Azərbaycan Respublikasının Prezidenti Heydər Əliyev və Bolqarıstan Respublikasının Prezidenti Petr Stoyanov tərəfindən imzalanmış Birgə Bəyanatın təsdiq edilməsi barədə

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi qərara alır:

1. Azərbaycan Respublikasının Prezidenti Heydər Əliyev və Bolqarıstan Respublikasının Prezidenti Petr Stoyanov tərəfindən 1999-cu il dekabrın 2-də Bakı şəhərində imzalanmış Birgə Bəyanat təsdiq edilsin.

2. Bu Qanun dərc edildiyi gündən qüvvəyə minir.

Azərbaycan Respublikasının Prezidenti Heydər ӘLİYEV

Bakı şəhəri, 8 fevral 2000-ci il

№ 802-IQ

Bİrgə Bəyanat

Azərbaycan Respublikasının Prezidenti cənab Heydər Əliyevin dəvəti ilə Bolqarıstan Respublikasının Prezidenti cənab Petr Stoyanov 02—03 dekabr 1999-cu il tarixində Azərbaycan Respublikasında rəsmi səfərdə olmuşdur.

Prezidentlər aparılmış danışıqlar zamanı öz ölkələrində baş verən siyasi, iqtisadi və sosial proseslər haqqında informasiya mübadiləsi etdilər. Onlar demokratik islahatlara, milli azlıqlara mənsub olan şəxslərin hüquqları da daxil olmaqla insan hüquqlarına hörmət edilməsinə və qorunmasına, BMT və ATƏT-in əsas sənədlərindən irəli gələn bütün öhdəliklərin yerinə yetirilməsinə tərəfdar olduqlarını bir daha ifadə etdilər və hüquqi-demokratik dövlətlərin quruculuğunda qətiyyətlərini qeyd etdilər.

Tərəflər iki ölkə arasındakı dostluq münasibətlərinin indiki vəziyyətini müsbət qiymətləndirir və mövcud münasibətlərin dərinləşdirilməsində və onun keyfiyyətcə yeni səviyyəyə qaldırılmasında öz əzmlərini bir daha təsdiqləyirlər.

Tərəflər müxtəlif səviyyələrdə siyasi dialoqun, o cümlədən parlamentlərarası əlaqələrin inkişafına tərəfdar çıxaraq, ikitərəfli və beynəlxalq məsələlər üzrə məsləhətləşmələr aparacaqlar. Hər iki dövlətin Xarici İşlər Nazirlikləri arasında qarşılıqlı fəaliyyətin fəallaşmasına hazırlıq ifadə olundu.

Tərəflər bazar iqtisadiyyatı prinsiplərinə əsaslanan qarşılıqlı faydalı iqtisadi əməkdaşlığın inkişafına və Azərbaycan Respublikası ilə Bolqarıstan Respublikası arasında əmtəə dövriyyəsinin əhəmiyyətli artırılmasına hərtərəfli kömək göstərilməsi haqqında razılığa gəldilər. Onlar yeni sazişlərin imzalanması da daxil olmaqla bu qəbildən olan əməkdaşlıq üçün əlverişli şəraitin təmin olunması üzrə tədbirlər həyata keçirəcəklər.

Azərbaycan və Bolqarıstan, nəşriyyat, radio, televiziya və kinematoqrafiya sahəsində informasiya mübadiləsinə və əməkdaşlığa, o cümlədən bu məsələlər üzrə xüsusi sazişlər imzalamaq yolu ilə, əlverişli şərait yaradacaqlar.

Hər iki dövlət mütəşəkkil cinayətkarlığa, o cümlədən terrorizmə, narkotik vasitələrin və psixotrop maddələrin qanunsuz dövriyyəsinə, silah və incəsənət əsərlərinin qanunsuz ticarətinə, saxta ödəmə vasitələrinin və sənədlərin düzəldilməsi və dövriyyəyə buraxılmasına və qanunsuz miqrasiyaya qarşı mübarizədə əməkdaşlığı ikitərəfli qaydada, habelə regional və digər beynəlxalq təşkilatlar çərçivəsində həyata keçirəcəklər.

Tərəflər Qara dəniz İqtisadi Əməkdaşlığı çərçivəsində ticarət-iqtisadi əməkdaşlığın inkişafı və dərinləşdirilməsi üzrə səylərinin fəallaşdırılması arzularını ifadə etdilər, Baltik və Qara dəniz regionu ölkələrinin əməkdaşlığını dəstəklədilər.

Azərbaycan və Bolqarıstan ticarət-iqtisadi əməkdaşlığın inkişafının mühüm vasitəsi olan Avrasiya nəqliyyat dəhlizinin fəaliyyət göstərməsinin vacibliyinə işarə etdilər və bu dəhlizin davamlı inkişafının təmin edilməsinə yönəlmiş səyləri dəstəkləyirlər. Tərəflər Avropa İttifaqının dəstəyi ilə, habelә beynəlxalq maliyyə təşkilatlarının və özəl kapitalın cəlb edilməsi ilə TRASEKA və İNOQEYT layihələrinin Transavropa qovşağı kontekstində müvəffəqiyyətlə həyata keçirilməsi məqsədilə sıx əməkdaşlıq edəcəkləri barədə razılıq əldə etdilər.

Tərəflər aparılmış danışıqlar zamanı sülhün, təhlükəsizliyin və sabitliyin saxlanılması məsələlərində BMT və ATƏT-in rolunun gücləndirilməsinə tərəfdar olduqlarını bildirdilər, regiondakı münaqişələrin dövlətlərin suverenliyinə, ərazi bütövlüyünə və sərhədlərinin toxunulmazlığına hörmət və riayət edilməsi əsasında tezliklə sülh yolu ilə həll edilməsinin zəruriliyini qeyd etdilər.

Tərəflər habelə razılığa gəldilər ki, öz ölkələrinin Avropa və Transatlantika siyasi və iqtisadi təşkilatları ilə əməkdaşlığının inkişafında qarşılıqlı fəaliyyət göstərəcəklər. Onlar Cənubi Qafqaz regionu dövlətləri ilə möhkəm sülhün və birliyin və əməkdaşlığın möhkəmləndirilməsinə yönəlmiş proseslərin davam etdirilməsinin zəruriliyi ilə razılaşdılar. Tərəflər münaqişələrin sülh yolu ilə həll edilməsinin və yeni gərginlik ocaqlarının yaranmasının qarşısının alınmasının əhəmiyyətini qeyd etdilər.

Azərbaycan və Bolqarıstan regional təhlükəsizliyin və sabitliyin möhkəmləndirilməsində mühüm rol oynayan Şimali Atlantika Tərəfdaşlıq Şurası, NATO-nun «Sülh Naminə Tərəfdaşlıq» proqramı və onun sonrakı təkamülü çərçivəsində ikitərəfli və çoxtərəfli əməkdaşlığın əhəmiyyətini qeyd etdilər. Azərbaycan Tərəfi Bolqarıstanın NATO-da tamhüquqlu üzvlüyünə yönəlmiş səylərini dəstəklədiyini bildirdi ki, bu da Cənub-Şərqi Avropada təhlükəsizliyin və sabitliyin möhkəmləndirilməsinə köməklik göstərərdi.

Tərəflər ATƏT-in İstanbul Zirvə Görüşünün nəticələrini yüksək qiymətləndirdilər və onun gedişində qəbul edilmiş XXI əsrdə Avropada təhlükəsizliyin və sabitliyin möhkəmləndirilməsinin təmin olunmasına yönəldilən sənədlərin mühüm əhəmiyyətini qeyd etdilər.

Tərəflər bu kontekstdə 19 noyabr 1999-cu il tarixdə qəbul edilmiş ATƏT-in İstanbul Zirvə Görüşü Bəyanatının 20-ci bəndinə uyğun olaraq Dağlıq Qarabağ münaqişəsinin möhkəm və tam əhatəli siyasi həllinə öz dəstəklərini təsdiqlədilər.

Bolqarıstan Tərəfi Azərbaycanın Avropa Şurasına və Ümumdünya Ticarət Təşkilatına daxil olması səylərinə özünün tam dəstəyini ifadə etdi.

1999-cu il dekabrın 2-də Bakı şəhərində, iki əsl nüsxədə hər biri Azərbaycan, bolqar və rus dillərində, bütün mətnlər eyni qüvvəyə malik olmaqla imzalanmışdır.

Azərbaycan Respublikasının Prezidenti Bolqarıstan Respublikasının Prezidenti

Heydər ƏLİYEV Petr STOYANOV

Azərbaycan Respublikasının Qanunvericilik toplusu .- 2000.- 31 mart, № 3.- S.894-896.