Azərbaycan Respublikasının Nazirlər Kabineti və Azərbaycan Həmkarlar İttifaqları Konfederasiyası arasında 1999-cu il üçün Baş Kollektiv Sazişin müddətinin uzadılması, ona əlavələr və dəyişikliklər edilməsi barədə

AZƏRBAYCAN RESPUBLİKASI NAZİRLƏR KABİNETİNİN VƏ AZƏRBAYCAN HƏMKARLAR İTTİFAQLARI KONFEDERASİYASININ QƏRARI

Azərbaycan Respublikasının Nazirlər Kabineti və Azərbaycan Həmkarlar İttifaqları Konfederasiyası qərara alırlar:

1. Azərbaycan Respublikası Nazirlər Kabinetinin və Azərbaycan Həmkarlar İttifaqları Konfederasiyasının 1999-cu il 8 aprel tarixli, 62 nömrəli qərarı ilə bağlanmış Baş Kollektiv Sazişə aşağıdakı əlavələr və dəyişikliklər edilsin:

1. Baş Kollektiv Sazişin preambulasının dördüncü abzasında "Kollektiv müqavilələr və sazişlər haqqında" sözləri "Azərbaycan Respublikası Əmək Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə məsələləri haqqında" sözləri ilə əvəz edilsin.

2. Baş Kollektiv Sazişin I bölməsinə yeni 1.5, 1.6, 1.7-ci bəndlər əlavə edilsin:

"1.5. İqtisadiyyatın yenidən qurulması, məqbul həyat səviyyəsinin saxlanılması məqsədi ilə, tərəflər dövlət iqtisadi proqramlarının və 2000-ci ilə Azərbaycan Respublikası Dövlət büdcəsinin yerinə yetirilməsində maksimum səy göstərəcəklərini öz öhdələrinə götürürlər. Bu aşağıdakı əsas göstəriciləri əhatə edəcəkdir:

2000-ci ildə 1999-cu ilə nisbətən ümumi daxili məhsulun 8,0 faizə qədər artımına nail olmaq;

2000-ci ildə qiymət siyasəti vasitəsi ilə inflyasiyanın artım səviyyəsini sabit saxlamaq və istehlak qiymətlərinin artımını 2-3 faiz səviyyəsində məhdudlaşdırmaq;

sənaye istehsalının artımını 3,0 faizə çatdırmaq;

kənd təsərrüfatı məhsulları istehsalının 4,5 faiz artırılmasına nail olmaq;

əhalinin orta aylıq əmək haqqının 14-15 faiz artımına nail olmaq;

Dövlət büdcəsinin kəsirini, ümumi daxili məhsulun 2,5-3 faiz miqdarında məhdudlaşdırmaq;

əmək haqqının ümumi daxili məhsulda olan xüsusi çəkisini 2000-ci ildə 1999-cu ilə nisbətən 15-18 faizə çatdırmaq.

1.6. 2000-ci ildə əhalinin sanatoriya-kurort müalicəsi üçün vəsaitin ayrılması Dövlət Sosial Müdafiə Fondu ilə Azərbaycan Həmkarlar İttifaqları Konfederasiyasının qarşılıqlı razılaşması ilə həyata keçirilsin.

1.7. 2000-ci ildə sosial sahəyə ümumi daxili məhsulun 9-11 faizindən az olmayaraq vəsaitin ayrılması təmin olunsun."

3. Baş Kollektiv Sazişin 2.15 bəndində "Əməyin mühafizəsi haqqında" Azərbaycan Respublikası Qanununun 14-cü maddəsində" sözləri "Azərbaycan Respublikası Əmək Məcəlləsinin 212-ci maddəsində" sözləri ilə əvəz edilsin.

4. Baş Kollektiv Sazişin 3.5-ci bəndinin üçüncü abzasında "Əmək Qanunları Məcəlləsinin 248-ci maddəsinə uyğun olaraq, sahə (tarif)" sözləri çıxarılsın.

II. Bu qərar Baş Kollektiv Sazişin 3.7-ci bəndində olan şərtləri ilə imzalandığı gündən qüvvəyə minir.

Azərbaycan Respublikasının Baş naziri Azərbaycan Həmkarlar İttifaqları

A. Rasizadə Konfederasiyasının sədri S. Mehbalıyev

Bakı şəhəri, 6 mart 2000-ci il

№ 39

Azərbaycan Respublikasının Qanunvericilik toplusu.-2000.- 31 mart, № 3.- S. 1219-1220.