Azadlıqdan məhrum etmə cəzasına məhkum olunmuş Kənan Yavər oğlu Gürəlin və Hacımurad Söhrab oğlu Sadəddinovun əfv edilməsi haqqında

Azərbaycan Respublikası Prezidentinin Fərmanı

Azərbaycan Respublikası Prezidentinin ünvanına azadlıqdan məhrum etmə cəzasına məhkum olunmuş Kənan Yavər oğlu Gürəlin və Hacımurad Söhrab oğlu Sadəddinovun əfv edilməsi barədə müraciətlər daxil olmuşdur. Həmin müraciətlərdə göstərilir ki, onlar Azərbaycan Respublikasının suverenliyi, müstəqilliyi, dövlət təhlükəsizliyi və müdafiə qabiliyyəti zərərinə hərəkət edərək qəsdən ağır cinayətlər törətmişlər. Bu müraciətlərdə həmçinin qeyd olunur ki, onlar cəzalarının bir hissəsini çəkdikdən sonra törətdikləri cinayətləri dərk edib öz əməllərindən peşman olmuşlar və ailə vəziyyətlərinin ağırlığı, səhhətlərini nəzərə alaraq əfv olunmalarını xahiş edirlər.

Bütün bunları nəzərə alaraq, habelə insan hüquq və azadlıqlarına hörmətin, ədalət və humanizmin təzahürü olan bu güzəştdən həmin şəxslərin düzgün nəticə çıxaracaqlarını, qanunlara hörmət ruhunda davranacaqlarını arzulayaraq və Azərbaycan Respublikası Konstitusiyasının 109-cu maddəsinin 22-ci bəndini rəhbər tutaraq qərara alıram:

I. Azadlıqdan məhrum etmə cəzasına məhkum olunmuş aşağıdakı şəxslər cəzanın çəkilməmiş hissəsindən azad edilsinlər:

1. Gürəl Kənan Yavər oğlu, 1953-cü ildə anadan olmuş, Avstriya Respublikasının vətəndaşı, Azərbaycan Respublikası Ali Məhkəməsinin 1996-cı il 5 sentyabr tarixli hökmü ilə məhkum edilmişdir.

2. Sadəddinov Hacımurad Söhrab oğlu, 1964-cü ildə anadan olmuş, Azərbaycan Respublikasının vətəndaşı, Azərbaycan Respublikası Ali Məhkəməsinin 1996-cı il 13 dekabr tarixli hökmü ilə məhkum edilmişdir.

II. Bu Fərman imzalandığı gündən qüvvəyə minir.

Azərbaycan Respublikasının Prezidenti Heydər ƏLİYEV

Bakı şəhəri, 7 iyun 2000-ci il

№ 346

Azərbaycan Respublikasının Qanunvericilik toplusu.-2000.- 30 iyun, № 6.- S.2527-2528.