Əlil olmuş və digər kateqoriyalardan olan bir qrup aztəminatlı vətəndaşlara dövlət yardımının artırılması haqqında

AZƏRBAYCAN RESPUBLİKASI PREZİDENTİNİN SƏRƏNCAMI

Azərbaycan Respublikasını erməni təcavüzündən müdafiə edərkən və 1990-cı il 20 Yanvar hadisələri zamanı əlil olmuş şəxslərə, habelə bir sıra digər kateqoriyalardan olan aztəminatlı vətəndaşlara dövlət qayğısını artırmaq məqsədi ilə qərara alıram:

1. Azərbaycan Respublikasını erməni təcavüzündən müdafiə edərkən və 1990-cı il 20 Yanvar hadisələri zamanı əlil olmuş şəxslərə verilən aylıq müavinətlər artırılaraq aşağıdakı məbləğlərdə müəyyən edilsin:

I qrup əlillərə —70000 manat;

II qrup əlillərə —60000 manat;

III qrup əlillərə —50000 manat.

Göstərilən məbləğlərin «Aztəminatlı ailələrə verilən müavinətlərin artırılması haqqında» Azərbaycan Respublikası Prezidentinin 22 may 1996-cı il tarixli, 315 nömrəli Sərəncamı ilə müəyyən olunmuş hissəsi dövlət büdcəsinin, qalan hissəsi isə (I qrup əlillər üçün 25000 manat, II qrup əlillər üçün 20000 manat və III qrup əlillər üçün 15000 manat) Azərbaycan Respublikası Dövlət Sosial Müdafiə Fondunun vəsaiti hesabına ödənilsin. [1]

2. Aztəminatlı ailələrdə uşaq doğularkən verilən birdəfəlik müavinət 1,4 dəfə artırılmaqla 70000 manat məbləğində müəyyən edilsin.

3. Dəfn üçün ödənilən birdəfəlik müavinət 1,5 dəfə artırılmaqla 150000 manat məbləğində müəyyən edilsin.

4. «Aztəminatlı ailələrə verilən müavinətlərin artırılması haqqında» Azərbaycan Respublikası Prezidentinin 22 may 1996-cı il tarixli, 315 nömrəli Sərəncamının 1-ci bəndinin ikinci abzası və 2-ci, 3-cü bəndləri qüvvədən düşmüş hesab edilsin.

5. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

6. Bu Sərəncam 2001-ci il yanvar ayının 1-dən qüvvəyə minir.

Azərbaycan Respublikasının Prezidenti Heydər ƏLİYEV

Bakı şəhəri, 29 dekabr 2000-ci il

№ 597

Azərbaycan Respublikasının Qanunvericilik toplusu. - 2000.- 31 dekabr, № 12.- S.4812.