Azərbaycan Respublikasında aqrar bölmənin idarəetmə sisteminin təkmilləşdirilməsi tədbirləri haqqında

AZƏRBAYCAN RESPUBLİKASI PREZİDENTİNİN FƏRMANI

Azərbaycan Respublikasında aqrar bölmənin idarəetmə sistemini təkmilləşdirmək, bu sahədə aparılan islahatların səmərəliliyini daha da artırmaq məqsədi və Azərbaycan Respublikası Konstitusiyasının 109-cu maddəsinə uyğun olaraq qərara alıram:

1. Azərbaycan Respublikasının Nazirlər Kabineti yanında Dövlət Baytarlıq Komitəsi ləğv edilsin.

2. Azərbaycan Respublikasının Nazirlər Kabineti yanında Dövlət Bitkilərin Karantini Müfəttişliyi ləğv edilsin.

3. bu Fərmanın 1-ci və 2-ci bəndləri ilə ləğv olunan dövlət orqanlarının səlahiyyətləri və onların tabeliyindən olan müəssisə və təşkilatlar Azərbaycan Respublikasının Kənd Təsərrüfatı Nazirliyinə verilsin.

4. Azərbaycan Respublikasının Nazirlər Kabineti 1 ay müddətində:

Azərbaycan Respublikası Kənd Təsərrüfatı Nazirliyinin Əsasnaməsinə dəyişikliklər edilməsi barədə təkliflərini Azərbaycan Respublikasının Prezidentinə təqdim etsin;

Azərbaycan Respublikası Kənd Təsərrüfatı Nazirliyinin strukturunda müvafiq dəyişikliklər etsin;

Bu Fərmandan irəli gələn digər məsələləri həll etsin.

5. "Azərbaycan Respublikasının Nazirlər Kabineti yanında Dövlət Baytarlıq Komitəsinin yaradılması haqqında" Azərbaycan Respublikası Prezidentinin 1993-cü il 3 may tarixli 547 nömrəli Fərmanı qüvvədən düşmüş hesab edilsin.

6. Bu Fərman dərc olunduğu gündən qüvvəyə minir.

Azərbaycan Respublikasının Prezidenti Heydər Əlİyev

Bakı şəhəri, 4 fevral 2000-ci il

№ 272

Azərbaycan Respublikasının Qanunvericilik toplusu. - 2000.- 29 fevral, № 2.- S.548.