XXI əsrin, üçüncü minilliyin qarşılanması ilə bağlı tədbirlərin həyata keçirilməsi haqqında

AZƏRBAYCAN RESPUBLİKASI PREZİDENTİNİN SƏRƏNCAMI

Azərbaycan xalqı bütün bəşəriyyətlə birlikdə bir neçə gündən sonra 2001-ci ilə - yeni əsrin, yeni minilliyin ilk ilinə qədəm qoyacaqdır. Böyük iftixar və qürur hissi ilə qeyd edirik ki, Azərbaycan Respublikası yeni dövrə müstəqil, suveren dövlət kimi daxil olur.

XX əsr xalqımızın həyatında çox mühüm tarixi hadisələrlə əlamətdardır. Bu əsrdə nailiyyətlərimiz də, itkilərimiz də olmuşdur. Xalqımızın həmin dövrdə ən böyük nailiyyəti isə şübhəsiz ki, onun azadlığı, müstəqilliyidir. Azərbaycan əsrin əvvəllərində öz müstəqilliyini qazansa da, az müddətdən sonra bir sıra xarici və daxili amillərin təsiri altında onu itirməyə məcbur olmuşdur. Əsrin sonuncu onilliyində tarix xalqımıza öz dövlət müstəqilliyini bərpa etmək imkanına vergi və ölkəmiz XX əsri müstəqil dövlət olaraq başa vurdu.

Azərbaycan xalqının azadlığını, ölkəmizin müstəqilliyini qoruyub möhkəmləndirmək, onun ərazi bütövlüyünü tam təmin etmək, Azərbaycanı qüdrətli ölkəyə çevirmək, xalqımızı layiq olduğu xoşbəxt, firavan həyata qovuşdurmaq XXI əsrdə hamımızın qarşısında duran ən ümdə vəzifələrdir. Hər bir Azərbaycan vətəndaşı bu vəzifələrin yerinə yetirilməsi, xalqımızın amallarının gerçəkləşməsi naminə var qüvvəsini sərf etməlidir.

Müstəqil Azərbaycan dövlətinin inkişafında XXI əsrin böyük dönüş mərhələsi olacağına və yeni minilliyin xalqımızın həyatında əlamətdar bir dövrə çevriləcəyinə dərin inamı ifadə edərək qərara alıram:

1. “XXI əsrin və üçüncü minilliyin qarşılanması ilə bağlı tədbirlər planı” təsdiq edilsin (əlavə olunur).

2. Tədbirlər planının yerinə yetirilməsinə nəzarət Azərbaycan Respublikası Prezidentinin İcra Aparatına həvalə edilsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

Azərbaycan Respublikası Prezidentinin 26 dekabr 2000-ci il tarixli, 596 nömrəli Sərəncamı ilə təsdİq olunmuşdur

XXI əsrin və üçüncü minilliyin qarşılanması ilə bağlı Tədbİrlər planı

I. Təşkİlatİ tədbİrlər

1. Bəşəriyyətin, o cümlədən Azərbaycan xalqının XX əsrdə və ikinci minillikdə əldə etdiyi nailiyyətləri təbliğ və nümayiş etdirmək məqsədi ilə «Millenium» informasiya mərkəzinin yaradılması

2. Azərbaycanda XXI əsrin və üçüncü minilliyin qarşılanması ilə bağlı tədbirlər haqqında informasiyanı yaymaq və təbliğ etmək məqsədi ilə 2001-2003-cü illər ərzində fəaliyyət göstərəcək «Millenium» mətbuat mərkəzinin yaradılması

3. Dünya Azərbaycanlılarının Qurultayının keçirilməsi

4. Respublikanın bütün muzeylərində, o cümlədən tarix-diyarşünaslıq muzeylərində Azərbaycanın XX əsrdə əldə etdiyi nailiyyətləri əks etdirən ekspozisiyaların və səyyar sərgilərin yaradılması

5. Bakı şəhəri yaxınlığında açıq tipli Tarix-etnoqrafiya və ekologiya milli park-muzeyinin yaradılması

6. Bakı şəhərində Neft muzeyinin yaradılması

7. Azərbaycanın XX əsrdə inkişafında xüsusi rolu olan neftə həsr olunmuş abidənin ucaldılması

II. Elmİ sİmpozİum və konfranslar, sorğu və müsabİqələr

1. «Yeni əsrin «mədəni inteqrasiya» və «qloballaşdırma (ekologiya, humanitar və informasiya sahələrində)» şüarları Azərbaycan zəminində» mövzusunda elmi konfransların keçirilməsi

2. «Azərbaycan alimləri—XXI əsrə» mövzusunda elmi-praktiki konfransın keçirilməsi

3. XX əsrin və ikinci minilliyin 100 ən görkəmli şəxsiyyətinin müəyyən edilməsi

4. «İkinci minilliyin yekunları» mövzusunda elmi simpoziumun keçirilməsi

5. Yaşı 100-dən çox olan 1500-dən artıq Azərbaycan sakini haqqında sorğu-ensiklopedik kitabın hazırlanması və Bakıda «XIX əsrdən XXI əsrə» Beynəlxalq gerontoloji konfransın təşkil edilməsi. Uzunömürlü sakinlərin ən çox yaşadıqları Ağcabədi, Ağdam, Ağstafa, Bərdə, Gədəbəy, Goranboy, Xaçmaz, Kəlbəcər, Kürdəmir, Quba, Qusar, Lerik, Naxçıvan, Saatlı, Sabirabad, Şəmkir, Tərtər, Tovuz və Yevlax rayonlarında konfransın seksiya iclaslarının keçirilməsi

6. «XX əsrin unikal texnologiyaları Azərbaycanda» mövzusunda elmi praktiki konfransın keçirilməsi

7. «XX əsrin və ikinci minilliyin tarixi» mövzusunda elmi konfranslar silsiləsinin keçirilməsi

8. «Azərbaycan təhsili: XX əsrdən XXI əsrə» mövzusunda elmi konfransın keçirilməsi

9. «XX əsr və Azərbaycan əlifbası» mövzusunda elmi konfransın keçirilməsi və latın qrafikası ilə çapa tövsiyə olunan əsərlərin müəyyən edilməsi

10. Respublikanın ümumtəhsil məktəblərinin şagirdləri arasında «XXI əsrdə Azərbaycanı necə görmək istəyirəm?» mövzusunda inşa müsabiqəsinin keçirilməsi. Müsabiqənin yekunlarına həsr olunmuş konfransın keçirilməsi və nəticələrinin çap olunması

11. «Yeni əsrə özümüzlə nə aparırıq?» mövzusunda sorğunun keçirilməsi

12. «Gənc istedadlar—yeni minilliyə» mövzusunda uşaq və yeniyetmələrin ümumrespublika müsabiqələrinin təşkil edilməsi

13. «Ədəbi ekspress Avrasiya-2000» Beynəlxalq ədəbi konqresinin keçirilməsi

14. «Üçüncü minillikdə təhlükəsiz həyat və təmiz ekologiya uğrunda» mövzusunda beynəlxalq simpoziumun keçirilməsi

15. «Yeni əsrə, yeni minilliyə—tolerantlıq» mühiti mövzusunda dini konfessiya nümayəndələrinin konfranslarının təşkil edilməsi

16. «İslam mədəniyyəti. Qərb və Şərq intibahı» mövzusunda beynəlxalq elmi simpoziumun keçirilməsi

17. Azərbaycanda islamın yayılmasının 1400 illik yubileyinə həsr olunmuş tədbirlərin keçirilməsi

III. Kütləvİ mədənİ tədbİrlər

1. Azərbaycanın bütün şəhər, rayon, qəsəbə və kəndlərində «Yeni əsri birgə qarşılayırıq» şüarı altında kütləvi aksiyaların təşkil olunması

2. «Əsrlərin yadigarı» ümumrespublika folklor festivalının və bu mövzuda elmi konfransın keçirilməsi

3. «Azərbaycan təsviri sənəti XX əsrdə» sərgisinin və elmi konfransının keçirilməsi

4. «Azərbaycan memarlığı XX əsrdə» sərgiləri və konfranslarının keçirilməsi

5. «Azərbaycan xalçası və tətbiqi sənəti» mövzusunda beynəlxalq sərgi və simpoziumun keçirilməsi

6. «Azərbaycan—dünya mədəniyyəti xəzinəsinə» mövzusunda beynəlxalq simpozium və sərginin keçirilməsi

7. «Azərbaycan musiqiçiləri—üçüncü minilliyə». Respublikada və xarici ölkələrdə Azərbaycan musiqi xəzinəsinin incilərindən ibarət silsilə konsertlərin təşkil edilməsi

8. Azərbaycan Respublikasının xarici dövlətlərdə səfirlikləri və beynəlxalq təşkilatlarda nümayəndəlikləri vasitəsi ilə Azərbaycan mədəniyyətinin nailiyyətlərini nümayiş etdirmək, müştərək konsert, konfranslar təşkil etmək, xarici kütləvi informasiya vasitələrində materiallar vermək

9. «Azərbaycan mədəniyyəti əsrlərin və minilliklərin qovşağında» devizi altında XX əsrin 100 ən yaxşı musiqi proqramı və teatr tamaşasının video-kasetə alınması

10. «Azərbaycanda maarifçilik ənənələri» mövzusunda ümumrespublika pedaqoji konfranslarının keçirilməsi

11. «Yeni əsrin övladıyam» mövzusunda uşaq rəsmlərinin müsabiqə-sərgisinin təşkil edilməsi və müvafiq albomun çapı

12. «Kütləvi informasiya vasitələri və informasiya texnologiyaları» mövzusunda elmi-praktiki konfransın keçirilməsi

13. «XX əsrin tarixi kino və video materiallarda» sənədli teleserialın yaradılması və nümayiş etdirilməsi

14. Sağlam həyat tərzinin təbliği məqsədi ilə kütləvi informasiya vasitələrində və ümumtəhsil məktəblərində 2001-ci il ərzində «XXI əsrə narkotiksiz», «XXI əsrə nikotinsiz», «XXI əsrə alkoqolsuz» təbliğat aksiyalarının keçirilməsi

15. «Minilliklər estafeti» adı altında Bakı-Gəncə-Zaqatala-Şəki-Oğuz-İsmayıllı-Kürdəmir-Əli Bayramlı-Səlyan-Bakı marşrutu üzrə marafon və velomarafonun keçirilməsi

16. «Azərbaycan idmanı—XXI əsrə» şüarı altında respublika idman spartakiadasının keçirilməsi

17. «Azərbaycan milli kulinariyasının inciləri» layihəsi çərçivəsində dövlət və özəl qurumların xətti ilə dünyanın ən böyük şəhərlərində» Azərbaycan yeməkləri» restoran şəbəkələrinin yaradılması, milli kulinariya nailiyyətlərinin əsrlərdən miras qalan milli sərvət kimi təbliği

18. Bakı şəhərində regionlar üzrə milli kulinariya günlərinin keçirilməsi

IV. İnformasİya, çap məmulatı və suvenİrlərİn hazırlanması

1. «Azərbaycan Dövlət Kitabı»nın çap edilməsi və təqdimat mərasiminin keçirilməsi

2. İkinci minilliyin və XX əsrin tarixinə dair «Ensiklopediya-2000» çoxcildliyinin hazırlanması

3. «Azərbaycan XX əsrdə» ikicildlik statistika toplusunun kitab və disk şəklində buraxılması

4. Azərbaycanın ikinci minillikdə və XX əsrdə nailiyyətlərinə və görkəmli şəxsiyyətlərinə həsr olunmuş xatirə sikkələrinin, poçt markalarının, albom, plakat və digər çap məmulatlarının buraxılması

5. Azərbaycanın ikiminillik irsinin—elmi, mədəni, ədəbi çap məhsullarının latın qrafikası ilə təkrar nəşrinin həyata keçirilməsi

6. İnformasiya texnologiyalarının imkanlarından istifadə etməklə Azərbaycanın XXI əsrə hansı durumda qədəm qoyması barədə məlumat hazırlayıb onu İnternet, elektron-poçt, informasiya daşıyıcısı olan müxtəlif elektron vasitələrinin köməyi ilə dünyaya yaymaq

Azərbaycan Respublikasının Prezidenti Heydər Əlİyev

Bakı şəhəri, 26 dekabr 2000-ci il

№ 596

Azərbaycan Respublikasının Qanunvericilik toplusu. - 2000.- 31 dekabr, № 12.- S.4808-4811.