnamə" təsdiq edilsin (əlavə olunur).

2. Müəyyən edilsin ki, əyar haqqından toplanan vəsaitin 60 faizi dövlət büdcəsinə köçürülür, 40 faizi Dövlət Əyar Palatasının sərəncamında qalır.

3. Azərbaycan Respublikasının Maliyyə Nazirliyinə tapşırılsın ki, Dövlət Əyar Palatasının cari ilin sonunadək maliyyələşdirilməsi ilə əlaqədar müvafiq təkliflərini, qiymətli metallardan hazırlanmış məmulatların əyarlanma və damğalanma qaydalarının və əyar damğalarının növləri və quruluşunun layihəsini hazırlayıb 15 gün müddətində Azərbaycan Respublikasının Nazirlər Kabinetinə təqdim etsin.

4. "Azərbaycan Respublikası Nazirlər Kabinetinin Azərbaycan Respublikası Maliyyə Nazirliyi yanında Dövlət Əyar Palatası haqqında Əsasnamənin təsdiq edilməsi barədə" 1992-ci il 27 mart tarixli, 148 nömrəli qərarının 1-ci bəndi qüvvədən düşmüş hesab edilsin.

5. Bu qərar imzalandığı gündən qüvvəyə minir.

Azərbaycan Respublikasının Baş naziri A. Rasizadə

Bakı şəhəri, 22 avqust 2000-ci il

№ 147

Azərbaycan Respublikasının Qanunvericilik toplusu. – 2000. – 31 avqust, № 8. – S. 3977.