Azərbaycan Respublikası Nazirlər Kabinetinin "Dövlət rüsumunun dərəcələri və ödənilməsi qaydası haqqında" 1995-ci il 29 iyun tarixli, 156 nömrəli qərarına əlavələr edilməsi barədə

AZƏRBAYCAN RESPUBLİKASI NAZİRLƏR KABİNETİNİN QƏRARI

Azərbaycan Respublikası Prezidentinin "Azərbaycan Respublikasında daimi yaşayan, vətəndaşlığı olmayan şəxslərin və əcnəbilərin xüsusi sənədlərinin nümunələrinin təsdiq edilməsi haqqında" 2000-ci il 15 iyul tarixli, 372 nömrəli Fərmanının 2-ci bəndinin 3-cü abzasının icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. Azərbaycan Respublikası Prezidentinin "Azərbaycan Respublikasında daimi yaşayan vətəndaşlığı olmayan şəxslərin və əcnəbilərin xüsusi sənədlərinin nümunələrinin təsdiq edilməsi haqqında" 2000-ci il 15 iyul tarixli, 372 nömrəli Fərmanının 2-ci bəndinin 3-cü abzasının icrasını təmin etmək məqsədi ilə "Dövlət rüsumunun dərəcələri və ödənilməsi qaydası haqqında" Azərbaycan Respublikası Nazirlər Kabinetinin 1995-ci il 29 iyun tarixli, 156 nömrəli qərarının 1-ci bölməsinin 5-ci bəndinə aşağıdakı redaksiyada "v", "y", "z" yarımbəndləri əlavə edilsin:

"v) Azərbaycan Respublikasının hüdudlarında istifadə edilməsi üçün 16 yaşına çatdıqdan sonra Azərbaycan Respublikasında daimi yaşayan vətəndaşlığı olmayan şəxsə şəxsiyyət vəsiqəsinin verilməsinə görə

aylıq gəlirin vergi tutulmayan məbləğinin 0.3 misli miqdarında;

y) Azərbaycan Respublikasının hüdudlarından kənara getməsi üçün Azərbaycan Respublikasında daimi yaşayan vətəndaşlığı olmayan şəxsə şəxsiyyət vəsiqəsinin verilməsinə görə

aylıq gəlirin vergi tutulmayan məbləğinin 0.5 misli miqdarında;

z) Azərbaycan Respublikasında 30 gündən artıq yaşamaq istəyən əcnəbinin qeydiyyata alınması haqqında vəsiqə verilməsinə görə

aylıq gəlirin vergi tutulmayan məbləğinin 0.5 misli miqdarında."

2. Bu qərar imzalandığı gündən qüvvəyə minir.

Azərbaycan Respublikasının Baş naziri A. Rasizadə

Bakı şəhəri, 30 avqust 2000-ci il

№ 153

Azərbaycan Respublikasının Qanunvericilik toplusu. – 2000. – 31 avqust, № 8. – S. 3984-3985.